নাৰাযণীযং দশক 2 - ভগৱতঃ স্ৱৰূপমাধুৰ্যং তথা ভক্তিমহত্ত্ৱম্

সূৰ্যস্পৰ্ধিকিৰীটমূৰ্ধ্ৱতিলকপ্ৰোদ্ভাসিফালান্তৰং
কাৰুণ্যাকুলনেত্ৰমাৰ্দ্ৰহসিতোল্লাসং সুনাসাপুটম্।
গণ্ডোদ্যন্মকৰাভকুণ্ডলযুগং কণ্ঠোজ্ৱলত্কৌস্তুভং
ত্ৱদ্ৰূপং ৱনমাল্যহাৰপটলশ্ৰীৱত্সদীপ্ৰং ভজে॥1॥

কেযূৰাঙ্গদকঙ্কণোত্তমমহাৰত্নাঙ্গুলীযাঙ্কিত-
শ্ৰীমদ্বাহুচতুষ্কসঙ্গতগদাশঙ্খাৰিপঙ্কেৰুহাম্ ।
কাঞ্চিত্ কাঞ্চনকাঞ্চিলাঞ্চ্ছিতলসত্পীতাম্বৰালম্বিনী-
মালম্বে ৱিমলাম্বুজদ্যুতিপদাং মূৰ্তিং তৱাৰ্তিচ্ছিদম্ ॥2॥

যত্ত্ত্ৰৈলোক্যমহীযসোঽপি মহিতং সম্মোহনং মোহনাত্
কান্তং কান্তিনিধানতোঽপি মধুৰং মাধুৰ্যধুৰ্যাদপি ।
সৌন্দৰ্যোত্তৰতোঽপি সুন্দৰতৰং ত্ৱদ্ৰূপমাশ্চৰ্যতোঽ-
প্যাশ্চৰ্যং ভুৱনে ন কস্য কুতুকং পুষ্ণাতি ৱিষ্ণো ৱিভো ॥3॥

তত্তাদৃঙ্মধুৰাত্মকং তৱ ৱপুঃ সম্প্ৰাপ্য সম্পন্মযী
সা দেৱী পৰমোত্সুকা চিৰতৰং নাস্তে স্ৱভক্তেষ্ৱপি ।
তেনাস্যা বত কষ্টমচ্যুত ৱিভো ত্ৱদ্ৰূপমানোজ্ঞক -
প্ৰেমস্থৈৰ্যমযাদচাপলবলাচ্চাপল্যৱাৰ্তোদভূত্ ॥4॥

লক্ষ্মীস্তাৱকৰামণীযকহৃতৈৱেযং পৰেষ্ৱস্থিৰে-
ত্যস্মিন্নন্যদপি প্ৰমাণমধুনা ৱক্ষ্যামি লক্ষ্মীপতে ।
যে ত্ৱদ্ধ্যানগুণানুকীৰ্তনৰসাসক্তা হি ভক্তা জনা-
স্তেষ্ৱেষা ৱসতি স্থিৰৈৱ দযিতপ্ৰস্তাৱদত্তাদৰা ॥5॥

এৱম্ভূতমনোজ্ঞতানৱসুধানিষ্যন্দসন্দোহনং
ত্ৱদ্ৰূপং পৰচিদ্ৰসাযনমযং চেতোহৰং শৃণ্ৱতাম্ ।
সদ্যঃ প্ৰেৰযতে মতিং মদযতে ৰোমাঞ্চযত্যঙ্গকং
ৱ্যাসিঞ্চত্যপি শীতৱাষ্পৱিসৰৈৰানন্দমূৰ্ছোদ্ভৱৈঃ ॥6॥

এৱম্ভূততযা হি ভক্ত্যভিহিতো যোগস্স যোগদ্ৱযাত্
কৰ্মজ্ঞানমযাত্ ভৃশোত্তমতৰো যোগীশ্ৱৰৈৰ্গীযতে ।
সৌন্দৰ্যৈকৰসাত্মকে ত্ৱযি খলু প্ৰেমপ্ৰকৰ্ষাত্মিকা
ভক্তিৰ্নিশ্ৰমমেৱ ৱিশ্ৱপুৰুষৈৰ্লভ্যা ৰমাৱল্লভ ॥7॥

নিষ্কামং নিযতস্ৱধৰ্মচৰণং যত্ কৰ্মযোগাভিধং
তদ্দূৰেত্যফলং যদৌপনিষদজ্ঞানোপলভ্যং পুনঃ ।
তত্ত্ৱৱ্যক্ততযা সুদুৰ্গমতৰং চিত্তস্য তস্মাদ্ৱিভো
ত্ৱত্প্ৰেমাত্মকভক্তিৰেৱ সততং স্ৱাদীযসী শ্ৰেযসী ॥8॥

অত্যাযাসকৰাণি কৰ্মপটলান্যাচৰ্য নিৰ্যন্মলা
বোধে ভক্তিপথেঽথৱাঽপ্যুচিততামাযান্তি কিং তাৱতা ।
ক্লিষ্ট্ৱা তৰ্কপথে পৰং তৱ ৱপুৰ্ব্ৰহ্মাখ্যমন্যে পুন-
শ্চিত্তাৰ্দ্ৰত্ৱমৃতে ৱিচিন্ত্য বহুভিস্সিদ্ধ্যন্তি জন্মান্তৰৈঃ ॥9॥

ত্ৱদ্ভক্তিস্তু কথাৰসামৃতঝৰীনিৰ্মজ্জনেন স্ৱযং
সিদ্ধ্যন্তী ৱিমলপ্ৰবোধপদৱীমক্লেশতস্তন্ৱতী ।
সদ্যস্সিদ্ধিকৰী জযত্যযি ৱিভো সৈৱাস্তু মে ত্ৱত্পদ-
প্ৰেমপ্ৰৌঢিৰসাৰ্দ্ৰতা দ্ৰুততৰং ৱাতালযাধীশ্ৱৰ ॥10॥