নাৰাযণীযং দশক 31 - বলিদৰ্পহৰণম্

প্ৰীত্যা দৈত্যস্তৱ তনুমহঃপ্ৰেক্ষণাত্ সৰ্ৱথাঽপি
ত্ৱামাৰাধ্যন্নজিত ৰচযন্নঞ্জলিং সঞ্জগাদ ।
মত্তঃ কিং তে সমভিলষিতং ৱিপ্ৰসূনো ৱদ ত্ৱং
ৱিত্তং ভক্তং ভৱনমৱনীং ৱাঽপি সৰ্ৱং প্ৰদাস্যে ॥1॥

তামীক্ষণাং বলিগিৰমুপাকৰ্ণ্য কাৰুণ্যপূৰ্ণোঽ-
প্যস্যোত্সেকং শমযিতুমনা দৈত্যৱংশং প্ৰশংসন্ ।
ভূমিং পাদত্ৰযপৰিমিতাং প্ৰাৰ্থযামাসিথ ত্ৱং
সৰ্ৱং দেহীতি তু নিগদিতে কস্য হাস্যং ন ৱা স্যাত্ ॥2॥

ৱিশ্ৱেশং মাং ত্ৰিপদমিহ কিং যাচসে বালিশস্ত্ৱং
সৰ্ৱাং ভূমিং ৱৃণু কিমমুনেত্যালপত্ত্ৱাং স দৃপ্যন্ ।
যস্মাদ্দৰ্পাত্ ত্ৰিপদপৰিপূৰ্ত্যক্ষমঃ ক্ষেপৱাদান্
বন্ধং চাসাৱগমদতদৰ্হোঽপি গাঢোপশান্ত্যৈ ॥3॥

পাদত্ৰয্যা যদি ন মুদিতো ৱিষ্টপৈৰ্নাপি তুষ্যে-
দিত্যুক্তেঽস্মিন্ ৱৰদ ভৱতে দাতুকামেঽথ তোযম্ ।
দৈত্যাচাৰ্যস্তৱ খলু পৰীক্ষাৰ্থিনঃ প্ৰেৰণাত্তং
মা মা দেযং হৰিৰযমিতি ৱ্যক্তমেৱাবভাষে ॥4॥

যাচত্যেৱং যদি স ভগৱান্ পূৰ্ণকামোঽস্মি সোঽহং
দাস্যাম্যেৱ স্থিৰমিতি ৱদন্ কাৱ্যশপ্তোঽপি দৈত্যঃ ।
ৱিন্ধ্যাৱল্যা নিজদযিতযা দত্তপাদ্যায তুভ্যং
চিত্ৰং চিত্ৰং সকলমপি স প্ৰাৰ্পযত্তোযপূৰ্ৱম্ ॥5॥

নিস্সন্দেহং দিতিকুলপতৌ ত্ৱয্যশেষাৰ্পণং তদ্-
ৱ্যাতন্ৱানে মুমুচুঃ-ঋষযঃ সামৰাঃ পুষ্পৱৰ্ষম্ ।
দিৱ্যং ৰূপং তৱ চ তদিদং পশ্যতাং ৱিশ্ৱভাজা-
মুচ্চৈৰুচ্চৈৰৱৃধদৱধীকৃত্য ৱিশ্ৱাণ্ডভাণ্ডম্ ॥6॥

ত্ৱত্পাদাগ্ৰং নিজপদগতং পুণ্ডৰীকোদ্ভৱোঽসৌ
কুণ্ডীতোযৈৰসিচদপুনাদ্যজ্জলং ৱিশ্ৱলোকান্ ।
হৰ্ষোত্কৰ্ষাত্ সুবহু ননৃতে খেচৰৈৰুত্সৱেঽস্মিন্
ভেৰীং নিঘ্নন্ ভুৱনমচৰজ্জাম্বৱান্ ভক্তিশালী ॥7॥

তাৱদ্দৈত্যাস্ত্ৱনুমতিমৃতে ভৰ্তুৰাৰব্ধযুদ্ধা
দেৱোপেতৈৰ্ভৱদনুচৰৈস্সঙ্গতা ভঙ্গমাপন্ ।
কালাত্মাঽযং ৱসতি পুৰতো যদ্ৱশাত্ প্ৰাগ্জিতাঃ স্মঃ
কিং ৱো যুদ্ধৈৰিতি বলিগিৰা তেঽথ পাতালমাপুঃ ॥8॥

পাশৈৰ্বদ্ধং পতগপতিনা দৈত্যমুচ্চৈৰৱাদী-
স্তাৰ্ত্তীযীকং দিশ মম পদং কিং ন ৱিশ্ৱেশ্ৱৰোঽসি ।
পাদং মূৰ্ধ্নি প্ৰণয ভগৱন্নিত্যকম্পং ৱদন্তং
প্ৰহ্লাদ্স্তং স্ৱযমুপগতো মানযন্নস্তৱীত্ত্ৱাম্ ॥9॥

দৰ্পোচ্ছিত্ত্যৈ ৱিহিতমখিলং দৈত্য সিদ্ধোঽসি পুণ্যৈ-
ৰ্লোকস্তেঽস্তু ত্ৰিদিৱৱিজযী ৱাসৱত্ৱং চ পশ্চাত্ ।
মত্সাযুজ্যং ভজ চ পুনৰিত্যন্ৱগৃহ্ণা বলিং তং
ৱিপ্ৰৈস্সন্তানিতমখৱৰঃ পাহি ৱাতালযেশ ॥10॥