ଅଷ୍ଟାଵକ୍ର ଗୀତା ନଵମୋଽଧ୍ଯାଯଃ

କୃତାକୃତେ ଚ ଦ୍ଵନ୍ଦ୍ଵାନି କଦା ଶାନ୍ତାନି କସ୍ଯ ଵା ।

ଏଵଂ ଜ୍ଞାତ୍ଵେହ ନିର୍ଵେଦାଦ୍ ଭଵ ତ୍ଯାଗପରୋଽଵ୍ରତୀ ॥ 9-1॥
କସ୍ଯାପି ତାତ ଧନ୍ଯସ୍ଯ ଲୋକଚେଷ୍ଟାଵଲୋକନାତ୍ ।

ଜୀଵିତେଚ୍ଛା ବୁଭୁକ୍ଷା ଚ ବୁଭୁତ୍ସୋପଶମଂ ଗତାଃ ॥ 9-2॥
ଅନିତ୍ଯଂ ସର୍ଵମେଵେଦଂ ତାପତ୍ରିତଯଦୂଷିତମ୍ ।

ଅସାରଂ ନିନ୍ଦିତଂ ହେଯମିତି ନିଶ୍ଚିତ୍ଯ ଶାମ୍ଯତି ॥ 9-3॥
କୋଽସୌ କାଲୋ ଵଯଃ କିଂ ଵା ଯତ୍ର ଦ୍ଵନ୍ଦ୍ଵାନି ନୋ ନୃଣାମ୍ ।

ତାନ୍ଯୁପେକ୍ଷ୍ଯ ଯଥାପ୍ରାପ୍ତଵର୍ତୀ ସିଦ୍ଧିମଵାପ୍ନୁଯାତ୍ ॥ 9-4॥
ନାନା ମତଂ ମହର୍ଷୀଣାଂ ସାଧୂନାଂ ଯୋଗିନାଂ ତଥା ।

ଦୃଷ୍ଟ୍ଵା ନିର୍ଵେଦମାପନ୍ନଃ କୋ ନ ଶାମ୍ଯତି ମାନଵଃ ॥ 9-5॥
କୃତ୍ଵା ମୂର୍ତିପରିଜ୍ଞାନଂ ଚୈତନ୍ଯସ୍ଯ ନ କିଂ ଗୁରୁଃ ।

ନିର୍ଵେଦସମତାଯୁକ୍ତ୍ଯା ଯସ୍ତାରଯତି ସଂସୃତେଃ ॥ 9-6॥
ପଶ୍ଯ ଭୂତଵିକାରାଂସ୍ତ୍ଵଂ ଭୂତମାତ୍ରାନ୍ ଯଥାର୍ଥତଃ ।

ତତ୍କ୍ଷଣାଦ୍ ବନ୍ଧନିର୍ମୁକ୍ତଃ ସ୍ଵରୂପସ୍ଥୋ ଭଵିଷ୍ଯସି ॥ 9-7॥
ଵାସନା ଏଵ ସଂସାର ଇତି ସର୍ଵା ଵିମୁଞ୍ଚ ତାଃ ।

ତତ୍ତ୍ଯାଗୋ ଵାସନାତ୍ଯାଗାତ୍ସ୍ଥିତିରଦ୍ଯ ଯଥା ତଥା ॥ 9-8॥