নাৰাযণীযং দশক 13 - হিৰণ্যাক্ষৱধম্

হিৰণ্যাক্ষং তাৱদ্ৱৰদ ভৱদন্ৱেষণপৰং
চৰন্তং সাংৱৰ্তে পযসি নিজজঙ্ঘাপৰিমিতে ।
ভৱদ্ভক্তো গত্ৱা কপটপটুধীৰ্নাৰদমুনিঃ
শনৈৰূচে নন্দন্ দনুজমপি নিন্দংস্তৱ বলম্ ॥1॥

স মাযাৱী ৱিষ্ণুৰ্হৰতি ভৱদীযাং ৱসুমতীং
প্ৰভো কষ্টং কষ্টং কিমিদমিতি তেনাভিগদিতঃ ।
নদন্ ক্ৱাসৌ ক্ৱাসৱিতি স মুনিনা দৰ্শিতপথো
ভৱন্তং সম্প্ৰাপদ্ধৰণিধৰমুদ্যন্তমুদকাত্ ॥2॥

অহো আৰণ্যোঽযং মৃগ ইতি হসন্তং বহুতৰৈ-
ৰ্দুৰুক্তৈৰ্ৱিধ্যন্তং দিতিসুতমৱজ্ঞায ভগৱন্ ।
মহীং দৃষ্ট্ৱা দংষ্ট্ৰাশিৰসি চকিতাং স্ৱেন মহসা
পযোধাৱাধায প্ৰসভমুদযুঙ্ক্থা মৃধৱিধৌ ॥3॥

গদাপাণৌ দৈত্যে ত্ৱমপি হি গৃহীতোন্নতগদো
নিযুদ্ধেন ক্ৰীডন্ ঘটঘটৰৱোদ্ঘুষ্টৱিযতা ।
ৰণালোকৌত্সুক্যান্মিলতি সুৰসঙ্ঘে দ্ৰুতমমুং
নিৰুন্ধ্যাঃ সন্ধ্যাতঃ প্ৰথমমিতি ধাত্ৰা জগদিষে ॥4॥

গদোন্মৰ্দে তস্মিংস্তৱ খলু গদাযাং দিতিভুৱো
গদাঘাতাদ্ভূমৌ ঝটিতি পতিতাযামহহ! ভোঃ ।
মৃদুস্মেৰাস্যস্ত্ৱং দনুজকুলনিৰ্মূলনচণং
মহাচক্ৰং স্মৃত্ৱা কৰভুৱি দধানো ৰুৰুচিষে ॥5॥

ততঃ শূলং কালপ্ৰতিমৰুষি দৈত্যে ৱিসৃজতি
ত্ৱযি ছিন্দত্যেনত্ কৰকলিতচক্ৰপ্ৰহৰণাত্ ।
সমাৰুষ্টো মুষ্ট্যা স খলু ৱিতুদংস্ত্ৱাং সমতনোত্
গলন্মাযে মাযাস্ত্ৱযি কিল জগন্মোহনকৰীঃ ॥6॥

ভৱচ্চক্ৰজ্যোতিষ্কণলৱনিপাতেন ৱিধুতে
ততো মাযাচক্ৰে ৱিততঘনৰোষান্ধমনসম্ ।
গৰিষ্ঠাভিৰ্মুষ্টিপ্ৰহৃতিভিৰভিঘ্নন্তমসুৰং
স্ৱপাদাঙ্গুষ্ঠেন শ্ৰৱণপদমূলে নিৰৱধীঃ ॥7॥

মহাকাযঃ সোঽযং তৱ চৰণপাতপ্ৰমথিতো
গলদ্ৰক্তো ৱক্ত্ৰাদপতদৃষিভিঃ শ্লাঘিতহতিঃ ।
তদা ত্ৱামুদ্দামপ্ৰমদভৰৱিদ্যোতিহৃদযা
মুনীন্দ্ৰাঃ সান্দ্ৰাভিঃ স্তুতিভিৰনুৱন্নধ্ৱৰতনুম্ ॥8॥

ত্ৱচি ছন্দো ৰোমস্ৱপি কুশগণশ্চক্ষুষি ঘৃতং
চতুৰ্হোতাৰোঽঙ্ঘ্ৰৌ স্ৰুগপি ৱদনে চোদৰ ইডা ।
গ্ৰহা জিহ্ৱাযাং তে পৰপুৰুষ কৰ্ণে চ চমসা
ৱিভো সোমো ৱীৰ্যং ৱৰদ গলদেশেঽপ্যুপসদঃ ॥9॥

মুনীন্দ্ৰৈৰিত্যাদিস্তৱনমুখৰৈৰ্মোদিতমনা
মহীযস্যা মূৰ্ত্যা ৱিমলতৰকীৰ্ত্যা চ ৱিলসন্ ।
স্ৱধিষ্ণ্যং সম্প্ৰাপ্তঃ সুখৰসৱিহাৰী মধুৰিপো
নিৰুন্ধ্যা ৰোগং মে সকলমপি ৱাতালযপতে ॥10॥