અષ્ટાવક્ર ગીતા એકાદશોઽધ્યાયઃ

ભાવાભાવવિકારશ્ચ સ્વભાવાદિતિ નિશ્ચયી ।

નિર્વિકારો ગતક્લેશઃ સુખેનૈવોપશામ્યતિ ॥ 11-1॥
ઈશ્વરઃ સર્વનિર્માતા નેહાન્ય ઇતિ નિશ્ચયી ।

અન્તર્ગલિતસર્વાશઃ શાન્તઃ ક્વાપિ ન સજ્જતે ॥ 11-2॥
આપદઃ સમ્પદઃ કાલે દૈવાદેવેતિ નિશ્ચયી ।

તૃપ્તઃ સ્વસ્થેન્દ્રિયો નિત્યં ન વાઞ્છતિ ન શોચતિ ॥ 11-3॥
સુખદુઃખે જન્મમૃત્યૂ દૈવાદેવેતિ નિશ્ચયી ।

સાધ્યાદર્શી નિરાયાસઃ કુર્વન્નપિ ન લિપ્યતે ॥ 11-4॥
ચિન્તયા જાયતે દુઃખં નાન્યથેહેતિ નિશ્ચયી ।

તયા હીનઃ સુખી શાન્તઃ સર્વત્ર ગલિતસ્પૃહઃ ॥ 11-5॥
નાહં દેહો ન મે દેહો બોધોઽહમિતિ નિશ્ચયી ।

કૈવલ્યમિવ સમ્પ્રાપ્તો ન સ્મરત્યકૃતં કૃતમ્ ॥ 11-6॥
આબ્રહ્મસ્તમ્બપર્યન્તમહમેવેતિ નિશ્ચયી ।

નિર્વિકલ્પઃ શુચિઃ શાન્તઃ પ્રાપ્તાપ્રાપ્તવિનિર્વૃતઃ ॥ 11-7॥
નાનાશ્ચર્યમિદં વિશ્વં ન કિઞ્ચિદિતિ નિશ્ચયી ।

નિર્વાસનઃ સ્ફૂર્તિમાત્રો ન કિઞ્ચિદિવ શામ્યતિ ॥ 11-8॥