അഷ്ടാവക്ര ഗീതാ ഏകാദശോഽധ്യായഃ

ഭാവാഭാവവികാരശ്ച സ്വഭാവാദിതി നിശ്ചയീ ।

നിര്വികാരോ ഗതക്ലേശഃ സുഖേനൈവോപശാമ്യതി ॥ 11-1॥
ഈശ്വരഃ സര്വനിര്മാതാ നേഹാന്യ ഇതി നിശ്ചയീ ।

അന്തര്ഗലിതസര്വാശഃ ശാന്തഃ ക്വാപി ന സജ്ജതേ ॥ 11-2॥
ആപദഃ സമ്പദഃ കാലേ ദൈവാദേവേതി നിശ്ചയീ ।

തൃപ്തഃ സ്വസ്ഥേന്ദ്രിയോ നിത്യം ന വാഞ്ഛതി ന ശോചതി ॥ 11-3॥
സുഖദുഃഖേ ജന്മമൃത്യൂ ദൈവാദേവേതി നിശ്ചയീ ।

സാധ്യാദര്ശീ നിരായാസഃ കുര്വന്നപി ന ലിപ്യതേ ॥ 11-4॥
ചിന്തയാ ജായതേ ദുഃഖം നാന്യഥേഹേതി നിശ്ചയീ ।

തയാ ഹീനഃ സുഖീ ശാന്തഃ സര്വത്ര ഗലിതസ്പൃഹഃ ॥ 11-5॥
നാഹം ദേഹോ ന മേ ദേഹോ ബോധോഽഹമിതി നിശ്ചയീ ।

കൈവല്യമിവ സമ്പ്രാപ്തോ ന സ്മരത്യകൃതം കൃതമ് ॥ 11-6॥
ആബ്രഹ്മസ്തമ്ബപര്യന്തമഹമേവേതി നിശ്ചയീ ।

നിര്വികല്പഃ ശുചിഃ ശാന്തഃ പ്രാപ്താപ്രാപ്തവിനിര്വൃതഃ ॥ 11-7॥
നാനാശ്ചര്യമിദം വിശ്വം ന കിഞ്ചിദിതി നിശ്ചയീ ।

നിര്വാസനഃ സ്ഫൂര്തിമാത്രോ ന കിഞ്ചിദിവ ശാമ്യതി ॥ 11-8॥