પાણ્ડવગીતા

પ્રહ્લાદનારદપરાશરપુણ્ડરીક-
વ્યાસામ્બરીષશુકશૌનકભીષ્મકાવ્યાઃ ।
રુક્માઙ્ગદાર્જુનવસિષ્ઠવિભીષણાદ્યા
એતાનહં પરમભાગવતાન્ નમામિ ॥ 1॥

લોમહર્ષણ ઉવાચ।
ધર્મો વિવર્ધતિ યુધિષ્ઠિરકીર્તનેન
પાપં પ્રણશ્યતિ વૃકોદરકીર્તનેન ।
શત્રુર્વિનશ્યતિ ધનઞ્જયકીર્તનેન
માદ્રીસુતૌ કથયતાં ન ભવન્તિ રોગાઃ ॥ 2॥

બ્રહ્મોવાચ ।
યે માનવા વિગતરાગપરા¶જ્ઞા
નારાયણં સુરગુરું સતતં સ્મરન્તિ ।
ધ્યાનેન તેન હતકિલ્બિષ ચેતનાસ્તે
માતુઃ પયોધરરસં ન પુનઃ પિબન્તિ ॥ 3॥

ઇન્દ્ર ઉવાચ।
નારાયણો નામ નરો નરાણાં
પ્રસિદ્ધચૌરઃ કથિતઃ પૃથિવ્યામ્ ।
અનેકજન્માર્જિતપાપસઞ્ચયં
હરત્યશેષં સ્મૃતમાત્ર એવ યઃ ॥ 4॥

યુધિષ્ઠિર ઉવાચ।
મેઘશ્યામં પીતકૌશેયવાસં
શ્રીવત્સાઙ્કં કૌસ્તુભોદ્ભાસિતાઙ્ગમ્ ।
પુણ્યોપેતં પુણ્ડરીકાયતાક્ષં
વિષ્ણું વન્દે સર્વલોકૈકનાથમ્ ॥ 5॥

ભીમ ઉવાચ।
જલૌઘમગ્ના સચરાઽચરા ધરા
વિષાણકોટ્યાઽખિલવિશ્વમૂર્તિના ।
સમુદ્ધૃતા યેન વરાહરૂપિણા
સ મે સ્વયમ્ભૂર્ભગવાન્ પ્રસીદરુ ॥ 6॥

અર્જુન ઉવાચ।
અચિન્ત્યમવ્યક્તમનન્તમવ્યયં
વિભું પ્રભું ભાવિતવિશ્વભાવનમ્ ।
ત્રૈલોક્યવિસ્તારવિચારકારકં
હરિં પ્રપન્નોઽસ્મિ ગતિં મહાત્મનામ્ ॥ 7॥

નકુલ ઉવાચ।
યદિ ગમનમધસ્તાત્ કાલપાશાનુબન્ધાદ્
યદિ ચ કુલવિહીને જાયતે પક્ષિકીટે ।
કૃમિશતમપિ ગત્વા ધ્યાયતે ચાન્તરાત્મા
મમ ભવતુ હૃદિસ્થા કેશવે ભક્તિરેકા ॥ 8॥

સહદેવ ઉવાચ।
તસ્ય યજ્ઞવરાહસ્ય વિષ્ણોરતુલતેજસઃ ।
પ્રણામં યે પ્રકુર્વન્તિ તેષામપિ નમો નમઃ ॥ 9॥

કુન્તી ઉવાચ।
સ્વકર્મફલનિર્દિષ્ટાં યાં યાં યોનિં વ્રજામ્યહમ્ ।
તસ્યાં તસ્યાં હૃષીકેશ ત્વયિ ભક્તિર્દૃઢાઽસ્તુ મે ॥ 10॥

માદ્રી ઉવાચ।
કૃષ્ણે રતાઃ કૃષ્ણમનુસ્મરન્તિ
રાત્રૌ ચ કૃષ્ણં પુનરુત્થિતા યે ।
તે ભિન્નદેહાઃ પ્રવિશન્તિ કૃષ્ણે
હવિર્યથા મન્ત્રહુતં હુતાશે ॥ 11॥

દ્રૌપદી ઉવાચ।
કીટેષુ પક્ષિષુ મૃગેષુ સરીસૃપેષુ
રક્ષઃપિશાચમનુજેષ્વપિ યત્ર યત્ર ।
જાતસ્ય મે ભવતુ કેશવ ત્વત્પ્રસાદાત્
ત્વય્યેવ ભક્તિરચલાઽવ્યભિચારિણી ચ ॥ 12॥

સુભદ્રા ઉવાચ।
એકોઽપિ કૃષ્ણસ્ય કૃતઃ પ્રણામો
દશાશ્વમેધાવભૃથેન તુલ્યઃ ।
દશાશ્વમેધી પુનરેતિ જન્મ
કૃષ્ણપ્રણામી ન પુનર્ભવાય ॥ 13॥

અભિમન્યુરુવાચ ।
ગોવિન્દ ગોવિન્દ હરે મુરારે
ગોવિન્દ ગોવિન્દ મુકુન્દ કૃષ્ણ
ગોવિન્દ ગોવિન્દ રથાઙ્ગપાણે ।
ગોવિન્દ ગોવિન્દ નમામિ નિત્યમ્ ॥ 14॥

ધૃષ્ટદ્યુમ્ન ઉવાચ।
શ્રીરામ નારાયણ વાસુદેવ
ગોવિન્દ વૈકુણ્ઠ મુકુન્દ કૃષ્ણ ।
શ્રીકેશવાનન્ત નૃસિંહ વિષ્ણો
માં ત્રાહિ સંસારભુજઙ્ગદષ્ટમ્ ॥ 15॥

સાત્યકિરુવાચ ।
અપ્રમેય હરે વિષ્ણો કૃષ્ણ દામોદરાઽચ્યુત ।
ગોવિન્દાનન્ત સર્વેશ વાસુદેવ નમોઽસ્તુ તે ॥ 16॥

ઉદ્ધવ ઉવાચ।
વાસુદેવં પરિત્યજ્ય યોઽન્યં દેવમુપાસતે ।
તૃષિતો જાહ્નવીતીરે કૂપં ખનતિ દુર્મતિઃ ॥ 17॥

ધૌમ્ય ઉવાચ।
અપાં સમીપે શયનાસનસ્થિતે
દિવા ચ રાત્રૌ ચ યથાધિગચ્છતા ।
યદ્યસ્તિ કિઞ્ચિત્ સુકૃતં કૃતં મયા
જનાર્દનસ્તેન કૃતેન તુષ્યતુ ॥ 18॥

સઞ્જય ઉવાચ।
આર્તા વિષણ્ણાઃ શિથિલાશ્ચ ભીતા
ઘોરેષુ વ્યાઘ્રાદિષુ વર્તમાનાઃ ।
સઙ્કીર્ત્ય નારાયણશબ્દમાત્રં
વિમુક્તદુઃખાઃ સુખિનો ભવન્તિ ॥ 19॥

અક્રૂર ઉવાચ।
અહં તુ નારાયણદાસદાસ-
દાસસ્ય દાસસ્ય ચ દાસદાસઃ ।
અન્યો ન હીશો જગતો નરાણાં
તસ્માદહં ધન્યતરોઽસ્મિ લોકે ॥ 20॥

વિરાટ ઉવાચ।
વાસુદેવસ્ય યે ભક્તાઃ શાન્તાસ્તદ્ગતચેતસઃ ।
તેષાં દાસસ્ય દાસોઽહં ભવેયં જન્મજન્મનિ ॥ 21॥

ભીષ્મ ઉવાચ।
વિપરીતેષુ કાલેષુ પરિક્ષીણેષુ બન્ધુષુ ।
ત્રાહિ માં કૃપયા કૃષ્ણ શરણાગતવત્સલ ॥ 22॥

દ્રોણ ઉવાચ।
યે યે હતાશ્ચક્રધરેણ દૈત્યાં-
સ્ત્રૈલોક્યનાથેન જનાર્દનેન ।
તે તે ગતા વિષ્ણુપુરીં પ્રયાતાઃ
ક્રોધોઽપિ દેવસ્ય વરેણ તુલ્યઃ ॥ 23॥

કૃપાચાર્ય ઉવાચ।
મજ્જન્મનઃ ફલમિદં મધુકૈટભારે
મત્પ્રાર્થનીય મદનુગ્રહ એષ એવ ।
ત્વદ્ભૃત્યભૃત્યપરિચારકભૃત્યભૃત્ય-
ભૃત્યસ્ય ભૃત્ય ઇતિ માં સ્મર લોકનાથ ॥ 24॥

અશ્વત્થામ ઉવાચ।
ગોવિન્દ કેશવ જનાર્દન વાસુદેવ
વિશ્વેશ વિશ્વ મધુસૂદન વિશ્વરૂપ ।
શ્રીપદ્મનાભ પુરુષોત્તમ દેહિ દાસ્યં
નારાયણાચ્યુત નૃસિંહ નમો નમસ્તે ॥ 25॥

કર્ણ ઉવાચ।
નાન્યં વદામિ ન શ‍ઋણોમિ ન ચિન્તયામિ
નાન્યં સ્મરામિ ન ભજામિ ન ચાશ્રયામિ ।
ભક્ત્યા ત્વદીયચરણામ્બુજમાદરેણ
શ્રીશ્રીનિવાસ પુરુષોત્તમ દેહિ દાસ્યમ્ ॥ 26॥

ધૃતરાષ્ટ્ર ઉવાચ।
નમો નમઃ કારણવામનાય
નારાયણાયામિતવિક્રમાય ।
શ્રીશાર્ઙ્ગચક્રાસિગદાધરાય
નમોઽસ્તુ તસ્મૈ પુરુષોત્તમાય ॥ 27॥

ગાન્ધારી ઉવાચ।
ત્વમેવ માતા ચ પિતા ત્વમેવ
ત્વમેવ બન્ધુશ્ચ સખા ત્વમેવ ।
ત્વમેવ વિદ્યા દ્રવિણં ત્વમેવ
ત્વમેવ સર્વં મમ દેવ દેવ ॥ 28॥

દ્રુપદ ઉવાચ।
યજ્ઞેશાચ્યુત ગોવિન્દ માધવાનન્ત કેશવ ।
કૃષ્ણ વિષ્ણો હૃષીકેશ વાસુદેવ નમોઽસ્તુ તે ॥ 29॥

જયદ્રથ ઉવાચ।
નમઃ કૃષ્ણાય દેવાય બ્રહ્મણેઽનન્તશક્તયે ।
યોગેશ્વરાય યોગાય ત્વામહં શરણં ગતઃ ॥ 30॥

વિકર્ણ ઉવાચ।
કૃષ્ણાય વાસુદેવાય દેવકીનન્દનાય ચ ।
નન્દગોપકુમારાય ગોવિન્દાય નમો નમઃ ॥ 31॥

વિરાટ ઉવાચ।
નમો બ્રહ્મણ્યદેવાય ગોબ્રાહ્મણહિતાય ચ ।
જગદ્ધિતાય કૃષ્ણાય ગોવિન્દાય નમો નમઃ ॥ 32॥

શલ્ય ઉવાચ।
અતસીપુષ્પસઙ્કાશં પીતવાસસમચ્યુતમ્ ।
યે નમસ્યન્તિ ગોવિન્દં તેષાં ન વિદ્યતે ભયમ્ ॥ 33॥

બલભદ્ર ઉવાચ।
કૃષ્ણ કૃષ્ણ કૃપાલો ત્વમગતીનાં ગતિર્ભવ ।
સંસારાર્ણવમગ્નાનાં પ્રસીદ પુરુષોત્તમ ॥ 34॥

શ્રીકૃષ્ણ ઉવાચ।
કૃષ્ણ કૃષ્ણેતિ કૃષ્ણેતિ યો માં સ્મરતિ નિત્યશઃ ।
જલં ભિત્વા યથા પદ્મં નરકાદુદ્ધરામ્યહમ્ ॥ 35॥

શ્રીકૃષ્ણ ઉવાચ।
નિત્યં વદામિ મનુજાઃ સ્વયમૂર્ધ્વબાહુ-
ર્યો માં મુકુન્દ નરસિંહ જનાર્દનેતિ ।
જીવો જપત્યનુદિનં મરણે રણે વા
પાષાણકાષ્ઠસદૃશાય દદામ્યભીષ્ટમ્ ॥ 36॥

ઈશ્વર ઉવાચ।
સકૃન્નારાયણેત્યુક્ત્વા પુમાન્ કલ્પશતત્રયમ્ ।
ગઙ્ગાદિસર્વતીર્થેષુ સ્નાતો ભવતિ પુત્રક ॥ 37॥

સૂત ઉવાચ।
તત્રૈવ ગઙ્ગા યમુના ચ તત્ર
ગોદાવરી સિન્ધુ સરસ્વતી ચ ।
સર્વાણિ તીર્થાનિ વસન્તિ તત્ર
યત્રાચ્યુતોદાર કથાપ્રસઙ્ગઃ ॥ 38॥
યમ ઉવાચ।
નરકે પચ્યમાનં તુ યમેનં પરિભાષિતમ્ ।
કિં ત્વયા નાર્ચિતો દેવઃ કેશવઃ ક્લેશનાશનઃ ॥ 35॥
નારદ ઉવાચ।
જન્માન્તરસહસ્રેણ તપોધ્યાનસમાધિના ।
નરાણાં ક્ષીણપાપાનાં કૃષ્ણે ભક્તિઃ પ્રજાયતે ॥ 40॥
પ્રહ્લાદ ઉવાચ।
નાથ યોનિસહસ્રેષુ યેષુ યેષુ વ્રજામ્યહમ્ ।
તેષુ તેષ્વચલા ભક્તિરચ્યુતાઽસ્તુ સદા ત્વયિ ॥ 41॥
યા પ્રીતિરવિવેકનાં વિષયેષ્વનપાયિનિ ।
ત્વામનુસ્મરતઃ સા મે હૃદયાન્માઽપસર્પતુ ॥ 42॥
વિશ્વામિત્ર ઉવાચ।
કિં તસ્ય દાનૈઃ કિં તીર્થૈઃ કિં તપોભિઃ કિમધ્વરૈઃ ।
યો નિત્યં ધ્યાયતે દેવં નારાયણમનન્યધીઃ ॥ 43॥
જમદગ્નિરુવાચ ।
નિત્યોત્સવો ભવેત્તેષાં નિત્યં નિત્યં ચ મઙ્ગલમ્ ।
યેષાં હૃદિસ્થો ભગવાન્મઙ્ગલાયતનં હરિઃ ॥ 44॥
ભરદ્વાજ ઉવાચ।
લાભસ્તેષાં જયસ્તેષાં કુતસ્તેષાં પરાજયઃ ।
યેષામિન્દીશ્વરશ્યામો હૃદયસ્થો જનાર્દનઃ ॥ 45॥
ગૌતમ ઉવાચ।
ગોકોટિદાનં ગ્રહણેષુ કાશી-
પ્રયાગગઙ્ગાયુતકલ્પવાસઃ ।
યજ્ઞાયુતં મેરુસુવર્ણદાનં
ગોવિન્દનામસ્મરણેન તુલ્યમ્ ॥ 46॥
અગ્નિરુવાચ ।
ગોવિન્દેતિ સદા સ્નાનં ગોવિન્દેતિ સદા જપઃ ।
ગોવિન્દેતિ સદા ધ્યાનં સદા ગોવિન્દકીર્તનમ્ ॥ 47॥
ત્ર્યક્ષરં પરમં બ્રહ્મ ગોવિન્દ ત્ર્યક્ષરં પરમ્ ।
તસ્માદુચ્ચારિતં યેન બ્રહ્મભૂયાય કલ્પતે ॥ 48॥
વેદવ્યાસ ઉવાચ।
અચ્યુતઃ કલ્પવૃક્ષોઽસાવનન્તઃ કામધેનુ વૈ ।
ચિન્તામણિસ્તુ ગોવિન્દો હરેર્નામ વિચિન્તયેત્ ॥ 49॥
ઇન્દ્ર ઉવાચ।
જયતુ જયતુ દેવો દેવકીનન્દનોઽયં
જયતુ જયતુ કૃષ્ણો વૃષ્ણિવંશપ્રદીપઃ ।
જયતુ જયતુ મેઘશ્યામલઃ કોમલાઙ્ગો
જયતુ જયતુ પૃથ્વીભારનાશો મુકુન્દઃ ॥ 50॥
પિપ્પલાયન ઉવાચ।
શ્રીમન્નૃસિંહવિભવે ગરુડધ્વજાય
તાપત્રયોપશમનાય ભવૌષધાય ।
કૃષ્ણાય વૃશ્ચિકજલાગ્નિભુજઙ્ગરોગ-
ક્લેશવ્યયાય હરયે ગુરવે નમસ્તે ॥ 51॥
આવિર્હોત્ર ઉવાચ।
કૃષ્ણ ત્વદીયપદપઙ્કજપઞ્જરાન્તે
અદ્યૈવ મે વિશતુ માનસરાજહંસઃ ।
પ્રાણપ્રયાણસમયે કફવાતપિત્તૈઃ
કણ્ઠાવરોધનવિધૌ સ્મરણં કુતસ્તે ॥ 52॥
વિદુર ઉવાચ।
હરેર્નામૈવ નામૈવ નામૈવ મમ જીવનમ્ ।
કલૌ નાસ્ત્યેવ નાસ્ત્યેવ નાસ્ત્યેવ ગતિરન્યથા ॥ 53॥
વસિષ્ઠ ઉવાચ।
કૃષ્ણેતિ મઙ્ગલં નામ યસ્ય વાચિ પ્રવર્તતે ।
ભસ્મીભવન્તિ તસ્યાશુ મહાપાતકકોટયઃ ॥ 54॥
અરુન્ધત્યુવાચ।
કૃષ્ણાય વાસુદેવાય હરયે પરમાત્મને ।
પ્રણતક્લેશનાશાય ગોવિન્દાય નમો નમઃ ॥ 55॥
કશ્યપ ઉવાચ।
કૃષ્ણાનુસ્મરણાદેવ પાપસઙ્ઘટ્ટપઞ્જરમ્ ।
શતધા ભેદમાપ્નોતિ ગિરિર્વજ્રહતો યથા ॥ 56॥
દુર્યોધન ઉવાચ।
જાનામિ ધર્મં ન ચ મે પ્રવૃત્તિ-
ર્જાનામિ પાપં ન ચ મે નિવૃત્તિઃ ।
કેનાપિ દેવેન હૃદિ સ્થિતેન
યથા નિયુક્તોઽસ્મિ તથા કરોમિ ॥ 57॥
યન્ત્રસ્ય મમ દોષેણ ક્ષમ્યતાં મધુસૂદન ।
અહં યન્ત્રં ભવાન્ યન્ત્રી મમ દોષો ન દીયતામ્ ॥ 58॥
ભૃગુરુવાચ ।
નામૈવ તવ ગોવિન્દ નામ ત્વત્તઃ શતાધિકમ્ ।
દદાત્ત્યુચ્ચારણાન્મુક્તિઃ ભવાનષ્ટાઙ્ગયોગતઃ ॥ 59॥
લોમશ ઉવાચ।
નમામિ નારાયણ પાદપઙ્કજં
કરોમિ નારાયણપૂજનં સદા ।
વદામિ નારાયણનામ નિર્મલં
સ્મરામિ નારાયણતત્ત્વમવ્યયમ્ ॥ 60॥
શૌનક ઉવાચ।
સ્મૃતેઃ સકલકલ્યાણં ભજનં યસ્ય જાયતે ।
પુરુષં તમજં નિત્યં વ્રજામિ શરણં હરિમ્ ॥ 61॥
ગર્ગ ઉવાચ।
નારાયણેતિ મન્ત્રોઽસ્તિ વાગસ્તિ વશવર્તિની ।
તથાપિ નરકે ઘોરે પતન્તીત્યદ્ભુતં મહત્ ॥ 62॥
દાલ્ભ્ય ઉવાચ।
કિં તસ્ય બહુભિર્મન્ત્રૈર્ભક્તિર્યસ્ય જનાર્દને ।
નમો નારાયણાયેતિ મન્ત્રઃ સર્વાર્થસાધાકે ॥ 63॥
વૈશમ્પાયન ઉવાચ।
યત્ર યોગેશ્વરઃ કૃષ્ણો યત્ર પાર્થો ધનુર્ધરઃ ।
તત્ર શ્રીર્વિજયો ભૂતિર્ધ્રુવા નીતિર્મતિર્મમ ॥ 64॥
અગ્નિરુવાચ ।
હરિર્હરતિ પાપાનિ દુષ્ટચિત્તૈરપિ સ્મૃતઃ ।
અનિચ્છયાપિ સંસ્પૃષ્ટો દહત્યેવ હિ પાવકઃ ॥ 65॥
પરમેશ્વર ઉવાચ।
સકૃદુચ્ચરિતં યેન હરિરિત્યક્ષરદ્વયમ્ ।
લબ્ધઃ પરિકરસ્તેન મોક્ષાય ગમનં પ્રતિ ॥ 66॥
પુલસ્ત્ય ઉવાચ।
હે જિહ્વે રસસારજ્ઞે સર્વદા મધુરપ્રિયે ।
નારાયણાખ્યપીયૂષં પિબ જિહ્વે નિરન્તરમ્ ॥ 67॥
વ્યાસ ઉવાચ।
સત્યં સત્યં પુનઃ સત્યં સત્યં સત્યં વદામ્યહમ્ ।
નાસ્તિ વેદાત્પરં શાસ્ત્રં ન દેવઃ કેશવાત્પરઃ ॥ 68॥
ધન્વન્તરિરુવાચ ।
અચ્યુતાનન્ત ગોવિન્દ નામોચ્ચારણભેષજાત્ ।
નશ્યન્તિ સકલા રોગાઃ સત્યં સત્યં વદામ્યહમ્ ॥ 69॥
માર્કણ્ડેય ઉવાચ।
સ્વર્ગદં મોક્ષદં દેવં સુખદં જગતો ગુરુમ્ ।
કથં મુહુર્તમપિ તં વાસુદેવં ન ચિન્તયેત્ ॥ 70॥
અગસ્ત્ય ઉવાચ।
નિમિષં નિમિષાર્ધં વા પ્રાણિનાં વિષ્ણુચિન્તનમ્ ।
તત્ર તત્ર કુરુક્ષેત્રં પ્રયાગો નૈમિષં વરમ્ ॥ 71॥
વામદેવ ઉવાચ।
નિમિષં નિમિષાર્ધં વા પ્રાણિનાં વિષ્ણુચિન્તનમ્ ।
કલ્પકોટિસહસ્રાણિ લભતે વાઞ્છિતં ફલમ્ ॥ 72॥
શુક ઉવાચ।
આલોડ્ય સર્વશાસ્ત્રાણિ વિચાર્ય ચ પુનઃ પુનઃ ।
ઇદમેકં સુનિષ્પન્નં ધ્યેયો નારાયણઃ સદા ॥ 73॥
શ્રીમહાદેવ ઉવાચ।
શરીરે જર્જરીભૂતે વ્યાધિગ્રસ્તે કલેવરે ।
ઔષધં જાહ્નવીતોયં વૈદ્યો નારાયણો હરિઃ ॥ 74॥
શૌનક ઉવાચ।
ભોજનાચ્છાદને ચિન્તાં વૃથા કુર્વન્તિ વૈષ્ણવાઃ ।
યોઽસૌ વિશ્વમ્ભરો દેવઃ સ કિં ભક્તાનુપેક્ષતે ॥ 75॥
સનત્કુમાર ઉવાચ।
યસ્ય હસ્તે ગદા ચક્રં ગરુડો યસ્ય વાહનમ્ ।
શઙ્ખચક્રગદાપદ્મી સ મે વિષ્ણુઃ પ્રસીદતુ ॥ 76॥
એવં બ્રહ્માદયો દેવા ઋષયશ્ચ તપોધનાઃ ।
કીર્તયન્તિ સુરશ્રેષ્ઠમેવં નારાયણં વિભુમ્ ॥ 77॥
ઇદં પવિત્રમાયુષ્યં પુણ્યં પાપપ્રણાશનમ્ ।
દુઃસ્વપ્નનાશનં સ્તોત્રં પાણ્ડવૈઃ પરિકીર્તિતમ્ ॥ 78॥
યઃ પઠેત્પ્રાતરુત્થાય શુચિસ્તદ્ગતમાનસઃ ।
ગવાં શતસહસ્રસ્ય સમ્યગ્દત્તસ્ય યત્ફલમ્ ॥ 79॥
તત્ફલં સમવાપ્નોતિ યઃ પઠેદિતિ સંસ્તવમ્ ।
સર્વપાપવિનિર્મુક્તો વિષ્ણુલોકં સ ગચ્છતિ ॥ 80॥
ગઙ્ગા ગીતા ચ ગાયત્રી ગોવિન્દો ગરુડધ્વજઃ ।
ગકારૈઃ પઞ્ચભિર્યુક્તઃ પુનર્જન્મ ન વિદ્યતે ॥ 81॥
ગીતાં યઃ પઠતે નિત્યં શ્લોકાર્ધં શ્લોકમેવ વા ।
મુચ્યતે સર્વપાપેભ્યો વિષ્ણુલોકં સ ગચ્છતિ ॥ 82॥