ગીતગોવિન્દં અષ્ટમઃ સર્ગઃ - વિલક્ષ્ય લક્ષ્મીપતિઃ

॥ વિલક્ષ્યલક્ષ્મીપતિઃ ॥
અથ કથમપિ યામિનીં વિનીય સ્મરશરજર્જરિતાપિ સા પ્રભાતે ।
અનુનયવચનં વદન્તમગ્રે પ્રણતમપિ પ્રિયમાહ સાભ્યસૂયમ્ ॥ 49 ॥

॥ ગીતં 17 ॥
રજનિજનિતગુરુજાગરરાગકષાયિતમલસનિવેશમ્ ।
વહતિ નયનમનુરાગમિવ સ્ફુટમુદિતરસાભિનિવેશમ્ ॥
હરિહરિ યાહિ માધવ યાહિ કેશવ મા વદ કૈતવવાદં તામનુસર સરસીરુહલોચન યા તવ હરતિ વિષાદમ્ ॥ 50 ॥
કજ્જલમલિનવિલોચનચુમ્બનવિરચિતનીલિમરૂપમ્ ।
દશનવસનમરુણં તવ કૃષ્ણ તનોતિ તનોરનુરૂપમ્ ॥ 2 ॥
વપુરનુહરતિ તવ સ્મરસઙ્ગરખરનખરક્ષતરેખમ્ ।
મરકતશકલકલિતકલધૌતલિપિરેવ રતિજયલેખમ્ ॥ 3 ॥
ચરણકમલગલદલક્તકસિક્તમિદં તવ હૃદયમુદારમ્ ।
દર્શયતીવ બહિર્મદનદ્રુમનવકિસલયપરિવારમ્ ॥ 4 ॥
દશનપદં ભવદધરગતં મમ જનયતિ ચેતસિ ખેદમ્ ।
કથયતિ કથમધુનાપિ મયા સહ તવ વપુરેતદભેદમ્ ॥ 5 ॥
બહિરિવ મલિનતરં તવ કૃષ્ણ મનોઽપિ ભવિષ્યતિ નૂનમ્ ।
કથમથ વઞ્ચયસે જનમનુગતમસમશરજ્વરદૂનમ્ ॥ 6 ॥
ભ્રમતિ ભવાનબલાકવલાય વનેષુ કિમત્ર વિચિત્રમ્ ।
પ્રથયતિ પૂતનિકૈવ વધૂવધનિર્દયબાલચરિત્રમ્ ॥ 7 ॥
શ્રીજયદેવભણિતરતિવઞ્ચિતખણ્ડિતયુવતિવિલાપમ્ ।
શૃણુત સુધામધુરં વિબુધા વિબુધાલયતોઽપિ દુરાપમ્ ॥ 8 ॥
તદેવં પશ્યન્ત્યાઃ પ્રસરદનુરાગં બહિરિવ પ્રિયાપાદાલક્તચ્છુરિતમરુણચ્છાયહૃદયમ્ ।
મમાદ્ય પ્રખ્યાતપ્રણયભરભઙ્ગેન કિતવ ત્વદાલોકઃ શોકાદપિ કિમપિ લજ્જાં જનયતિ ॥ 50 ॥