What is Mooka Panchashati - Mandasmita Shatakam?

Read Mooka Panchashati - Mandasmita Shatakam in Assamese script — full lyrics with English meaning and transliteration. Mandasmita Shatakam is the fifth and final century of verses within the Mooka Panchashati, a masterpiece of devotional poetry composed by the mute poet Mooka Kavi. Dedicated to Goddess Kamakshi of Kanchipuram, this work focuses exclusively on the divine, transcendent smile of the Devi. The verses employ sophisticated Sanskrit alamkaras to depict the beauty and grace of the Mother's radiance. Devotees chant these verses to attain spiritual clarity, mental peace, and the grace of the Goddess, believing that contemplating the smile of Kamakshi dissolves the sorrows of mundane existence and bestows supreme wisdom and bliss.

Which deity is Mooka Panchashati - Mandasmita Shatakam dedicated to?

Mooka Panchashati - Mandasmita Shatakam is a Sanskrit hymn dedicated to Goddess Kamakshi.

Who composed Mooka Panchashati - Mandasmita Shatakam?

Mooka Panchashati - Mandasmita Shatakam is traditionally attributed to Mooka Kavi.

Mooka Panchashati - Mandasmita Shatakam in Assamese

বধ্নীমো ৱযমঞ্জলিং প্ৰতিদিনং বন্ধচ্ছিদে দেহিনাং
কন্দৰ্পাগমতন্ত্ৰমূলগুৰৱে কল্যাণকেলীভুৱে ।
কামাক্ষ্যা ঘনসাৰপুঞ্জৰজসে কামদ্ৰুহশ্চক্ষুষাং
মন্দাৰস্তবকপ্ৰভামদমুষে মন্দস্মিতজ্যোতিষে ॥1॥

সধ্ৰীচে নৱমল্লিকাসুমনসাং নাসাগ্ৰমুক্তামণে-
ৰাচাৰ্যায মৃণালকাণ্ডমহসাং নৈসৰ্গিকায দ্ৱিষে ।
স্ৱৰ্ধুন্যা সহ যুধ্ৱেন হিমৰুচেৰৰ্ধাসনাধ্যাসিনে
কামাক্ষ্যাঃ স্মিতমঞ্জৰীধৱলিমাদ্ৱৈতায তস্মৈ নমঃ ॥2॥

কৰ্পূৰদ্যুতিচাতুৰীমতিতৰামল্পীযসীং কুৰ্ৱতী
দৌৰ্ভাগ্যোদযমেৱ সংৱিদধতী দৌষাকৰীণাং ত্ৱিষাম্ ।
ক্ষুল্লানেৱ মনোজ্ঞমল্লিনিকৰান্ফুল্লানপি ৱ্যঞ্জতী
কামাক্ষ্যা মৃদুলস্মিতাংশুলহৰী কামপ্ৰসূৰস্তু মে ॥3॥

যা পীনস্তনমণ্ডলোপৰি লসত্কৰ্পূৰলেপাযতে
যা নীলেক্ষণৰাত্ৰিকান্তিততিষু জ্যোত্স্নাপ্ৰৰোহাযতে ।
যা সৌন্দৰ্যধুনীতৰঙ্গততিষু ৱ্যালোলহংসাযতে
কামাক্ষ্যাঃ শিশিৰীকৰোতু হৃদযং সা মে স্মিতপ্ৰাচুৰী ॥4॥

যেষাং গচ্ছতি পূৰ্ৱপক্ষসৰণিং কৌমুদ্ৱতঃ শ্ৱেতিমা
যেষাং সন্ততমাৰুৰুক্ষতি তুলাকক্ষ্যাং শৰচ্চন্দ্ৰমাঃ ।
যেষামিচ্ছতি কম্বুৰপ্যসুলভামন্তেৱসত্প্ৰক্ৰিযাং
কামাক্ষ্যা মমতাং হৰন্তু মম তে হাসত্ৱিষামঙ্কুৰাঃ ॥5॥

আশাসীমসু সন্ততং ৱিদধতী নৈশাকৰীং ৱ্যাক্ৰিযাং
কাশানামভিমানভঙ্গকলনাকৌশল্যমাবিভ্ৰতী ।
ঈশানেন ৱিলোকিতা সকুতুকং কামাক্ষি তে কল্মষ-
ক্লেশাপাযকৰী চকাস্তি লহৰী মন্দস্মিতজ্যোতিষাম্ ॥6॥

আৰূঢস্য সমুন্নতস্তনতটীসাম্ৰাজ্যসিংহাসনং
কন্দৰ্পস্য ৱিভোৰ্জগত্ত্ৰযপ্ৰাকট্যমুদ্ৰানিধেঃ ।
যস্যাশ্চামৰচাতুৰীং কলযতে ৰশ্মিচ্ছটা চঞ্চলা
সা মন্দস্মিতমঞ্জৰী ভৱতু নঃ কামায কামাক্ষি তে ॥7॥

শম্ভোৰ্যা পৰিৰম্ভসম্ভ্ৰমৱিধৌ নৈৰ্মল্যসীমানিধিঃ
গৈৰ্ৱাণীৱ তৰঙ্গিণী কৃতমৃদুস্যন্দাং কলিন্দাত্মজাম্ ।
কল্মাষীকুৰুতে কলঙ্কসুষমাং কণ্ঠস্থলীচুম্বিনীং
কামাক্ষ্যাঃ স্মিতকন্দলী ভৱতু নঃ কল্যাণসন্দোহিনী ॥8॥

জেতুং হাৰলতামিৱ স্তনতটীং সঞ্জগ্মুষী সন্ততং
গন্তুং নিৰ্মলতামিৱ দ্ৱিগুণিতাং মগ্না কৃপাস্ত্ৰোতসি ।
লব্ধুং ৱিস্মযনীযতামিৱ হৰং ৰাগাকুলং কুৰ্ৱতী
মঞ্জুস্তে স্মিতমঞ্জৰী ভৱভযং মথ্নাতু কামাক্ষি মে ॥9॥

শ্ৱেতাপি প্ৰকটং নিশাকৰৰুচাং মালিন্যমাতন্ৱতী
শীতাপি স্মৰপাৱকং পশুপতেঃ সন্ধুক্ষযন্তী সদা ।
স্ৱাভাৱ্যাদধৰাশ্ৰিতাপি নমতামুচ্চৈৰ্দিশন্তী গতিং
কামাক্ষি স্ফুটমন্তৰা স্ফুৰতু নস্ত্ৱন্মন্দহাসপ্ৰভা ॥10॥

ৱক্ত্ৰশ্ৰীসৰসীজলে তৰলিতভ্ৰূৱল্লিকল্লোলিতে
কালিম্না দধতী কটাক্ষজনুষা মাধুৱ্ৰতীং ৱ্যাপৃতিম্ ।
নিৰ্নিদ্ৰামলপুণ্ডৰীককুহনাপাণ্ডিত্যমাবিভ্ৰতী
কামাক্ষ্যাঃ স্মিতচাতুৰী মম মনঃ কাতৰ্যমুন্মূলযেত্ ॥11॥

নিত্যং বাধিতবন্ধুজীৱমধৰং মৈত্ৰীজুষং পল্লৱৈঃ
শুদ্ধস্য দ্ৱিজমণ্ডলস্য চ তিৰস্কৰ্তাৰমপ্যাশ্ৰিতা ।
যা ৱৈমল্যৱতী সদৈৱ নমতাং চেতঃ পুনীতেতৰাং
কামাক্ষ্যা হৃদযং প্ৰসাদযতু মে সা মন্দহাসপ্ৰভা ॥12॥

দ্ৰুহ্যন্তী তমসে মুহুঃ কুমুদিনীসাহায্যমাবিভ্ৰতী
যান্তী চন্দ্ৰকিশোৰশেখৰৱপুঃসৌধাঙ্গণে প্ৰেঙ্খণম্ ।
জ্ঞানাম্ভোনিধিৱীচিকাং সুমনসাং কূলঙ্কষাং কুৰ্ৱতী
কামাক্ষ্যাঃ স্মিতকৌমুদী হৰতু মে সংসাৰতাপোদযম্ ॥13॥

কাশ্মীৰদ্ৰৱধাতুকৰ্দমৰুচা কল্মাষতাং বিভ্ৰতী
হংসৌধৈৰিৱ কুৰ্ৱতী পৰিচিতিং হাৰীকৃতৈৰ্মৌক্তিকৈঃ ।
ৱক্ষোজন্মতুষাৰশৈলকটকে সঞ্চাৰমাতন্ৱতী
কামাক্ষ্যা মৃদুলস্মিতদ্যুতিমযী ভাগীৰথী ভাসতে ॥14॥

কম্বোৰ্ৱংশপৰম্পৰা ইৱ কৃপাসন্তানৱল্লীভুৱঃ
সম্ফুল্লস্তবকা ইৱ প্ৰসৃমৰা মূৰ্তাঃ প্ৰসাদা ইৱ ।
ৱাক্পীযূষকণা ইৱ ত্ৰিপথগাপৰ্যাযভেদা ইৱ
ভ্ৰাজন্তে তৱ মন্দহাসকিৰণাঃ কাঞ্চীপুৰীনাযিকে ॥15॥

ৱক্ষোজে ঘনসাৰপত্ৰৰচনাভঙ্গীসপত্নাযিতা
কণ্ঠে মৌক্তিকহাৰযষ্টিকিৰণৱ্যাপাৰমুদ্ৰাযিতা ।
ওষ্ঠশ্ৰীনিকুৰুম্বপল্লৱপুটে প্ৰেঙ্খত্প্ৰসূনাযিতা
কামাক্ষি স্ফুৰতাং মদীযহৃদযে ত্ৱন্মন্দহাসপ্ৰভা ॥16॥

যেষাং বিন্দুৰিৱোপৰি প্ৰচলিতো নাসাগ্ৰমুক্তামণিঃ
যেষাং দীন ইৱাধিকণ্ঠমযতে হাৰঃ কৰালম্বনম্ ।
যেষাং বন্ধুৰিৱোষ্ঠযোৰৰুণিমা ধত্তে স্ৱযং ৰঞ্জনং
কামাক্ষ্যাঃ প্ৰভৱন্তু তে মম শিৱোল্লাসায হাসাঙ্কুৰাঃ ॥17॥

যা জাড্যাম্বুনিধিং ক্ষিণোতি ভজতাং ৱৈৰাযতে কৈৰৱৈঃ
নিত্যং যাং নিযমেন যা চ যততে কৰ্তুং ত্ৰিণেত্ৰোত্সৱম্ ।
বিম্বং চান্দ্ৰমসং চ ৱঞ্চযতি যা গৰ্ৱেণ সা তাদৃশী
কামাক্ষি স্মিতমঞ্জৰী তৱ কথং জ্যোত্স্নেত্যসৌ কীৰ্ত্যতে ॥18॥

আৰুঢা ৰভসাত্পুৰঃ পুৰৰিপোৰাশ্লেষণোপক্ৰমে
যা তে মাতৰুপৈতি দিৱ্যতটিনীশঙ্কাকৰী তত্ক্ষণম্ ।
ওষ্ঠৌ ৱেপযতি ভ্ৰুৱৌ কুটিলযত্যানম্ৰযত্যাননং
তাং ৱন্দে মৃদুহাসপূৰসুষমামেকাম্ৰনাথপ্ৰিযে ॥19॥

ৱক্ত্ৰেন্দোস্তৱ চন্দ্ৰিকা স্মিতততিৰ্ৱল্গু স্ফুৰন্তী সতাং
স্যাচ্চেদ্যুক্তিমিদং চকোৰমনসাং কামাক্ষি কৌতূহলম্ ।
এতচ্চিত্ৰমহৰ্নিশং যদধিকামেষা ৰুচিং গাহতে
বিম্বোষ্ঠদ্যুমণিপ্ৰভাস্ৱপি চ যদ্বিব্বোকমালম্বতে ॥20॥

সাদৃশ্যং কলশাম্বুধেৰ্ৱহতি যত্কামাক্ষি মন্দস্মিতং
শোভামোষ্ঠৰুচাম্ব ৱিদ্ৰুমভৱামেতাদ্ভিদাং ব্ৰূমহে ।
একস্মাদুদিতং পুৰা কিল পপৌ শৰ্ৱঃ পুৰাণঃ পুমান্
এতন্মধ্যসমুদ্ভৱং ৰসযতে মাধুৰ্যৰূপং ৰসম্ ॥21॥

উত্তুঙ্গস্তনকুম্ভশৈলকটকে ৱিস্তাৰিকস্তূৰিকা-
পত্ৰশ্ৰীজুষি চঞ্চলাঃ স্মিতৰুচঃ কামাক্ষি তে কোমলাঃ ।
সন্ধ্যাদীধিতিৰঞ্জিতা ইৱ মুহুঃ সান্দ্ৰাধৰজ্যোতিষা
ৱ্যালোলামলশাৰদাভ্ৰশকলৱ্যাপাৰমাতন্ৱতে ॥22॥

ক্ষীৰং দূৰত এৱ তিষ্ঠতু কথং ৱৈমল্যমাত্ৰাদিদং
মাতস্তে সহপাঠৱীথিমযতাং মন্দস্মিতৈৰ্মঞ্জুলৈঃ ।
কিং চেযং তু ভিদাস্তি দোহনৱশাদেকং তু সঞ্জাযতে
কামাক্ষি স্ৱযমৰ্থিতং প্ৰণমতামন্যত্তু দোদুহ্যতে ॥23॥

কৰ্পূৰৈৰমৃতৈৰ্জগজ্জননি তে কামাক্ষি চন্দ্ৰাতপৈঃ
মুক্তাহাৰগুণৈৰ্মৃণালৱলযৈৰ্মুগ্ধস্মিতশ্ৰীৰিযম্ ।
শ্ৰীকাঞ্চীপুৰনাযিকে সমতযা সংস্তূযতে সজ্জনৈঃ
তত্তাদৃঙ্মম তাপশান্তিৱিধযে কিং দেৱি মন্দাযতে ॥24॥

মধ্যেগৰ্ভিতমঞ্জুৱাক্যলহৰীমাধ্ৱীঝৰীশীতলা
মন্দাৰস্তবকাযতে জননি তে মন্দস্মিতাংশুচ্ছটা ।
যস্যা ৱৰ্ধযিতুং মুহুৰ্ৱিকসনং কামাক্ষি কামদ্ৰুহো
ৱল্গুৰ্ৱীক্ষণৱিভ্ৰমৱ্যতিকৰো ৱাসন্তমাসাযতে ॥25॥

বিম্বোষ্ঠদ্যুতিপুঞ্জৰঞ্জিতৰুচিস্ত্ৱন্মন্দহাসচ্ছটা ।
কল্যাণং গিৰিসাৰ্ৱভৌমতনযে কল্লোলযত্ৱাশু মে ।
ফুল্লন্মল্লিপিনদ্ধহল্লকমযী মালেৱ যা পেশলা
শ্ৰীকাঞ্চীশ্ৱৰি মাৰমৰ্দিতুৰুৰোমধ্যে মুহুৰ্লম্বতে ॥26॥

বিভ্ৰাণা শৰদভ্ৰৱিভ্ৰমদশাং ৱিদ্যোতমানাপ্যসো
কামাক্ষি স্মিতমঞ্জৰী কিৰতি তে কাৰুণ্যধাৰাৰসম্ ।
আশ্চৰ্যং শিশিৰীকৰোতি জগতীশ্চালোক্য চৈনামহো
কামং খেলতি নীলকণ্ঠহৃদযং কৌতূহলান্দোলিতম্ ॥27॥

প্ৰেঙ্খত্প্ৰৌঢকটাক্ষকুঞ্জকুহৰেষ্ৱত্যচ্ছগুচ্ছাযিতং
ৱক্ত্ৰেন্দুচ্ছৱিসিন্ধুৱীচিনিচযে ফেনপ্ৰতানাযিতম্ ।
নৈৰন্তৰ্যৱিজৃম্ভিতস্তনতটে নৈচোলপট্টাযিতং
কালুষ্যং কবলীকৰোতু মম তে কামাক্ষি মন্দস্মিতম্ ॥28॥

পীযূষং তৱ মন্থৰস্মিতমিতি ৱ্যৰ্থৈৱ সাপপ্ৰথা
কামাক্ষি ধ্ৰুৱমীদৃশং যদি ভৱেদেতত্কথং ৱা শিৱে ।
মন্দাৰস্য কথালৱং ন সহতে মথ্নাতি মন্দাকিনী-
মিন্দুং নিন্দতি কীৰ্তিতেঽপি কলশীপাথোধিমীৰ্ষ্যাযতে ॥29॥

ৱিশ্ৱেষাং নযনোত্সৱং ৱিতনুতাং ৱিদ্যোততাং চন্দ্ৰমা
ৱিখ্যাতো মদনান্তকেন মুকুটীমধ্যে চ সম্মান্যতাম্ ।
আঃ কিং জাতমনেন হাসসুষমামালোক্য কামাক্ষি তে
কালঙ্কীমৱলম্বতে খলু দশাং কল্মাষহীনোঽপ্যসৌ ॥30॥

চেতঃ শীতলযন্তু নঃ পশুপতেৰানন্দজীৱাতৱো
নম্ৰাণাং নযনাধ্ৱসীমসু শৰচ্চন্দ্ৰাতপোপক্ৰমাঃ ।
সংসাৰাখ্যসৰোৰুহাকৰখলীকাৰে তুষাৰোত্কৰাঃ
কামাক্ষি স্মৰকীৰ্তিবীজনিকৰাস্ত্ৱন্মন্দহাসাঙ্কুৰাঃ ॥31॥

কৰ্মৌঘাখ্যতমঃকচাকচিকৰান্কামাক্ষি সঞ্চিন্তযে
ত্ৱন্মন্দস্মিতৰোচিষাং ত্ৰিভুৱনক্ষেমঙ্কৰানঙ্কুৰান্ ।
যে ৱক্ত্ৰং শিশিৰশ্ৰিযো ৱিকসিতং চন্দ্ৰাতপাম্ভোৰুহ-
দ্ৱেষোদ্ধেষোণচাতুৰীমিৱ তিৰস্কৰ্তুং পৰিষ্কুৰ্ৱতে ॥32॥

কুৰ্যুৰ্নঃ কুলশৈলৰাজতনযে কূলঙ্কষং মঙ্গলং
কুন্দস্পৰ্ধনচুঞ্চৱস্তৱ শিৱে মন্দস্মিতপ্ৰক্ৰমাঃ ।
যে কামাক্ষি সমস্তসাক্ষিনযনং সন্তোষযন্তীশ্ৱৰং
কৰ্পূৰপ্ৰকৰা ইৱ প্ৰসৃমৰাঃ পুংসামসাধাৰণাঃ ॥33॥

কম্ৰেণ স্নপযস্ৱ কৰ্মকুহনাচোৰেণ মাৰাগম-
ৱ্যাখ্যাশিক্ষণদীক্ষিতেন ৱিদুষামক্ষীণলক্ষ্মীপুষা ।
কামাক্ষি স্মিতকন্দলেন কলুষস্ফোটক্ৰিযাচুঞ্চুনা
কাৰুণ্যামৃতৱীচিকাৱিহৰণপ্ৰাচুৰ্যধুৰ্যেণ মাম্ ॥34॥

ত্ৱন্মন্দস্মিতকন্দলস্য নিযতং কামাক্ষি শঙ্কামহে
বিম্বঃ কশ্চন নূতনঃ প্ৰচলিতো নৈশাকৰঃ শীকৰঃ ।
কিঞ্চ ক্ষীৰপযোনিধিঃ প্ৰতিনিধিঃ স্ৱৰ্ৱাহিনীৱীচিকা-
বিব্ৱোকোঽপি ৱিডম্ব এৱ কুহনা মল্লীমতল্লীৰুচঃ ॥35॥

দুষ্কৰ্মাৰ্কনিসৰ্গকৰ্কশমহস্সম্পৰ্কতপতং মিল-
ত্পঙ্কং শঙ্কৰৱল্লভে মম মনঃ কাঞ্চীপুৰালঙ্ক্ৰিযে ।
অম্ব ত্ৱন্মৃদুলস্মিতামৃতৰসে মঙ্ক্ত্ৱা ৱিধূয ৱ্যথা-
মানন্দোদযসৌধশৃঙ্গপদৱীমাৰোঢুমাকাঙ্ক্ষতি ॥36॥

নম্ৰাণাং নগৰাজশেখৰসুতে নাকালযানাং পুৰঃ
কামাক্ষি ত্ৱৰযা ৱিপত্প্ৰশমেন কাৰুণ্যধাৰাঃ কিৰন্ ।
আগচ্ছন্তমনুগ্ৰহং প্ৰকটযন্নানন্দবীজানি তে
নাসীৰে মৃদুহাস এৱ তনুতে নাথে সুধাশীতলঃ ॥37॥

কামাক্ষি প্ৰথমানৱিভ্ৰমনিধিঃ কন্দৰ্পদৰ্পপ্ৰসূঃ
মুগ্ধস্তে মৃদুহাস এৱ গিৰিজে মুষ্ণাতু মে কিল্বিষম্ ।
যং দ্ৰষ্টুং ৱিহিতে কৰগ্ৰহ উমে শম্ভুস্ত্ৰপামীলিতং
স্ৱৈৰং কাৰযতি স্ম তাণ্ডৱৱিনোদানন্দিনা তণ্ডুনা ॥38॥

ক্ষুণ্ণং কেনচিদেৱ ধীৰমনসা কুত্ৰাপি নানাজনৈঃ
কৰ্মগ্ৰন্থিনিযন্ত্ৰিতৈৰসুগমং কামাক্ষি সামান্যতঃ ।
মুগ্ধৈৰ্দ্ৰুষ্টুমশক্যমেৱ মনসা মূঢসয মে মৌক্তিকং
মাৰ্গং দৰ্শযতু প্ৰদীপ ইৱ তে মন্দস্মিতশ্ৰীৰিযম্ ॥39॥

জ্যোত্স্নাকান্তিভিৰেৱ নিৰ্মলতৰং নৈশাকৰং মণ্ডলং
হংসৈৰেৱ শৰদ্ৱিলাসসমযে ৱ্যাকোচমম্ভোৰুহম্ ।
স্ৱচ্ছৈৰেৱ ৱিকস্ৱৰৈৰুডুগুণৈঃ কামাক্ষি বিম্বং দিৱঃ
পুণ্যৈৰেৱ মৃদুস্মিতৈস্তৱ মুখং পুষ্ণাতি শোভাভৰম্ ॥40॥

মানগ্ৰন্থিৱিধুন্তুদেন ৰভসাদাস্ৱাদ্যমানে নৱ-
প্ৰেমাডম্বৰপূৰ্ণিমাহিমকৰে কামাক্ষি তে তত্ক্ষণম্ ।
আলোক্য স্মিতচন্দ্ৰিকাং পুনৰিমামুন্মীলনং জগ্মুষীং
চেতঃ শীলযতে চকোৰচৰিতং চন্দ্ৰাৰ্ধচূডামণেঃ ॥41॥

কামাক্ষি স্মিতমঞ্জৰীং তৱ ভজে যস্যাস্ত্ৱিষামঙ্কুৰা-
নাপীনস্তনপানলালসতযা নিশ্শঙ্কমঙ্কেশযঃ ।
ঊৰ্ধ্ৱং ৱীক্ষ্য ৱিকৰ্ষতি প্ৰসৃমৰানুদ্দামযা শুণ্ডযা
সূনুসুতে বিসশঙ্কযাশু কুহনাদন্তাৱলগ্ৰামণীঃ ॥42॥

গাঢাশ্লেষৱিমৰ্দসম্ভ্ৰমৱশাদুদ্দামমুক্তাগুণ-
প্ৰালম্বে কুচকুম্ভযোৰ্ৱিগলিতে দক্ষদ্ৱিষো ৱক্ষসি ।
যা সখ্যেন পিনহ্যতি প্ৰচুৰযা ভাসা তদীযাং দশাং
সা মে খেলতু কামকোটি হৃদযে সান্দ্ৰস্মিতাংশুচ্ছটা ॥43॥

মন্দাৰে তৱ মন্থৰস্মিতৰুচাং মাত্সৰ্যমালোক্যতে
কামাক্ষি স্মৰশাসনে চ নিযতো ৰাগোদযো লক্ষ্যতে ।
চান্দ্ৰীষু দ্যুতিমঞ্জৰীষু চ মহান্দ্ৱেষাঙ্কুৰো দৃশ্যতে
শুদ্ধানাং কথমীদৃশী গিৰিসুতেঽতিশুদ্ধা দশা কথ্যতাম্ ॥44॥

পীযূষং খলু পীযতে সুৰজনৈৰ্দুগ্ধাম্বুধিৰ্মথ্যতে
মাহেশৈশ্চ জটাকলাপনিগডৈৰ্মন্দাকিনী নহ্যতে ।
শীতাংশুঃ পৰিভূযতে চ তমসা তস্মাদনেতাদৃশী
কামাক্ষি স্মিতমঞ্জৰী তৱ ৱচোৱৈদগ্ধ্যমুল্লঙ্ঘতে ॥45॥

আশঙ্কে তৱ মন্দহাসলহৰীমন্যাদৃশীং চন্দ্ৰিকা-
মেকাম্ৰেশকুটুম্বিনি প্ৰতিপদং যস্যাঃ প্ৰভাসঙ্গমে ।
ৱক্ষোজাম্বুৰুহে ন তে ৰচযতঃ কাঞ্চিদ্দশাং কৌঙ্মলী-
মাস্যাম্ভোৰুহমম্ব কিঞ্চ শনকৈৰালম্বতে ফুল্লতাম্ ॥46॥

আস্তীৰ্ণাধৰকান্তিপল্লৱচযে পাতং মুহুৰ্জগ্মুষী
মাৰদ্ৰোহিণি কন্দলত্স্মৰশৰজ্ৱালাৱলীৰ্ৱ্যঞ্জতী ।
নিন্দন্তী ঘনসাৰহাৰৱলযজ্যোত্স্নামৃণালানি তে
কামাক্ষি স্মিতচাতুৰী ৱিৰহিণীৰীতিং জগাহেতৰাম্ ॥47॥

সূৰ্যালোকৱিধৌ ৱিকাসমধিকং যান্তী হৰন্তী তম-
স্সন্দোহং নমতাং নিজস্মৰণতো দোষাকৰদ্ৱেষিণী ।
নিৰ্যান্তী ৱদনাৰৱিন্দকুহৰান্নিৰ্ধূতজাড্যা নৃণাং
শ্ৰীকামাক্ষি তৱ স্মিতদ্যুতিমযী চিত্ৰীযতে চন্দ্ৰিকা ॥48॥

কুণ্ঠীকুৰ্যুৰমী কুবোধঘটনামস্মন্মনোমাথিনীং
শ্ৰীকামাক্ষি শিৱঙ্কৰাস্তৱ শিৱে শ্ৰীমন্দহাসাঙ্কুৰাঃ ।
যে তন্ৱন্তি নিৰন্তৰং তৰুণিমস্তম্বেৰমগ্ৰামণী-
কুম্ভদ্ৱন্দ্ৱৱিডম্বিনি স্তনতটে মুক্তাকুথাডম্বৰম্ ॥49॥

প্ৰেঙ্খন্তঃ শৰদম্বুদা ইৱ শনৈঃ প্ৰেমানিলৈঃ প্ৰেৰিতা
মজ্জন্তো মন্দনাৰিকণ্ঠসুষমাসিন্ধৌ মুহুৰ্মন্থৰম্ ।
শ্ৰীকামাক্ষি তৱ স্মিতাংশুনিকৰাঃ শ্যামাযমানশ্ৰিযো
নীলাম্ভোধৰনৈপুণীং তত ইতো নিৰ্নিদ্ৰযন্ত্যঞ্জসা ॥50॥

ৱ্যাপাৰং চতুৰাননৈকৱিহৃতৌ ৱ্যাকুৰ্ৱতী কুৰ্ৱতী
ৰুদ্ৰাক্ষগ্ৰহণং মহেশি সততং ৱাগূৰ্মিকল্লোলিতা ।
উত্ফুল্লং ধৱলাৰৱিন্দমধৰীকৃত্য স্ফুৰন্তী সদা
শ্ৰীকামাক্ষি সৰস্ৱতী ৱিজযতে ত্ৱন্মন্দহাসপ্ৰভা ॥51॥

কৰ্পূৰদ্যুতিতস্কৰেণ মহসা কল্মাষযত্যাননং
শ্ৰীকাঞ্চীপুৰনাযিকে পতিৰিৱ শ্ৰীমন্দহাসোঽপি তে ।
আলিঙ্গত্যতিপীৱৰাং স্তনতটীং বিম্বাধৰং চুম্বতি
প্ৰৌঢং ৰাগভৰং ৱ্যনক্তি মনসো ধৈৰ্যং ধুনীতেতৰাম্ ॥52॥

ৱৈশদ্যেন চ ৱিশ্ৱতাপহৰণক্ৰীডাপটীযস্তযা
পাণ্ডিত্যেন পচেলিমেন জগতাং নেত্ৰোত্সৱোত্পাদেন ।
কামাক্ষি স্মিতকন্দলৈস্তৱ তুলামাৰোঢুমুদ্যোগিনী
জ্যোত্স্নাসৌ জলৰাশিপোষণতযা দূষ্যাং প্ৰপন্না দশাম্ ॥53॥

লাৱণ্যাম্বুজিনীমৃণালৱলযৈঃ শৃঙ্গাৰগন্ধদ্ৱিপ-
গ্ৰামণ্যঃ শ্ৰুতিচামৰৈস্তৰুণিমস্ৱাৰাজ্যতেজোঙ্কুৰৈঃ ।
আনন্দামৃতসিন্ধুৱীচিপৃষতৈৰাস্যাব্জহংসৈস্তৱ
শ্ৰীকামাক্ষি মথান মন্দহসিতৈৰ্মত্কং মনঃকল্মষম্ ॥54॥

উত্তুঙ্গস্তনমণ্ডলীপৰিচলন্মাণিক্যহাৰচ্ছটা-
চঞ্চচ্ছোণিমপুঞ্জমধ্যসৰণিং মাতঃ পৰিষ্কুৰ্ৱতী ।
যা ৱৈদগ্ধ্যমুপৈতি শঙ্কৰজটাকান্তাৰৱাটীপত-
ত্স্ৱৰ্ৱাপীপযসঃ স্মিতদ্যুতিৰসৌ কামাক্ষি তে মঞ্জুলা ॥55॥

সন্নামৈকজুষা জনেন সুলভং সংসূচযন্তী শনৈ-
ৰুত্তুঙ্গস্য চিৰাদনুগ্ৰহতৰোৰুত্পত্স্যমানং ফলম্ ।
প্ৰাথম্যেন ৱিকস্ৱৰা কুসুমৱত্প্ৰাগল্ভ্যমভ্যেযুষী
কামাক্ষি স্মিতচাতুৰী তৱ মম ক্ষেমঙ্কৰী কল্পতাম্ ॥56॥

ধানুষ্কাগ্ৰসৰস্য লোলকুটিলভ্ৰূলেখযা বিভ্ৰতো
লীলালোকশিলীমুখং নৱৱযস্সাম্ৰাজ্যলক্ষ্মীপুষঃ ।
জেতুং মন্মথমৰ্দিনং জননি তে কামাক্ষি হাসঃ স্ৱযং
ৱল্গুৰ্ৱিভ্ৰমভূভৃতো ৱিতনুতে সেনাপতিপ্ৰক্ৰিযাম্ ॥57॥

যন্নাকম্পত কালকূটকবলীকাৰে চুচুম্বে ন যদ্-
গ্লান্যা চক্ষুষি ৰূষিতানলশিখে ৰুদ্ৰস্য তত্তাদৃশম্ ।
চেতো যত্প্ৰসভং স্মৰজ্ৱৰশিখিজ্ৱালেন লেলিহ্যতে
তত্কামাক্ষি তৱ স্মিতাংশুকলিকাহেলাভৱং প্ৰাভৱম্ ॥58॥

সম্ভিন্নেৱ সুপৰ্ৱলোকতটিনী ৱীচীচযৈৰ্যামুনৈঃ
সম্মিশ্ৰেৱ শশাঙ্কদীপ্তিলহৰী নীলৈৰ্মহানীৰদৈঃ ।
কামাক্ষি স্ফুৰিতা তৱ স্মিতৰুচিঃ কালাঞ্জনস্পৰ্ধিনা
কালিম্না কচৰোচিষাং ৱ্যতিকৰে কাঞ্চিদ্দশামশ্নুতে ॥59॥

জানীমো জগদীশ্ৱৰপ্ৰণযিনি ত্ৱন্মন্দহাসপ্ৰভাং
শ্ৰীকামাক্ষি সৰোজিনীমভিনৱামেষা যতঃ সৰ্ৱদা ।
আস্যেন্দোৰৱলোকেন পশুপতেৰভ্যেতি সম্ফুল্লতাং
তন্দ্ৰালুস্তদভাৱ এৱ তনুতে তদ্ৱৈপৰীত্যক্ৰমম্ ॥60॥

যান্তী লোহিতিমানমভ্ৰতটিনী ধাতুচ্ছটাকৰ্দমৈঃ
ভান্তী বালগভস্তিমালিকিৰণৈৰ্মেঘাৱলী শাৰদী ।
বিম্বোষ্ঠদ্যুতিপুঞ্জচুম্বনকলাশোণাযমানেন তে
কামাক্ষি স্মিতৰোচিষা সমদশামাৰোঢুমাকাঙ্ক্ষতে ॥61॥

শ্ৰীকামাক্ষি মুখেন্দুভূষণমিদং মন্দস্মিতং তাৱকং
নেত্ৰানন্দকৰং তথা হিমকৰো গচ্ছেদ্যথা তিগ্মতাম্ ।
শীতং দেৱি তথা যথা হিমজলং সন্তাপমুদ্ৰাস্পদং
শ্ৱেতং কিঞ্চ তথা যথা মলিনতাং ধত্তে চ মুক্তামণিঃ ॥62॥

ত্ৱন্মন্দস্মিতমঞ্জৰীং প্ৰসৃমৰাং কামাক্ষি চন্দ্ৰাতপং
সন্তঃ সন্ততমামনন্ত্যমলতা তল্লক্ষণং লক্ষ্যতে ।
অস্মাকং ন ধুনোতি তাপকমধিকং ধূনোতি নাভ্যন্তৰং
ধ্ৱান্তং তত্খলু দুঃখিনো ৱযমিদং কেনোতি নো ৱিদ্মহে ॥63॥

নম্ৰস্য প্ৰণযপ্ৰৰূঢকলহচ্ছেদায পাদাব্জযোঃ
মন্দং চন্দ্ৰকিশোৰশেখৰমণেঃ কামাক্ষি ৰাগেণ তে ।
বন্ধূকপ্ৰসৱশ্ৰিযং জিতৱতো বংহীযসীং তাদৃশীং
বিম্বোষ্ঠস্য ৰুচিং নিৰস্য হসিতজ্যোত্স্না ৱযস্যাযতে ॥64॥

মুক্তানাং পৰিমোচনং ৱিদধতস্তত্প্ৰীতিনিষ্পাদিনী
ভূযো দূৰত এৱ ধূতমৰুতস্তত্পালনং তন্ৱতী ।
উদ্ভূতস্য জলান্তৰাদৱিৰতং তদ্দূৰতাং জগ্মুষী
কামাক্ষি স্মিতমঞ্জৰী তৱ কথং কম্বোস্তুলামশ্নুতে ॥65॥

শ্ৰীকামাক্ষি তৱ স্মিতদ্যুতিঝৰীৱৈদগ্ধ্যলীলাযিতং
পশ্যন্তোঽপি নিৰন্তৰং সুৱিমলম্মন্যা জগন্মণ্ডলে ।
লোকং হাসযিতুং কিমৰ্থমনিশং প্ৰাকাশ্যমাতন্ৱতে
মন্দাক্ষং ৱিৰহয্য মঙ্গলতৰং মন্দাৰচন্দ্ৰাদযঃ ॥66॥

ক্ষীৰাব্ধেৰপি শৈলৰাজতনযে ত্ৱন্মন্দহাসস্য চ
শ্ৰীকামাক্ষি ৱলক্ষিমোদযনিধেঃ কিঞ্চিদ্ভিদাং ব্ৰূমহে ।
একস্মৈ পুৰুষায দেৱি স দদৌ লক্ষ্মীং কদাচিত্পুৰা
সৰ্ৱেভ্যোঽপি দদাত্যসৌ তু সততং লক্ষ্মীং চ ৱাগীশ্ৱৰীম্ ॥67॥

শ্ৰীকাঞ্চীপুৰৰত্নদীপকলিকে তান্যেৱ মেনাত্মজে
চাকোৰাণি কুলানি দেৱি সুতৰাং ধন্যানি মন্যামহে ।
কম্পাতীৰকুটুম্বচঙ্ক্ৰমকলাচুঞ্চূনি চঞ্চূপুটৈঃ
নিত্যং যানি তৱ স্মিতেন্দুমহসামাস্ৱাদমাতন্ৱতে ॥68॥

শৈত্যপ্ৰক্ৰমমাশ্ৰিতোঽপি নমতাং জাড্যপ্ৰথাং ধূনযন্
নৈৰ্মল্যং পৰমং গতোঽপি গিৰিশং ৰাগাকুলং চাৰযন্ ।
লীলালাপপুৰস্সৰোঽপি সততং ৱাচংযমান্প্ৰীণযন্
কামাক্ষি স্মিতৰোচিষাং তৱ সমুল্লাসঃ কথং ৱৰ্ণ্যতে ॥69॥

শ্ৰোণীচঞ্চলমেখলামুখৰিতং লীলাগতং মন্থৰং
ভ্ৰূৱল্লীচলনং কটাক্ষৱলনং মন্দাক্ষৱীক্ষাচণম্ ।
যদ্ৱৈদগ্ধ্যমুখেন মন্মথৰিপুং সম্মোহযন্ত্যঞ্জসা
শ্ৰীকামাক্ষি তৱ স্মিতায সততং তস্মৈ নম্সকুৰ্মহে ॥70॥

শ্ৰীকামাক্ষি মনোজ্ঞমন্দহসিতজ্যোতিষ্প্ৰৰোহে তৱ
স্ফীতশ্ৱেতিমসাৰ্ৱভৌমসৰণিপ্ৰাগল্ভ্যমভ্যেযুষি ।
চন্দ্ৰোঽযং যুৱৰাজতাং কলযতে চেটীধুৰং চন্দ্ৰিকা
শুদ্ধা সা চ সুধাঝৰী সহচৰীসাধৰ্ম্যমালম্বতে ॥71॥

জ্যোত্স্না কিং তনুতে ফলং তনুমতামৌষ্ণ্যপ্ৰশান্তিং ৱিনা
ত্ৱন্মন্দস্মিতৰোচিষা তনুমতাং কামাক্ষি ৰোচিষ্ণুনা ।
সন্তাপো ৱিনিৱাৰ্যতে নৱৱযঃপ্ৰাচুৰ্যমঙ্কূৰ্যতে
সৌন্দৰ্যং পৰিপূৰ্যতে জগতি সা কীৰ্তিশ্চ সঞ্চাৰ্যতে ॥72॥

ৱৈমল্যং কুমুদশ্ৰিযাং হিমৰুচঃ কান্ত্যৈৱ সন্ধুক্ষ্যতে
জ্যোত্স্নাৰোচিৰপি প্ৰদোষসমযং প্ৰাপ্যৈৱ সম্পদ্যতে ।
স্ৱচ্ছত্ৱং নৱমৌক্তিকস্য পৰমং সংস্কাৰতো দৃশ্যতে
কামাক্ষ্যাঃ স্মিতদীধিতেৰ্ৱিশদিমা নৈসৰ্গিকো ভাসতে ॥73॥

প্ৰাকাশ্যং পৰমেশ্ৱৰপ্ৰণযিনি ত্ৱন্মন্দহাসশ্ৰিযঃ
শ্ৰীকামাক্ষি মম ক্ষিণোতু মমতাৱৈচক্ষণীমক্ষযাম্ ।
যদ্ভীত্যেৱ নিলীযতে হিমকৰো মেঘোদৰে শুক্তিকা-
গৰ্ভে মৌক্তিকমণ্ডলী চ সৰসীমধ্যে মৃণালী চ সা ॥74॥

হেৰম্বে চ গুহে হৰ্ষভৰিতং ৱাত্সল্যমঙ্কূৰযত্
মাৰদ্ৰোহিণি পূৰুষে সহভুৱং প্ৰেমাঙ্কুৰং ৱ্যঞ্জযত্ ।
আনম্ৰেষু জনেষু পূৰ্ণকৰুণাৱৈদগ্ধ্যমুত্তালযত্
কামাক্ষি স্মিতমঞ্জসা তৱ কথঙ্কাৰং মযা কথ্যতে ॥75॥

সঙ্ক্ৰুদ্ধদ্ৱিজৰাজকোঽপ্যৱিৰতং কুৰ্ৱন্দ্ৱিজৈঃ সঙ্গমং
ৱাণীপদ্ধতিদূৰগোঽপি সততং তত্সাহচৰ্যং ৱহন্ ।
অশ্ৰান্তং পশুদুৰ্লভোঽপি কলযন্পত্যৌ পশূনাং ৰতিং
শ্ৰীকামাক্ষি তৱ স্মিতামৃতৰসস্যন্দো মযি স্পন্দতাম্ ॥76॥

শ্ৰীকামাক্ষি মহেশ্ৱৰে নিৰুপমপ্ৰেমাঙ্কুৰপ্ৰক্ৰমমং
নিত্যং যঃ প্ৰকটীকৰোতি সহজামুন্নিদ্ৰযন্মাধুৰীম্ ।
তত্তাদৃক্তৱ মন্দহাসমহিমা মাতঃ কথং মানিতাং
তন্মূৰ্ধ্না সুৰনিম্নগাং চ কলিকামিন্দোশ্চ তাং নিন্দতি ॥77॥

যে মাধুৰ্যৱিহাৰমণ্টপভুৱো যে শৈত্যমুদ্ৰাকৰা
যে ৱৈশদ্যদশাৱিশেষসুভগাস্তে মন্দহাসাঙ্কুৰাঃ ।
কামাক্ষ্যাঃ সহজং গুণত্ৰযমিদং পৰ্যাযতঃ কুৰ্ৱতাং
ৱাণীগুম্ফনডম্বৰে চ হৃদযে কীৰ্তিপ্ৰৰোহে চ মে ॥78॥

কামাক্ষ্যা মৃদুলস্মিতাংশুনিকৰা দক্ষান্তকে ৱীক্ষণে
মন্দাক্ষগ্ৰহিলা হিমদ্যুতিমযূখাক্ষেপদীক্ষাঙ্কুৰাঃ ।
দাক্ষ্যং পক্ষ্মলযন্তু মাক্ষিকগুডদ্ৰাক্ষাভৱং ৱাক্ষু মে
সূক্ষ্মং মোক্ষপথং নিৰীক্ষিতুমপি প্ৰক্ষালযেযুৰ্মনঃ ॥79॥

জাত্যা শীতশীতলানি মধুৰাণ্যেতানি পূতানি তে
গাঙ্গানীৱ পযাংসি দেৱি পটলান্যল্পস্মিতজ্যোতিষাম্ ।
এনঃপঙ্কপৰম্পৰামলিনিতামেকাম্ৰনাথপ্ৰিযে
প্ৰজ্ঞানাত্সুতৰাং মদীযধিষণাং প্ৰক্ষালযন্তু ক্ষণাত্ ॥80॥

অশ্ৰান্তং পৰতন্ত্ৰিতঃ পশুপতিস্ত্ৱন্মন্দহাসাঙ্কুৰৈঃ
শ্ৰীকামাক্ষি তদীযৱৰ্ণসমতাসঙ্গেন শঙ্কামহে ।
ইন্দুং নাকধুনীং চ শেখৰযতে মালাং চ ধত্তে নৱৈঃ
ৱৈকুণ্ঠৈৰৱকুণ্ঠনং চ কুৰুতে ধূলীচযৈৰ্ভাস্মনৈঃ ॥81॥

শ্ৰীকাঞ্চীপুৰদেৱতে মৃদুৱচস্সৌৰভ্যমুদ্ৰাস্পদং
প্ৰৌঢপ্ৰেমলতানৱীনকুসুমং মন্দস্মিতং তাৱকম্ ।
মন্দং কন্দলতি প্ৰিযস্য ৱদনালোকে সমাভাষণে
শ্লক্ষ্ণে কুঙ্মলতি প্ৰৰূঢপুলকে চাশ্লোষণে ফুল্লতি ॥82॥

কিং ত্ৰৈস্ৰোতসমম্বিকে পৰিণতং স্ৰোতশ্চতুৰ্থং নৱং
পীযূষস্য সমস্ততাপহৰণং কিংৱা দ্ৱিতীযং ৱপুঃ ।
কিংস্ৱিত্ত্ৱন্নিকটং গতং মধুৰিমাভ্যাসায গৱ্যং পযঃ
শ্ৰীকাঞ্চীপুৰনাযকপ্ৰিযতমে মন্দস্মিতং তাৱকম্ ॥83॥

ভূষা ৱক্ত্ৰসৰোৰুহস্য সহজা ৱাচাং সখী শাশ্ৱতী
নীৱী ৱিভ্ৰমসন্ততেঃ পশুপতেঃ সৌধী দৃশাং পাৰণা ।
জীৱাতুৰ্মদনশ্ৰিযঃ শশিৰুচেৰুচ্চাটনী দেৱতা
শ্ৰীকামাক্ষি গিৰামভূমিমযতে হাসপ্ৰভামঞ্জৰী ॥84॥

সূতিঃ শ্ৱেতিমকন্দলস্য ৱসতিঃ শৃঙ্গাৰসাৰশ্ৰিযঃ
পূৰ্তিঃ সূক্তিঝৰীৰসস্য লহৰী কাৰুণ্যপাথোনিধেঃ ।
ৱাটী কাচন কৌসুমী মধুৰিমস্ৱাৰাজ্যলক্ষ্ম্যাস্তৱ
শ্ৰীকামাক্ষি মমাস্তু মঙ্গলকৰী হাসপ্ৰভাচাতুৰী ॥85॥

জন্তূনাং জনিদুঃখমৃত্যুলহৰীসন্তাপনং কৃন্ততঃ
প্ৰৌঢানুগ্ৰহপূৰ্ণশীতলৰুচো নিত্যোদযং বিভ্ৰতঃ ।
শ্ৰীকামাক্ষি ৱিসৃত্ৱৰা ইৱ কৰা হাসাঙ্কুৰাস্তে হঠা-
দালোকেন নিহন্যুৰন্ধতমসস্তোমস্য মে সন্ততিম্ ॥86॥

উত্তুঙ্গস্তনমণ্ডলস্য ৱিলসল্লাৱণ্যলীলানটী-
ৰঙ্গস্য স্ফুটমূৰ্ধ্ৱসীমনি মুহুঃ প্ৰাকাশ্যমভ্যেযুষী ।
শ্ৰীকামাক্ষি তৱ স্মিতদ্যুতিততিৰ্বিম্বোষ্ঠকান্ত্যঙ্কুৰৈঃ
চিত্ৰাং ৱিদ্ৰুমমুদ্ৰিতাং ৱিতনুতে মৌক্তীং ৱিতানশ্ৰিযম্ ॥87॥

স্ৱাভাৱ্যাত্তৱ ৱক্ত্ৰমেৱ ললিতং সন্তোষসম্পাদনং
শম্ভোঃ কিং পুনৰঞ্চিতস্মিতৰুচঃ পাণ্ডিত্যপাত্ৰীকৃতম্ ।
অম্ভোজং স্ৱত এৱ সৰ্ৱজগতাং চক্ষুঃপ্ৰিযম্ভাৱুকং
কামাক্ষি স্ফুৰিতে শৰদ্ৱিকসিতে কীদৃগ্ৱিধং ভ্ৰাজতে ॥88॥

পুম্ভিৰ্নিৰ্মলমানসৌৰ্ৱিদধতে মৈত্ৰীং দৃঢং নিৰ্মলাং
লব্ধ্ৱা কৰ্মলযং চ নিৰ্মলতৰাং কীৰ্তিং লভন্তেতৰাম্ ।
সূক্তিং পক্ষ্মলযন্তি নিৰ্মলতমাং যত্তাৱকাঃ সেৱকাঃ
তত্কামাক্ষি তৱ স্মিতস্য কলযা নৈৰ্মল্যসীমানিধেঃ ॥89॥

আকৰ্ষন্নযনানি নাকিসদসাং শৈত্যেন সংস্তম্ভয-
ন্নিন্দুং কিঞ্চ ৱিমোহযন্পশুপতিং ৱিশ্ৱাৰ্তিমুচ্চাটযন্ ।
হিংসত্সংসৃতিডম্বৰং তৱ শিৱে হাসাহ্ৱযো মান্ত্ৰিকঃ
শ্ৰীকামাক্ষি মদীযমানসতমোৱিদ্ৱেষণে চেষ্টতাম্ ॥90॥

ক্ষেপীযঃ ক্ষপযন্তু কল্মষভযান্যস্মাকমল্পস্মিত-
জ্যোতিৰ্মণ্ডলচঙ্ক্ৰমাস্তৱ শিৱে কামাক্ষি ৰোচিষ্ণৱঃ ।
পীডাকৰ্মঠকৰ্মঘৰ্মসমযৱ্যাপাৰতাপানল-
শ্ৰীপাতা নৱহৰ্ষৱৰ্ষণসুধাস্ৰোতস্ৱিনীশীকৰাঃ ॥91॥

শ্ৰীকামাক্ষি তৱ স্মিতৈন্দৱমহঃপূৰে পৰিম্ফূৰ্জতি
প্ৰৌঢাং ৱাৰিধিচাতুৰীং কলযতে ভক্তাত্মনাং প্ৰাতিভম্ ।
দৌৰ্গত্যপ্ৰসৰাস্তমঃপটলিকাসাধৰ্ম্যমাবিভ্ৰতে
সৰ্ৱং কৈৰৱসাহচৰ্যপদৱীৰীতিং ৱিধত্তে পৰম্ ॥92॥

মন্দাৰাদিষু মন্মথাৰিমহিষি প্ৰাকাশ্যৰীতিং নিজাং
কাদাচিত্কতযা ৱিশঙ্ক্য বহুশো ৱৈশদ্যমুদ্ৰাগুণঃ ।
সাতত্যেন তৱ স্মিতে ৱিতনুতে স্ৱৈৰাসনাৱাসনাম্ ॥93॥

ইন্ধানে ভৱৱীতিহোত্ৰনিৱহে কৰ্মৌঘচণ্ডানিল-
প্ৰৌঢিম্না বহুলীকৃতে নিপতিতং সন্তাপচিন্তাকুলম্ ।
মাতৰ্মাং পৰিষিঞ্চ কিঞ্চিদমলৈঃ পীযূষৱৰ্ষৈৰিৱ
শ্ৰীকামাক্ষি তৱ স্মিতদ্যুতিকণৈঃ শৈশিৰ্যলীলাকৰৈঃ ॥94॥

ভাষাযা ৰসনাগ্ৰখেলনজুষঃ শৃঙ্গাৰমুদ্ৰাসখী-
লীলাজাতৰতেঃ সুখেন নিযমস্নানায মেনাত্মজে ।
শ্ৰীকামাক্ষি সুধামযীৱ শিশিৰা স্ৰোতস্ৱিনী তাৱকী
গাঢানন্দতৰঙ্গিতা ৱিজযতে হাসপ্ৰভাচাতুৰী ॥95॥

সন্তাপং ৱিৰলীকৰোতু সকলং কামাক্ষি মচ্চেতনা
মজ্জন্তী মধুৰস্মিতামৰধুনীকল্লোলজালেষু তে ।
নৈৰন্তৰ্যমুপেত্য মন্মথমৰুল্লোলেষু যেষু স্ফুটং
প্ৰেমেন্দুঃ প্ৰতিবিম্বিতো ৱিতনুতে কৌতূহলং ধূৰ্জটেঃ ॥96॥

চেতঃক্ষীৰপযোধিমন্থৰচলদ্ৰাগাখ্যমন্থাচল-
ক্ষোভৱ্যাপৃতিসম্ভৱাং জননি তে মন্দস্মিতশ্ৰীসুধাম্ ।
স্ৱাদংস্ৱাদমুদীতকৌতুকৰসা নেত্ৰত্ৰযী শাঙ্কৰী
শ্ৰীকামাক্ষি নিৰন্তৰং পৰিণমত্যানন্দৱীচীমযী ॥97॥

আলোকে তৱ পঞ্চসাযকৰিপোৰুদ্দামকৌতূহল-
প্ৰেঙ্খন্মাৰুতঘট্টনপ্ৰচলিতাদানন্দদুগ্ধাম্বুধেঃ ।
কাচিদ্ৱীচিৰুদঞ্চতি প্ৰতিনৱা সংৱিত্প্ৰৰোহাত্মিকা
তাং কামাক্ষি কৱীশ্ৱৰাঃ স্মিতমিতি ৱ্যাকুৰ্ৱতে সৰ্ৱদা ॥98॥

সূক্তিঃ শীলযতে কিমদ্ৰিতনযে মন্দস্মিতাত্তে মুহুঃ
মাধুৰ্যাগমসম্প্ৰদাযমথৱা সূক্তেৰ্নু মন্দস্মিতম্ ।
ইত্থং কামপি গাহতে মম মনঃ সন্দেহমাৰ্গভ্ৰমিং
শ্ৰীকামাক্ষি ন পাৰমাৰ্থ্যসৰণিস্ফূৰ্তৌ নিধত্তে পদম্ ॥99॥

ক্ৰীডালোলকৃপাসৰোৰুহমুখীসৌধাঙ্গণেভ্যঃ কৱি-
শ্ৰেণীৱাক্পৰিপাটিকামৃতঝৰীসূতীগৃহেভ্যঃ শিৱে ।
নিৰ্ৱাণাঙ্কুৰসাৰ্ৱভৌমপদৱীসিংহাসনেভ্যস্তৱ
শ্ৰীকামাক্ষি মনোজ্ঞমন্দহসিতজ্যোতিষ্কণেভ্যো নমঃ ॥100॥

আৰ্যামেৱ ৱিভাৱযন্মনসি যঃ পাদাৰৱিন্দং পুৰঃ
পশ্যন্নাৰভতে স্তুতিং স নিযতং লব্ধ্ৱা কটাক্ষচ্ছৱিম্ ।
কামাক্ষ্যা মৃদুলস্মিতাংশুলহৰীজ্যোত্স্নাৱযস্যান্ৱিতাম্
আৰোহত্যপৱৰ্গসৌধৱলভীমানন্দৱীচীমযীম্ ॥101॥

॥ ইতি মন্দস্মিতশতকং সম্পূৰ্ণম্ ॥ ॥ ইতি শ্ৰী মূকপঞ্চশতী সম্পূৰ্ণা ॥ ॥ঔং তত্ সত্ ॥

মূক পঞ্চ শতি 5 - মন্দস্মিত শতকম্

Explore More

More Kamakshi Stotras

Explore More