অষ্টাবক্র গীতা দশমোঽধ্যাযঃ

বিহায বৈরিণং কামমর্থং চানর্থসঙ্কুলম্ ।

ধর্মমপ্যেতযোর্হেতুং সর্বত্রানাদরং কুরু ॥ 10-1॥
স্বপ্নেন্দ্রজালবত্ পশ্য দিনানি ত্রীণি পঞ্চ বা ।

মিত্রক্ষেত্রধনাগারদারদাযাদিসম্পদঃ ॥ 10-2॥
যত্র যত্র ভবেত্তৃষ্ণা সংসারং বিদ্ধি তত্র বৈ ।

প্রৌঢবৈরাগ্যমাশ্রিত্য বীততৃষ্ণঃ সুখী ভব ॥ 10-3॥
তৃষ্ণামাত্রাত্মকো বন্ধস্তন্নাশো মোক্ষ উচ্যতে ।

ভবাসংসক্তিমাত্রেণ প্রাপ্তিতুষ্টির্মুহুর্মুহুঃ ॥ 10-4॥
ত্বমেকশ্চেতনঃ শুদ্ধো জডং বিশ্বমসত্তথা ।

অবিদ্যাপি ন কিঞ্চিত্সা কা বুভুত্সা তথাপি তে ॥ 10-5॥
রাজ্যং সুতাঃ কলত্রাণি শরীরাণি সুখানি চ ।

সংসক্তস্যাপি নষ্টানি তব জন্মনি জন্মনি ॥ 10-6॥
অলমর্থেন কামেন সুকৃতেনাপি কর্মণা ।

এভ্যঃ সংসারকান্তারে ন বিশ্রান্তমভূন্ মনঃ ॥ 10-7॥
কৃতং ন কতি জন্মানি কাযেন মনসা গিরা ।

দুঃখমাযাসদং কর্ম তদদ্যাপ্যুপরম্যতাম্ ॥ 10-8॥