ନାରାଯଣୀଯଂ ଦଶକ 29 - ମୋହିନ୍ଯଵତାରଂ ଆଦି

ଉଦ୍ଗଚ୍ଛତସ୍ତଵ କରାଦମୃତଂ ହରତ୍ସୁ
ଦୈତ୍ଯେଷୁ ତାନଶରଣାନନୁନୀଯ ଦେଵାନ୍ ।
ସଦ୍ଯସ୍ତିରୋଦଧିଥ ଦେଵ ଭଵତ୍ପ୍ରଭାଵା-
ଦୁଦ୍ଯତ୍ସ୍ଵଯୂଥ୍ଯକଲହା ଦିତିଜା ବଭୂଵୁଃ ॥1॥

ଶ୍ଯାମାଂ ରୁଚାଽପି ଵଯସାଽପି ତନୁଂ ତଦାନୀଂ
ପ୍ରାପ୍ତୋଽସି ତୁଙ୍ଗକୁଚମଣ୍ଡଲଭଙ୍ଗୁରାଂ ତ୍ଵମ୍ ।
ପୀଯୂଷକୁମ୍ଭକଲହଂ ପରିମୁଚ୍ଯ ସର୍ଵେ
ତୃଷ୍ଣାକୁଲାଃ ପ୍ରତିଯଯୁସ୍ତ୍ଵଦୁରୋଜକୁମ୍ଭେ ॥2॥

କା ତ୍ଵଂ ମୃଗାକ୍ଷି ଵିଭଜସ୍ଵ ସୁଧାମିମାମି-
ତ୍ଯାରୂଢରାଗଵିଵଶାନଭିଯାଚତୋଽମୂନ୍ ।
ଵିଶ୍ଵସ୍ଯତେ ମଯି କଥଂ କୁଲଟାଽସ୍ମି ଦୈତ୍ଯା
ଇତ୍ଯାଲପନ୍ନପି ସୁଵିଶ୍ଵସିତାନତାନୀଃ ॥3॥

ମୋଦାତ୍ ସୁଧାକଲଶମେଷୁ ଦଦତ୍ସୁ ସା ତ୍ଵଂ
ଦୁଶ୍ଚେଷ୍ଟିତଂ ମମ ସହଧ୍ଵମିତି ବ୍ରୁଵାଣା ।
ପଙ୍କ୍ତିପ୍ରଭେଦଵିନିଵେଶିତଦେଵଦୈତ୍ଯା
ଲୀଲାଵିଲାସଗତିଭିଃ ସମଦାଃ ସୁଧାଂ ତାମ୍ ॥4॥

ଅସ୍ମାସ୍ଵିଯଂ ପ୍ରଣଯିଣୀତ୍ଯସୁରେଷୁ ତେଷୁ
ଜୋଷଂ ସ୍ଥିତେଷ୍ଵଥ ସମାପ୍ଯ ସୁଧାଂ ସୁରେଷୁ ।
ତ୍ଵଂ ଭକ୍ତଲୋକଵଶଗୋ ନିଜରୂପମେତ୍ଯ
ସ୍ଵର୍ଭାନୁମର୍ଧପରିପୀତସୁଧଂ ଵ୍ଯଲାଵୀଃ ॥5॥

ତ୍ଵତ୍ତଃ ସୁଧାହରଣଯୋଗ୍ଯଫଲଂ ପରେଷୁ
ଦତ୍ଵା ଗତେ ତ୍ଵଯି ସୁରୈଃ ଖଲୁ ତେ ଵ୍ଯଗୃହ୍ଣନ୍ ।
ଘୋରେଽଥ ମୂର୍ଛତି ରଣେ ବଲିଦୈତ୍ଯମାଯା-
ଵ୍ଯାମୋହିତେ ସୁରଗଣେ ତ୍ଵମିହାଵିରାସୀଃ ॥6॥

ତ୍ଵଂ କାଲନେମିମଥ ମାଲିମୁଖାଞ୍ଜଘନ୍ଥ
ଶକ୍ରୋ ଜଘାନ ବଲିଜମ୍ଭଵଲାନ୍ ସପାକାନ୍ ।
ଶୁଷ୍କାର୍ଦ୍ରଦୁଷ୍କରଵଧେ ନମୁଚୌ ଚ ଲୂନେ
ଫେନେନ ନାରଦଗିରା ନ୍ଯରୁଣୋ ରଣଂ ତ୍ଵମ୍ ॥7॥

ଯୋଷାଵପୁର୍ଦନୁଜମୋହନମାହିତଂ ତେ
ଶ୍ରୁତ୍ଵା ଵିଲୋକନକୁତୂହଲଵାନ୍ ମହେଶଃ ।
ଭୂତୈସ୍ସମଂ ଗିରିଜଯା ଚ ଗତଃ ପଦଂ ତେ
ସ୍ତୁତ୍ଵାଽବ୍ରଵୀଦଭିମତଂ ତ୍ଵମଥୋ ତିରୋଧାଃ ॥8॥

ଆରାମସୀମନି ଚ କନ୍ଦୁକଘାତଲୀଲା-
ଲୋଲାଯମାନନଯନାଂ କମନୀଂ ମନୋଜ୍ଞାମ୍ ।
ତ୍ଵାମେଷ ଵୀକ୍ଷ୍ଯ ଵିଗଲଦ୍ଵସନାଂ ମନୋଭୂ-
ଵେଗାଦନଙ୍ଗରିପୁରଙ୍ଗ ସମାଲିଲିଙ୍ଗ ॥9॥

ଭୂଯୋଽପି ଵିଦ୍ରୁତଵତୀମୁପଧାଵ୍ଯ ଦେଵୋ
ଵୀର୍ଯପ୍ରମୋକ୍ଷଵିକସତ୍ପରମାର୍ଥବୋଧଃ ।
ତ୍ଵନ୍ମାନିତସ୍ତଵ ମହତ୍ତ୍ଵମୁଵାଚ ଦେଵ୍ଯୈ
ତତ୍ତାଦୃଶସ୍ତ୍ଵମଵ ଵାତନିକେତନାଥ ॥10॥