নাৰাযণীযং দশক 24 - প্ৰহ্লাদচৰিতম্

হিৰণ্যাক্ষে পোত্ৰিপ্ৰৱৰৱপুষা দেৱ ভৱতা
হতে শোকক্ৰোধগ্লপিতধৃতিৰেতস্য সহজঃ ।
হিৰণ্যপ্ৰাৰম্ভঃ কশিপুৰমৰাৰাতিসদসি
প্ৰতিজ্ঞমাতেনে তৱ কিল ৱধাৰ্থং মধুৰিপো ॥1॥

ৱিধাতাৰং ঘোৰং স খলু তপসিত্ৱা নচিৰতঃ
পুৰঃ সাক্ষাত্কুৰ্ৱন্ সুৰনৰমৃগাদ্যৈৰনিধনম্ ।
ৱৰং লব্ধ্ৱা দৃপ্তো জগদিহ ভৱন্নাযকমিদং
পৰিক্ষুন্দন্নিন্দ্ৰাদহৰত দিৱং ত্ৱামগণযন্ ॥2॥

নিহন্তুং ত্ৱাং ভূযস্তৱ পদমৱাপ্তস্য চ ৰিপো-
ৰ্বহিৰ্দৃষ্টেৰন্তৰ্দধিথ হৃদযে সূক্ষ্মৱপুষা ।
নদন্নুচ্চৈস্তত্ৰাপ্যখিলভুৱনান্তে চ মৃগযন্
ভিযা যাতং মত্ৱা স খলু জিতকাশী নিৱৱৃতে ॥3॥

ততোঽস্য প্ৰহ্লাদঃ সমজনি সুতো গৰ্ভৱসতৌ
মুনেৰ্ৱীণাপাণেৰধিগতভৱদ্ভক্তিমহিমা ।
স ৱৈ জাত্যা দৈত্যঃ শিশুৰপি সমেত্য ত্ৱযি ৰতিং
গতস্ত্ৱদ্ভক্তানাং ৱৰদ পৰমোদাহৰণতাম্ ॥4॥

সুৰাৰীণাং হাস্যং তৱ চৰণদাস্যং নিজসুতে
স দৃষ্ট্ৱা দুষ্টাত্মা গুৰুভিৰশিশিক্ষচ্চিৰমমুম্ ।
গুৰুপ্ৰোক্তং চাসাৱিদমিদমভদ্ৰায দৃঢমি-
ত্যপাকুৰ্ৱন্ সৰ্ৱং তৱ চৰণভক্ত্যৈৱ ৱৱৃধে ॥ 5 ॥

অধীতেষু শ্ৰেষ্ঠং কিমিতি পৰিপৃষ্টেঽথ তনযে
ভৱদ্ভক্তিং ৱৰ্যামভিগদতি পৰ্যাকুলধৃতিঃ ।
গুৰুভ্যো ৰোষিত্ৱা সহজমতিৰস্যেত্যভিৱিদন্
ৱধোপাযানস্মিন্ ৱ্যতনুত ভৱত্পাদশৰণে ॥6॥

স শূলৈৰাৱিদ্ধঃ সুবহু মথিতো দিগ্গজগণৈ-
ৰ্মহাসৰ্পৈৰ্দষ্টোঽপ্যনশনগৰাহাৰৱিধুতঃ ।
গিৰীন্দ্ৰৱক্ষিপ্তোঽপ্যহহ! পৰমাত্মন্নযি ৱিভো
ত্ৱযি ন্যস্তাত্মত্ৱাত্ কিমপি ন নিপীডামভজত ॥7॥

ততঃ শঙ্কাৱিষ্টঃ স পুনৰতিদুষ্টোঽস্য জনকো
গুৰূক্ত্যা তদ্গেহে কিল ৱৰুণপাশৈস্তমৰুণত্ ।
গুৰোশ্চাসান্নিধ্যে স পুনৰনুগান্ দৈত্যতনযান্
ভৱদ্ভক্তেস্তত্ত্ৱং পৰমমপি ৱিজ্ঞানমশিষত্ ॥8॥

পিতা শৃণ্ৱন্ বালপ্ৰকৰমখিলং ত্ৱত্স্তুতিপৰং
ৰুষান্ধঃ প্ৰাহৈনং কুলহতক কস্তে বলমিতি ।
বলং মে ৱৈকুণ্ঠস্তৱ চ জগতাং চাপি স বলং
স এৱ ত্ৰৈলোক্যং সকলমিতি ধীৰোঽযমগদীত্ ॥9॥

অৰে ক্ৱাসৌ ক্ৱাসৌ সকলজগদাত্মা হৰিৰিতি
প্ৰভিন্তে স্ম স্তম্ভং চলিতকৰৱালো দিতিসুতঃ ।
অতঃ পশ্চাদ্ৱিষ্ণো ন হি ৱদিতুমীশোঽস্মি সহসা
কৃপাত্মন্ ৱিশ্ৱাত্মন্ পৱনপুৰৱাসিন্ মৃডয মাম্ ॥10॥