নাৰাযণীযং দশক 15 - কপিলোপদেশম্

মতিৰিহ গুণসক্তা বন্ধকৃত্তেষ্ৱসক্তা
ত্ৱমৃতকৃদুপৰুন্ধে ভক্তিযোগস্তু সক্তিম্ ।
মহদনুগমলভ্যা ভক্তিৰেৱাত্ৰ সাধ্যা
কপিলতনুৰিতি ত্ৱং দেৱহূত্যৈ ন্যগাদীঃ ॥1॥

প্ৰকৃতিমহদহঙ্কাৰাশ্চ মাত্ৰাশ্চ ভূতা-
ন্যপি হৃদপি দশাক্ষী পূৰুষঃ পঞ্চৱিংশঃ ।
ইতি ৱিদিতৱিভাগো মুচ্যতেঽসৌ প্ৰকৃত্যা
কপিলতনুৰিতি ত্ৱং দেৱহূত্যৈ ন্যগাদীঃ ॥2॥

প্ৰকৃতিগতগুণৌঘৈৰ্নাজ্যতে পূৰুষোঽযং
যদি তু সজতি তস্যাং তত্ গুণাস্তং ভজেৰন্ ।
মদনুভজনতত্ত্ৱালোচনৈঃ সাঽপ্যপেযাত্
কপিলতনুৰিতি ত্ৱং দেৱহূত্যৈ ন্যগাদীঃ ॥3॥

ৱিমলমতিৰুপাত্তৈৰাসনাদ্যৈৰ্মদঙ্গং
গৰুডসমধিৰূঢং দিৱ্যভূষাযুধাঙ্কম্ ।
ৰুচিতুলিততমালং শীলযেতানুৱেলং
কপিলতনুৰিতি ত্ৱং দেৱহূত্যৈ ন্যগাদীঃ ॥4॥

মম গুণগণলীলাকৰ্ণনৈঃ কীৰ্তনাদ্যৈ-
ৰ্মযি সুৰসৰিদোঘপ্ৰখ্যচিত্তানুৱৃত্তিঃ ।
ভৱতি পৰমভক্তিঃ সা হি মৃত্যোৰ্ৱিজেত্ৰী
কপিলতনুৰিতি ত্ৱং দেৱহূত্যৈ ন্যগাদীঃ ॥5॥

অহহ বহুলহিংসাসঞ্চিতাৰ্থৈঃ কুটুম্বং
প্ৰতিদিনমনুপুষ্ণন্ স্ত্ৰীজিতো বাললালী ।
ৱিশতি হি গৃহসক্তো যাতনাং ময্যভক্তঃ
কপিলতনুৰিতিত্ৱং দেৱহূত্যৈ ন্যগাদীঃ ॥6॥

যুৱতিজঠৰখিন্নো জাতবোধোঽপ্যকাণ্ডে
প্ৰসৱগলিতবোধঃ পীডযোল্লঙ্ঘ্য বাল্যম্ ।
পুনৰপি বত মুহ্যত্যেৱ তাৰুণ্যকালে
কপিলতনুৰিতি ত্ৱং দেৱহূত্যৈ ন্যগাদীঃ ॥7॥

পিতৃসুৰগণযাজী ধাৰ্মিকো যো গৃহস্থঃ
স চ নিপততি কালে দক্ষিণাধ্ৱোপগামী ।
মযি নিহিতমকামং কৰ্ম তূদক্পথাৰ্থং
কপিল্তনুৰিতি ত্ৱং দেৱহূত্যৈ ন্যগাদীঃ ॥8॥

ইতি সুৱিদিতৱেদ্যাং দেৱ হে দেৱহূতিং
কৃতনুতিমনুগৃহ্য ত্ৱং গতো যোগিসঙ্ঘৈঃ ।
ৱিমলমতিৰথাঽসৌ ভক্তিযোগেন মুক্তা
ত্ৱমপি জনহিতাৰ্থং ৱৰ্তসে প্ৰাগুদীচ্যাম্ ॥9॥

পৰম কিমু বহূক্ত্যা ত্ৱত্পদাম্ভোজভক্তিং
সকলভযৱিনেত্ৰীং সৰ্ৱকামোপনেত্ৰীম্ ।
ৱদসি খলু দৃঢং ত্ৱং তদ্ৱিধূযামযান্ মে
গুৰুপৱনপুৰেশ ত্ৱয্যুপাধত্স্ৱ ভক্তিম্ ॥10॥