ଅଷ୍ଟାଵକ୍ର ଗୀତା ଚତୁର୍ଦଶୋଽଧ୍ଯାଯଃ

ପ୍ରକୃତ୍ଯା ଶୂନ୍ଯଚିତ୍ତୋ ଯଃ ପ୍ରମାଦାଦ୍ ଭାଵଭାଵନଃ ।

ନିଦ୍ରିତୋ ବୋଧିତ ଇଵ କ୍ଷୀଣସଂସ୍ମରଣୋ ହି ସଃ ॥ 14-1॥
କ୍ଵ ଧନାନି କ୍ଵ ମିତ୍ରାଣି କ୍ଵ ମେ ଵିଷଯଦସ୍ଯଵଃ ।

କ୍ଵ ଶାସ୍ତ୍ରଂ କ୍ଵ ଚ ଵିଜ୍ଞାନଂ ଯଦା ମେ ଗଲିତା ସ୍ପୃହା ॥ 14-2॥
ଵିଜ୍ଞାତେ ସାକ୍ଷିପୁରୁଷେ ପରମାତ୍ମନି ଚେଶ୍ଵରେ ।

ନୈରାଶ୍ଯେ ବନ୍ଧମୋକ୍ଷେ ଚ ନ ଚିନ୍ତା ମୁକ୍ତଯେ ମମ ॥ 14-3॥
ଅନ୍ତର୍ଵିକଲ୍ପଶୂନ୍ଯସ୍ଯ ବହିଃ ସ୍ଵଚ୍ଛନ୍ଦଚାରିଣଃ ।

ଭ୍ରାନ୍ତସ୍ଯେଵ ଦଶାସ୍ତାସ୍ତାସ୍ତାଦୃଶା ଏଵ ଜାନତେ ॥ 14-4॥