ଅଷ୍ଟାଵକ୍ର ଗୀତା ଏକାଦଶୋଽଧ୍ଯାଯଃ

ଭାଵାଭାଵଵିକାରଶ୍ଚ ସ୍ଵଭାଵାଦିତି ନିଶ୍ଚଯୀ ।

ନିର୍ଵିକାରୋ ଗତକ୍ଲେଶଃ ସୁଖେନୈଵୋପଶାମ୍ଯତି ॥ 11-1॥
ଈଶ୍ଵରଃ ସର୍ଵନିର୍ମାତା ନେହାନ୍ଯ ଇତି ନିଶ୍ଚଯୀ ।

ଅନ୍ତର୍ଗଲିତସର୍ଵାଶଃ ଶାନ୍ତଃ କ୍ଵାପି ନ ସଜ୍ଜତେ ॥ 11-2॥
ଆପଦଃ ସମ୍ପଦଃ କାଲେ ଦୈଵାଦେଵେତି ନିଶ୍ଚଯୀ ।

ତୃପ୍ତଃ ସ୍ଵସ୍ଥେନ୍ଦ୍ରିଯୋ ନିତ୍ଯଂ ନ ଵାଞ୍ଛତି ନ ଶୋଚତି ॥ 11-3॥
ସୁଖଦୁଃଖେ ଜନ୍ମମୃତ୍ଯୂ ଦୈଵାଦେଵେତି ନିଶ୍ଚଯୀ ।

ସାଧ୍ଯାଦର୍ଶୀ ନିରାଯାସଃ କୁର୍ଵନ୍ନପି ନ ଲିପ୍ଯତେ ॥ 11-4॥
ଚିନ୍ତଯା ଜାଯତେ ଦୁଃଖଂ ନାନ୍ଯଥେହେତି ନିଶ୍ଚଯୀ ।

ତଯା ହୀନଃ ସୁଖୀ ଶାନ୍ତଃ ସର୍ଵତ୍ର ଗଲିତସ୍ପୃହଃ ॥ 11-5॥
ନାହଂ ଦେହୋ ନ ମେ ଦେହୋ ବୋଧୋଽହମିତି ନିଶ୍ଚଯୀ ।

କୈଵଲ୍ଯମିଵ ସମ୍ପ୍ରାପ୍ତୋ ନ ସ୍ମରତ୍ଯକୃତଂ କୃତମ୍ ॥ 11-6॥
ଆବ୍ରହ୍ମସ୍ତମ୍ବପର୍ଯନ୍ତମହମେଵେତି ନିଶ୍ଚଯୀ ।

ନିର୍ଵିକଲ୍ପଃ ଶୁଚିଃ ଶାନ୍ତଃ ପ୍ରାପ୍ତାପ୍ରାପ୍ତଵିନିର୍ଵୃତଃ ॥ 11-7॥
ନାନାଶ୍ଚର୍ଯମିଦଂ ଵିଶ୍ଵଂ ନ କିଞ୍ଚିଦିତି ନିଶ୍ଚଯୀ ।

ନିର୍ଵାସନଃ ସ୍ଫୂର୍ତିମାତ୍ରୋ ନ କିଞ୍ଚିଦିଵ ଶାମ୍ଯତି ॥ 11-8॥