ନାରାଯଣୀଯଂ ଦଶକ 16 - ନରନାରାଯଣାଵତାରଂ ତଥା ଦକ୍ଷଯାଗଃ

ଦକ୍ଷୋ ଵିରିଞ୍ଚତନଯୋଽଥ ମନୋସ୍ତନୂଜାଂ
ଲବ୍ଧ୍ଵା ପ୍ରସୂତିମିହ ଷୋଡଶ ଚାପ କନ୍ଯାଃ ।
ଧର୍ମେ ତ୍ରଯୋଦଶ ଦଦୌ ପିତୃଷୁ ସ୍ଵଧାଂ ଚ
ସ୍ଵାହାଂ ହଵିର୍ଭୁଜି ସତୀଂ ଗିରିଶେ ତ୍ଵଦଂଶେ ॥1॥

ମୂର୍ତିର୍ହି ଧର୍ମଗୃହିଣୀ ସୁଷୁଵେ ଭଵନ୍ତଂ
ନାରାଯଣଂ ନରସଖଂ ମହିତାନୁଭାଵମ୍ ।
ଯଜ୍ଜନ୍ମନି ପ୍ରମୁଦିତାଃ କୃତତୂର୍ଯଘୋଷାଃ
ପୁଷ୍ପୋତ୍କରାନ୍ ପ୍ରଵଵୃଷୁର୍ନୁନୁଵୁଃ ସୁରୌଘାଃ ॥2॥

ଦୈତ୍ଯଂ ସହସ୍ରକଵଚଂ କଵଚୈଃ ପରୀତଂ
ସାହସ୍ରଵତ୍ସରତପସ୍ସମରାଭିଲଵ୍ଯୈଃ ।
ପର୍ଯାଯନିର୍ମିତତପସ୍ସମରୌ ଭଵନ୍ତୌ
ଶିଷ୍ଟୈକକଙ୍କଟମମୁଂ ନ୍ଯହତାଂ ସଲୀଲମ୍ ॥3॥

ଅନ୍ଵାଚରନ୍ନୁପଦିଶନ୍ନପି ମୋକ୍ଷଧର୍ମଂ
ତ୍ଵଂ ଭ୍ରାତୃମାନ୍ ବଦରିକାଶ୍ରମମଧ୍ଯଵାତ୍ସୀଃ ।
ଶକ୍ରୋଽଥ ତେ ଶମତପୋବଲନିସ୍ସହାତ୍ମା
ଦିଵ୍ଯାଙ୍ଗନାପରିଵୃତଂ ପ୍ରଜିଘାଯ ମାରମ୍ ॥4॥

କାମୋ ଵସନ୍ତମଲଯାନିଲବନ୍ଧୁଶାଲୀ
କାନ୍ତାକଟାକ୍ଷଵିଶିଖୈର୍ଵିକସଦ୍ଵିଲାସୈଃ ।
ଵିଧ୍ଯନ୍ମୁହୁର୍ମୁହୁରକମ୍ପମୁଦୀକ୍ଷ୍ଯ ଚ ତ୍ଵାଂ
ଭୀରୁସ୍ତ୍ଵଯାଽଥ ଜଗଦେ ମୃଦୁହାସଭାଜା ॥5॥

ଭୀତ୍ଯାଽଲମଙ୍ଗଜ ଵସନ୍ତ ସୁରାଙ୍ଗନା ଵୋ
ମନ୍ମାନସଂ ତ୍ଵିହ ଜୁଷଧ୍ଵମିତି ବ୍ରୁଵାଣଃ ।
ତ୍ଵଂ ଵିସ୍ମଯେନ ପରିତଃ ସ୍ତୁଵତାମଥୈଷାଂ
ପ୍ରାଦର୍ଶଯଃ ସ୍ଵପରିଚାରକକାତରାକ୍ଷୀଃ ॥6॥

ସମ୍ମୋହନାଯ ମିଲିତା ମଦନାଦଯସ୍ତେ
ତ୍ଵଦ୍ଦାସିକାପରିମଲୈଃ କିଲ ମୋହମାପୁଃ ।
ଦତ୍ତାଂ ତ୍ଵଯା ଚ ଜଗୃହୁସ୍ତ୍ରପଯୈଵ ସର୍ଵ-
ସ୍ଵର୍ଵାସିଗର୍ଵଶମନୀଂ ପୁନରୁର୍ଵଶୀଂ ତାମ୍ ॥7॥

ଦୃଷ୍ଟ୍ଵୋର୍ଵଶୀଂ ତଵ କଥାଂ ଚ ନିଶମ୍ଯ ଶକ୍ରଃ
ପର୍ଯାକୁଲୋଽଜନି ଭଵନ୍ମହିମାଵମର୍ଶାତ୍ ।
ଏଵଂ ପ୍ରଶାନ୍ତରମଣୀଯତରାଵତାରା-
ତ୍ତ୍ଵତ୍ତୋଽଧିକୋ ଵରଦ କୃଷ୍ଣତନୁସ୍ତ୍ଵମେଵ ॥8॥

ଦକ୍ଷସ୍ତୁ ଧାତୁରତିଲାଲନଯା ରଜୋଽନ୍ଧୋ
ନାତ୍ଯାଦୃତସ୍ତ୍ଵଯି ଚ କଷ୍ଟମଶାନ୍ତିରାସୀତ୍ ।
ଯେନ ଵ୍ଯରୁନ୍ଧ ସ ଭଵତ୍ତନୁମେଵ ଶର୍ଵଂ
ଯଜ୍ଞେ ଚ ଵୈରପିଶୁନେ ସ୍ଵସୁତାଂ ଵ୍ଯମାନୀତ୍ ॥9॥

କ୍ରୁଦ୍ଧେଶମର୍ଦିତମଖଃ ସ ତୁ କୃତ୍ତଶୀର୍ଷୋ
ଦେଵପ୍ରସାଦିତହରାଦଥ ଲବ୍ଧଜୀଵଃ ।
ତ୍ଵତ୍ପୂରିତକ୍ରତୁଵରଃ ପୁନରାପ ଶାନ୍ତିଂ
ସ ତ୍ଵଂ ପ୍ରଶାନ୍ତିକର ପାହି ମରୁତ୍ପୁରେଶ ॥10॥