নাৰাযণীযং দশক 12 - ৱৰাহাৱতাৰম্

স্ৱাযম্ভুৱো মনুৰথো জনসৰ্গশীলো
দৃষ্ট্ৱা মহীমসমযে সলিলে নিমগ্নাম্ ।
স্ৰষ্টাৰমাপ শৰণং ভৱদঙ্ঘ্ৰিসেৱা-
তুষ্টাশযং মুনিজনৈঃ সহ সত্যলোকে ॥1॥

কষ্টং প্ৰজাঃ সৃজতি ময্যৱনিৰ্নিমগ্না
স্থানং সৰোজভৱ কল্পয তত্ প্ৰজানাম্ ।
ইত্যেৱমেষ কথিতো মনুনা স্ৱযম্ভূঃ -
ৰম্ভোৰুহাক্ষ তৱ পাদযুগং ৱ্যচিন্তীত্ ॥ 2 ॥

হা হা ৱিভো জলমহং ন্যপিবং পুৰস্তা-
দদ্যাপি মজ্জতি মহী কিমহং কৰোমি ।
ইত্থং ত্ৱদঙ্ঘ্ৰিযুগলং শৰণং যতোঽস্য
নাসাপুটাত্ সমভৱঃ শিশুকোলৰূপী ।3॥
অঙ্গুষ্ঠমাত্ৰৱপুৰুত্পতিতঃ পুৰস্তাত্
ভোযোঽথ কুম্ভিসদৃশঃ সমজৃম্ভথাস্ত্ৱম্ ।
অভ্ৰে তথাৱিধমুদীক্ষ্য ভৱন্তমুচ্চৈ -
ৰ্ৱিস্মেৰতাং ৱিধিৰগাত্ সহ সূনুভিঃ স্ৱৈঃ ॥4॥

কোঽসাৱচিন্ত্যমহিমা কিটিৰুত্থিতো মে
নাসাপুটাত্ কিমু ভৱেদজিতস্য মাযা ।
ইত্থং ৱিচিন্তযতি ধাতৰি শৈলমাত্ৰঃ
সদ্যো ভৱন্ কিল জগৰ্জিথ ঘোৰঘোৰম্ ॥5॥

তং তে নিনাদমুপকৰ্ণ্য জনস্তপঃস্থাঃ
সত্যস্থিতাশ্চ মুনযো নুনুৱুৰ্ভৱন্তম্ ।
তত্স্তোত্ৰহৰ্ষুলমনাঃ পৰিণদ্য ভূয-
স্তোযাশযং ৱিপুলমূৰ্তিৰৱাতৰস্ত্ৱম্ ॥6॥

ঊৰ্ধ্ৱপ্ৰসাৰিপৰিধূম্ৰৱিধূতৰোমা
প্ৰোত্ক্ষিপ্তৱালধিৰৱাঙ্মুখঘোৰঘোণঃ ।
তূৰ্ণপ্ৰদীৰ্ণজলদঃ পৰিঘূৰ্ণদক্ষ্ণা
স্তোতৃন্ মুনীন্ শিশিৰযন্নৱতেৰিথ ত্ৱম্ ॥7॥

অন্তৰ্জলং তদনুসঙ্কুলনক্ৰচক্ৰং
ভ্ৰাম্যত্তিমিঙ্গিলকুলং কলুষোৰ্মিমালম্ ।
আৱিশ্য ভীষণৰৱেণ ৰসাতলস্থা -
নাকম্পযন্ ৱসুমতীমগৱেষযস্ত্ৱম্ ॥8॥

দৃষ্ট্ৱাঽথ দৈত্যহতকেন ৰসাতলান্তে
সংৱেশিতাং ঝটিতি কূটকিটিৰ্ৱিভো ত্ৱম্ ।
আপাতুকানৱিগণয্য সুৰাৰিখেটান্
দংষ্ট্ৰাঙ্কুৰেণ ৱসুধামদধাঃ সলীলম্ ॥9॥

অভ্যুদ্ধৰন্নথ ধৰাং দশনাগ্ৰলগ্ন
মুস্তাঙ্কুৰাঙ্কিত ইৱাধিকপীৱৰাত্মা ।
উদ্ধূতঘোৰসলিলাজ্জলধেৰুদঞ্চন্
ক্ৰীডাৱৰাহৱপুৰীশ্ৱৰ পাহি ৰোগাত্ ॥10॥