Lord Krishna

শ্রীমদ্ভগবদ্গীতা পারাযণ - দ্বিতীযোঽধ্যাযঃ

(Srimad Bhagavad Gita Parayana - Chapter 2 in Bengali)

From Mahabharata

Language:Sanskrit
Translation:English

Known as the Gita-sara or the essence of the entire Gita, the second chapter marks the beginning of Lord Krishna's divine discourse to Arjuna on the battlefield of Kurukshetra. It introduces the fundamental concepts of Sankhya Yoga and Karma Yoga, detailing the eternal nature of the soul and the importance of performing one's duty without attachment to results. Reciting this chapter provides immense mental clarity, strengthens inner resolve, and helps the practitioner overcome grief and confusion by aligning the intellect with divine wisdom, ultimately leading to spiritual equilibrium and peace.

Read In:
DevanagariGujaratiBengaliOdiaTeluguTamilKannadaMalayalamEnglish (IAST)

ওঁ শ্রী পরমাত্মনে নমঃ

অথ দ্বিতীযোঽধ্যাযঃ

সাঙ্খ্যযোগঃ সঞ্জয উবাচ

তং তথা কৃপযাঽঽবিষ্টম্ অশ্রুপূর্ণাকুলেক্ষণম্ ।
বিষীদন্তমিদং বাক্যম্ উবাচমধুসূদনঃ ॥1॥

শ্রী ভগবানুবাচ

কুতস্ত্বা কশ্মলমিদং বিষমে সমুপস্থিতম্ ।
অনার্যজুষ্টমস্বর্গ্যম্ অকীর্তিকরমর্জুন ॥2॥
ক্লৈব্যং মা স্ম গমঃ পার্থ নৈতত্ত্বয্যুপপদ্যতে ।
ক্ষুদ্রং হৃদযদৌর্বল্যং ত্যক্ত্বোত্তিষ্ঠ পরন্তপ ॥3॥

অর্জুন উবাচ

কথং ভীষ্মমহং সঙ্খ্যে দ্রোণং চ মধুসূদন ।
ইষুভিঃ প্রতিযোত্স্যামি পূজার্হাবরিসূদন ॥4॥
গুরূনহত্বা হি মহানুভাবান্ শ্রেযো ভোক্তুং ভৈক্ষ্যমপীহ লোকে ।
হত্বার্থকামাংস্তু গুরূনিহৈব ভুঞ্জীয ভোগান্ রুধিরপ্রদিগ্ধান্ ॥5॥
ন চৈতদ্বিদ্মঃ কতরন্নো গরীযঃ যদ্বা জযেম যদি বা নো জযেযুঃ ।
যানেব হত্বা ন জিজীবিষামঃ তেঽবস্থিতাঃ প্রমুখে ধার্তরাষ্ট্রাঃ ॥6॥
কার্পণ্যদোষোপহতস্বভাবঃ পৃচ্ছামি ত্বাং ধর্মসম্মূঢচেতাঃ ।
যচ্ছ্রেযঃ স্যান্নিশ্চিতং ব্রূহি তন্মে শিষ্যস্তেঽহং শাধি মাং ত্বাং প্রপন্নম্ ॥7॥
ন হি প্রপশ্যামি মমাপনুদ্যাত্ যচ্ছোকমুচ্ছোষণমিন্দ্রিযাণাম্ ।
অবাপ্য ভূমাবসপত্নমৃদ্ধং রাজ্যং সুরাণামপি চাধিপত্যম্ ॥8॥

সঞ্জয উবাচ

এবমুক্ত্বা হৃষীকেশং গুডাকেশঃ পরন্তপঃ ।
ন যোত্স্য ইতি গোবিন্দম্ উক্ত্বা তূষ্ণীং বভূব হ ॥9॥
তমুবাচ হৃষীকেশঃ প্রহসন্নিব ভারত ।
সেনযোরুভযোর্মধ্যে বিষীদন্তমিদং বচঃ ॥10॥

শ্রী ভগবানুবাচ

অশোচ্যানন্বশোচস্ত্বং প্রজ্ঞাবাদাংশ্চ ভাষসে ।
গতাসূনগতাসূংশ্চ নানুশোচন্তি পণ্ডিতাঃ ॥11॥
ন ত্বেবাহং জাতু নাসং ন ত্বং নেমে জনাধিপাঃ ।
ন চৈব ন ভবিষ্যামঃ সর্বে বযমতঃ পরম্ ॥12॥
দেহিনোঽস্মিন্যথা দেহে কৌমারং যৌবনং জরা ।
তথা দেহান্তরপ্রাপ্তিঃ ধীরস্তত্র ন মুহ্যতি ॥13॥
মাত্রাস্পর্শাস্তু কৌন্তেয শীতোষ্ণসুখদুঃখদাঃ ।
আগমাপাযিনোঽনিত্যাঃ তাংস্তিতিক্ষস্ব ভারত ॥14॥
যং হি ন ব্যথযন্ত্যেতে পুরুষং পুরুষর্ষভ ।
সমদুঃখসুখং ধীরং সোঽমৃতত্বায কল্পতে ॥15॥
নাসতো বিদ্যতে ভাবঃ নাভাবো বিদ্যতে সতঃ ।
উভযোরপি দৃষ্টোঽন্তঃ ত্বনযোস্তত্ত্বদর্শিভিঃ ॥16॥
অবিনাশি তু তদ্বিদ্ধি যেন সর্বমিদং ততম্ ।
বিনাশমব্যযস্যাস্য ন কশ্চিত্কর্তুমর্হতি ॥17॥
অন্তবন্ত ইমে দেহাঃ নিত্যস্যোক্তাঃ শরীরিণঃ ।
অনাশিনোঽপ্রমেযস্য তস্মাদ্যুধ্যস্ব ভারত ॥18॥
য এনং বেত্তি হন্তারং যশ্চৈনং মন্যতে হতম্ ।
উভৌ তৌ ন বিজানীতঃ নাযং হন্তি ন হন্যতে ॥19॥
ন জাযতে ম্রিযতে বা কদাচিত্ নাযং ভূত্বা ভবিতা বা ন ভূযঃ ।
অজো নিত্যঃ শাশ্বতোঽযং পুরাণঃ ন হন্যতে হন্যমানে শরীরে ॥20॥
বেদাবিনাশিনং নিত্যং য এনমজমব্যযম্ ।
কথং স পুরুষঃ পার্থ কং ঘাতযতি হন্তি কম্ ॥21॥
বাসাংসি জীর্ণানি যথা বিহায নবানি গৃহ্ণাতি নরোঽপরাণি ।
তথা শরীরাণি বিহায জীর্ণানি অন্যানি সংযাতি নবানি দেহী ॥22॥
নৈনং ছিন্দন্তি শস্ত্রাণি নৈনং দহতি পাবকঃ ।
ন চৈনং ক্লেদযন্ত্যাপঃ ন শোষযতি মারুতঃ ॥23॥
অচ্ছেদ্যোঽযমদাহ্যোঽযম্ অক্লেদ্যোঽশোষ্য এব চ ।
নিত্যঃ সর্বগতঃ স্থাণুঃ অচলোঽযং সনাতনঃ ॥24॥
অব্যক্তোঽযমচিন্ত্যোঽযম্ অবিকার্যোঽযমুচ্যতে ।
তস্মাদেবং বিদিত্বৈনং নানুশোচিতুমর্হসি ॥25॥
অথ চৈনং নিত্যজাতং নিত্যং বা মন্যসে মৃতম্ ।
তথাঽপি ত্বং মহাবাহো নৈবং শোচিতুমর্হসি ॥26॥
জাতস্য হি ধ্রুবো মৃত্যুঃ ধ্রুবং জন্ম মৃতস্য চ ।
তস্মাদপরিহার্যেঽর্থে ন ত্বং শোচিতুমর্হসি ॥27॥
অব্যক্তাদীনি ভূতানি ব্যক্তমধ্যানি ভারত ।
অব্যক্তনিধনান্যেব তত্র কা পরিদেবনা ॥28॥
আশ্চর্যবত্পশ্যতি কশ্চিদেনং আশ্চর্যবদ্বদতি তথৈব চান্যঃ ।
আশ্চর্যবচ্চৈনমন্যঃ শৃণোতি শ্রুত্বাঽপ্যেনং বেদ ন চৈব কশ্চিত্ ॥29॥
দেহী নিত্যমবধ্যোঽযং দেহে সর্বস্য ভারত ।
তস্মাত্সর্বাণি ভূতানি ন ত্বং শোচিতুমর্হসি ॥30॥
স্বধর্মমপি চাবেক্ষ্য ন বিকম্পিতুমর্হসি ।
ধর্ম্যাদ্ধি যুদ্ধাচ্ছ্রেযোঽন্যত্ ক্ষত্রিযস্য ন বিদ্যতে ॥31॥
যদৃচ্ছযা চোপপন্নং স্বর্গদ্বারমপাবৃতম্ ।
সুখিনঃ ক্ষত্রিযাঃ পার্থ লভন্তে যুদ্ধমীদৃশম্ ॥32॥
অথ চেত্ত্বমিমং ধর্ম্যং সঙ্গ্রামং ন করিষ্যসি ।
ততঃ স্বধর্মং কীর্তিং চ হিত্বা পাপমবাপ্স্যসি ॥33॥
অকীর্তিং চাপি ভূতানি কথযিষ্যন্তি তেঽব্যযাম্ ।
সম্ভাবিতস্য চাকীর্তিঃ মরণাদতিরিচ্যতে ॥34॥
ভযাদ্রণাদুপরতং মংস্যন্তে ত্বাং মহারথাঃ ।
যেষাং চ ত্বং বহুমতঃ ভূত্বা যাস্যসি লাঘবম্ ॥35॥
অবাচ্যবাদাংশ্চ বহূন্ বদিষ্যন্তি তবাহিতাঃ ।
নিন্দন্তস্তব সামর্থ্যং ততো দুঃখতরং নু কিম্ ॥36॥
হতো বা প্রাপ্স্যসি স্বর্গং জিত্বা বা ভোক্ষ্যসেমহীম্ ।
তস্মাদুত্তিষ্ঠ কৌন্তেয যুদ্ধায কৃতনিশ্চযঃ ॥37॥
সুখদুঃখে সমে কৃত্বা লাভালাভৌ জযাজযৌ ।
ততো যুদ্ধায যুজ্যস্ব নৈবং পাপমবাপ্স্যসি ॥38॥
এষা তেঽভিহিতা সাঙ্খ্যে বুদ্ধির্যোগে ত্বিমাং শৃণু ।
বুদ্ধ্যা যুক্তো যযা পার্থ কর্মবন্ধং প্রহাস্যসি ॥39॥
নেহাভিক্রমনাশোঽস্তি প্রত্যবাযো ন বিদ্যতে ।
স্বল্পমপ্যস্য ধর্মস্য ত্রাযতে মহতো ভযাত্ ॥40॥
ব্যবসাযাত্মিকা বুদ্ধিঃ একেহ কুরুনন্দন ।
বহুশাখা হ্যনন্তাশ্চ বুদ্ধযোঽব্যবসাঈনাম্ ॥41॥
যামিমাং পুষ্পিতাং বাচং প্রবদন্ত্যবিপশ্চিতঃ ।
বেদবাদরতাঃ পার্থ নান্যদস্তীতি বাদিনঃ ॥42॥
কামাত্মানঃ স্বর্গপরাঃ জন্মকর্মফলপ্রদাম্ ।
ক্রিযাবিশেষবহুলাং ভোগৈশ্বর্যগতিং প্রতি ॥43॥
ভোগৈশ্বর্যপ্রসক্তানাং তযাঽপহৃতচেতসাম্ ।
ব্যবসাযাত্মিকা বুদ্ধিঃ সমাধৌ ন বিধীযতে ॥44॥
ত্রৈগুণ্যবিষযা বেদাঃ নিস্ত্রৈগুণ্যো ভবার্জুন ।
নির্দ্বন্দ্বো নিত্যসত্ত্বস্থঃ নির্যোগক্ষেম আত্মবান্ ॥45॥
যাবানর্থ উদপানে সর্বতঃ সম্প্লুতোদকে ।
তাবান্সর্বেষু বেদেষু ব্রাহ্মণস্য বিজানতঃ ॥46॥
কর্মণ্যেবাধিকারস্তে মা ফলেষু কদাচন ।
মা কর্মফলহেতুর্ভূঃ মা তে সঙ্গোঽস্ত্বকর্মণি ॥47॥
যোগস্থঃ কুরু কর্মাণি সঙ্গং ত্যক্ত্বা ধনঞ্জয ।
সিদ্ধ্যসিদ্ধ্যোঃ সমো ভূত্বা সমত্বং যোগ উচ্যতে ॥48॥
দূরেণ হ্যবরং কর্ম বুদ্ধিযোগাদ্ধনঞ্জয ।
বুদ্ধৌ শরণমন্বিচ্ছ কৃপণাঃ ফলহেতবঃ ॥49॥
বুদ্ধিযুক্তো জহাতীহ উভে সুকৃতদুষ্কৃতে ।
তস্মাদ্যোগায যুজ্যস্ব যোগঃ কর্মসু কৌশলম্ ॥50॥
কর্মজং বুদ্ধিযুক্তা হি ফলং ত্যক্ত্বা মনীষিণঃ ।
জন্মবন্ধবিনির্মুক্তাঃ পদং গচ্ছন্ত্যনামযম্ ॥51॥
যদা তে মোহকলিলং বুদ্ধির্ব্যতিতরিষ্যতি ।
তদা গন্তাঽসি নির্বেদং শ্রোতব্যস্য শ্রুতস্য চ ॥52॥
শ্রুতিবিপ্রতিপন্না তে যদা স্থাস্যতি নিশ্চলা ।
সমাধাবচলা বুদ্ধিঃ তদা যোগমবাপ্স্যসি ॥53॥

অর্জুন উবাচ

স্থিতপ্রজ্ঞস্য কা ভাষা সমাধিস্থস্য কেশব ।
স্থিতধীঃ কিং প্রভাষেত কিমাসীত ব্রজেত কিম্ ॥54॥

শ্রী ভগবানুবাচ

প্রজহাতি যদা কামান্ সর্বান্পার্থ মনোগতান্ ।
আত্মন্যেবাত্মনা তুষ্টঃ স্থিতপ্রজ্ঞস্তদোচ্যতে ॥55॥
দুঃখেষ্বনুদ্বিগ্নমনাঃ সুখেষু বিগতস্পৃহঃ ।
বীতরাগভযক্রোধঃ স্থিতধীর্মুনিরুচ্যতে ॥56॥
যঃ সর্বত্রানভিস্নেহঃ তত্তত্প্রাপ্য শুভাশুভম্ ।
নাভিনন্দতি ন দ্বেষ্টি তস্য প্রজ্ঞা প্রতিষ্ঠিতা ॥57॥
যদা সংহরতে চাযং কূর্মোঽঙ্গানীব সর্বশঃ ।
ইন্দ্রিযাণীন্দ্রিযার্থেভ্যঃ তস্য প্রজ্ঞা প্রতিষ্ঠিতা ॥58॥
বিষযা বিনিবর্তন্তে নিরাহারস্য দেহিনঃ ।
রসবর্জং রসোঽপ্যস্য পরং দৃষ্ট্বা নিবর্ততে ॥59॥
যততো হ্যপি কৌন্তেয পুরুষস্য বিপশ্চিতঃ ।
ইন্দ্রিযাণি প্রমাথীনি হরন্তি প্রসভং মনঃ ॥60॥
তানি সর্বাণি সংযম্য যুক্ত আসীত মত্পরঃ ।
বশে হি যস্যেন্দ্রিযাণি তস্য প্রজ্ঞা প্রতিষ্ঠিতা ॥61॥
ধ্যাযতো বিষযান্পুংসঃ সঙ্গস্তেষূপজাযতে ।
সঙ্গাত্সঞ্জাযতে কামঃ কামাত্ক্রোধোঽভিজাযতে ॥62॥
ক্রোধাদ্ভবতি সম্মোহঃ সম্মোহাত্স্মৃতিবিভ্রমঃ ।
স্মৃতিভ্রংশাত্ বুদ্ধিনাশঃ বুদ্ধিনাশাত্প্রণশ্যতি ॥63॥
রাগদ্বেষবিযুক্তৈস্তু বিষযানিন্দ্রিযৈশ্চরন্ ।
আত্মবশ্যৈর্বিধেযাত্মা প্রসাদমধিগচ্ছতি ॥64॥
প্রসাদে সর্বদুঃখানাং হানিরস্যোপজাযতে ।
প্রসন্নচেতসো হ্যাশু বুদ্ধিঃ পর্যবতিষ্ঠতে ॥65॥
নাঽস্তি বুদ্ধিরযুক্তস্য ন চাযুক্তস্য ভাবনা ।
ন চাভাবযতঃ শান্তিঃ অশান্তস্য কুতঃ সুখম্ ॥66॥
ইন্দ্রিযাণাং হি চরতাং যন্মনোঽনুবিধীযতে ।
তদস্য হরতি প্রজ্ঞাং বাযুর্নাবমিবাম্ভসি ॥67॥
তস্মাদ্যস্য মহাবাহো নিগৃহীতানি সর্বশঃ ।
ইন্দ্রিযাণীন্দ্রিযার্থেভ্যঃ তস্য প্রজ্ঞা প্রতিষ্ঠিতা ॥68॥
যা নিশা সর্বভূতানাং তস্যাং জাগর্তি সংযমী ।
যস্যাং জাগ্রতি ভূতানি সা নিশা পশ্যতো মুনেঃ ॥69॥
আপূর্যমাণমচলপ্রতিষ্ঠং সমুদ্রমাপঃ প্রবিশন্তি যদ্বত্ ।
তদ্বত্কামা যং প্রবিশন্তি সর্বে স শান্তিমাপ্নোতি ন কামকামী ॥70॥
বিহায কামান্যঃ সর্বান্ পুমাংশ্চরতি নিস্স্পৃহঃ ।
নির্মমো নিরহঙ্কারঃ স শান্তিমধিগচ্ছতি ॥71॥
এষা ব্রাহ্মী স্থিতিঃ পার্থ নৈনাং প্রাপ্য বিমুহ্যতি ।
স্থিত্বাঽস্যামন্তকালেঽপি ব্রহ্মনির্বাণমৃচ্ছতি ॥72॥
॥ ওঁ তত্সদিতি শ্রীমদ্ভগবদ্গীতাসু উপনিষত্সু ব্রহ্মবিদ্যাযাং
যোগশাস্ত্রে শ্রীকৃষ্ণার্জুনসংবাদে সাঙ্খ্যযোগো নাম দ্বিতীযোঽধ্যাযঃ ॥

More Krishna Stotras

मधुराष्टकम्
Madhurashtakam
कृष्णाष्टकम्
Krishna Ashtakam (Vasudevasutam Devam)
दामोदराष्टकम्
Damodarashtakam
गोविन्द दामोदर स्तोत्रम्
Govinda Damodara Stotram
गोपिका गीतम्
Gopika Gitam (Gopi Geet)
सन्तान गोपाल स्तोत्रम्
Santana Gopala Stotram
बालमुकुन्दाष्टकम्
Bala Mukundashtakam
भज गोविन्दम्
Bhaja Govindam
View All Krishna Collection →

Explore More

Krishna CollectionWealthObstaclesHealthProtectionWisdomHome