ନାରାଯଣୀଯଂ ଦଶକ 18 - ପୃଥୁଚରିତମ୍

ଜାତସ୍ଯ ଧ୍ରୁଵକୁଲ ଏଵ ତୁଙ୍ଗକୀର୍ତେ-
ରଙ୍ଗସ୍ଯ ଵ୍ଯଜନି ସୁତଃ ସ ଵେନନାମା ।
ଯଦ୍ଦୋଷଵ୍ଯଥିତମତିଃ ସ ରାଜଵର୍ଯ-
ସ୍ତ୍ଵତ୍ପାଦେ ନିହିତମନା ଵନଂ ଗତୋଽଭୂତ୍ ॥1॥

ପାପୋଽପି କ୍ଷିତିତଲପାଲନାଯ ଵେନଃ
ପୌରାଦ୍ଯୈରୁପନିହିତଃ କଠୋରଵୀର୍ଯଃ ।
ସର୍ଵେଭ୍ଯୋ ନିଜବଲମେଵ ସମ୍ପ୍ରଶଂସନ୍
ଭୂଚକ୍ରେ ତଵ ଯଜନାନ୍ଯଯଂ ନ୍ଯରୌତ୍ସୀତ୍ ॥2॥

ସମ୍ପ୍ରାପ୍ତେ ହିତକଥନାଯ ତାପସୌଘେ
ମତ୍ତୋଽନ୍ଯୋ ଭୁଵନପତିର୍ନ କଶ୍ଚନେତି ।
ତ୍ଵନ୍ନିନ୍ଦାଵଚନପରୋ ମୁନୀଶ୍ଵରୈସ୍ତୈଃ
ଶାପାଗ୍ନୌ ଶଲଭଦଶାମନାଯି ଵେନଃ ॥3॥

ତନ୍ନାଶାତ୍ ଖଲଜନଭୀରୁକୈର୍ମୁନୀନ୍ଦ୍ରୈ-
ସ୍ତନ୍ମାତ୍ରା ଚିରପରିରକ୍ଷିତେ ତଦଙ୍ଗେ ।
ତ୍ଯକ୍ତାଘେ ପରିମଥିତାଦଥୋରୁଦଣ୍ଡା-
ଦ୍ଦୋର୍ଦଣ୍ଡେ ପରିମଥିତେ ତ୍ଵମାଵିରାସୀଃ ॥4॥

ଵିଖ୍ଯାତଃ ପୃଥୁରିତି ତାପସୋପଦିଷ୍ଟୈଃ
ସୂତାଦ୍ଯୈଃ ପରିଣୁତଭାଵିଭୂରିଵୀର୍ଯଃ ।
ଵେନାର୍ତ୍ଯା କବଲିତସମ୍ପଦଂ ଧରିତ୍ରୀ-
ମାକ୍ରାନ୍ତାଂ ନିଜଧନୁଷା ସମାମକାର୍ଷୀଃ ॥5॥

ଭୂଯସ୍ତାଂ ନିଜକୁଲମୁଖ୍ଯଵତ୍ସଯୁକ୍ତ୍ଯୈ-
ର୍ଦେଵାଦ୍ଯୈଃ ସମୁଚିତଚାରୁଭାଜନେଷୁ ।
ଅନ୍ନାଦୀନ୍ଯଭିଲଷିତାନି ଯାନି ତାନି
ସ୍ଵଚ୍ଛନ୍ଦଂ ସୁରଭିତନୂମଦୂଦୁହସ୍ତ୍ଵମ୍ ॥6॥

ଆତ୍ମାନଂ ଯଜତି ମଖୈସ୍ତ୍ଵଯି ତ୍ରିଧାମ-
ନ୍ନାରବ୍ଧେ ଶତତମଵାଜିମେଧଯାଗେ ।
ସ୍ପର୍ଧାଲୁଃ ଶତମଖ ଏତ୍ଯ ନୀଚଵେଷୋ
ହୃତ୍ଵାଽଶ୍ଵଂ ତଵ ତନଯାତ୍ ପରାଜିତୋଽଭୂତ୍ ॥7॥

ଦେଵେନ୍ଦ୍ରଂ ମୁହୁରିତି ଵାଜିନଂ ହରନ୍ତଂ
ଵହ୍ନୌ ତଂ ମୁନିଵରମଣ୍ଡଲେ ଜୁହୂଷୌ ।
ରୁନ୍ଧାନେ କମଲଭଵେ କ୍ରତୋଃ ସମାପ୍ତୌ
ସାକ୍ଷାତ୍ତ୍ଵଂ ମଧୁରିପୁମୈକ୍ଷଥାଃ ସ୍ଵଯଂ ସ୍ଵମ୍ ॥8॥

ତଦ୍ଦତ୍ତଂ ଵରମୁପଲଭ୍ଯ ଭକ୍ତିମେକାଂ
ଗଙ୍ଗାନ୍ତେ ଵିହିତପଦଃ କଦାପି ଦେଵ ।
ସତ୍ରସ୍ଥଂ ମୁନିନିଵହଂ ହିତାନି ଶଂସ-
ନ୍ନୈକ୍ଷିଷ୍ଠାଃ ସନକମୁଖାନ୍ ମୁନୀନ୍ ପୁରସ୍ତାତ୍ ॥9॥

ଵିଜ୍ଞାନଂ ସନକମୁଖୋଦିତଂ ଦଧାନଃ
ସ୍ଵାତ୍ମାନଂ ସ୍ଵଯମଗମୋ ଵନାନ୍ତସେଵୀ ।
ତତ୍ତାଦୃକ୍ପୃଥୁଵପୁରୀଶ ସତ୍ଵରଂ ମେ
ରୋଗୌଘଂ ପ୍ରଶମଯ ଵାତଗେହଵାସିନ୍ ॥10॥