নাৰাযণীযং দশক 33 - অম্বৰীষচৰিতম্

ৱৈৱস্ৱতাখ্যমনুপুত্ৰনভাগজাত-
নাভাগনামকনৰেন্দ্ৰসুতোঽম্বৰীষঃ ।
সপ্তাৰ্ণৱাৱৃতমহীদযিতোঽপি ৰেমে
ত্ৱত্সঙ্গিষু ত্ৱযি চ মগ্নমনাস্সদৈৱ ॥1॥

ত্ৱত্প্ৰীতযে সকলমেৱ ৱিতন্ৱতোঽস্য
ভক্ত্যৈৱ দেৱ নচিৰাদভৃথাঃ প্ৰসাদম্ ।
যেনাস্য যাচনমৃতেঽপ্যভিৰক্ষণাৰ্থং
চক্ৰং ভৱান্ প্ৰৱিততাৰ সহস্ৰধাৰম্ ॥2॥

স দ্ৱাদশীৱ্ৰতমথো ভৱদৰ্চনাৰ্থং
ৱৰ্ষং দধৌ মধুৱনে যমুনোপকণ্ঠে ।
পত্ন্যা সমং সুমনসা মহতীং ৱিতন্ৱন্
পূজাং দ্ৱিজেষু ৱিসৃজন্ পশুষষ্টিকোটিম্ ॥3॥

তত্ৰাথ পাৰণদিনে ভৱদৰ্চনান্তে
দুৰ্ৱাসসাঽস্য মুনিনা ভৱনং প্ৰপেদে ।
ভোক্তুং ৱৃতশ্চস নৃপেণ পৰাৰ্তিশীলো
মন্দং জগাম যমুনাং নিযমান্ৱিধাস্যন্ ॥4॥

ৰাজ্ঞাঽথ পাৰণমুহূৰ্তসমাপ্তিখেদা-
দ্ৱাৰৈৱ পাৰণমকাৰি ভৱত্পৰেণ ।
প্ৰাপ্তো মুনিস্তদথ দিৱ্যদৃশা ৱিজানন্
ক্ষিপ্যন্ ক্ৰুধোদ্ধৃতজটো ৱিততান কৃত্যাম্ ॥5॥

কৃত্যাং চ তামসিধৰাং ভুৱনং দহন্তী-
মগ্ৰেঽভিৱীক্ষ্যনৃপতিৰ্ন পদাচ্চকম্পে ।
ত্ৱদ্ভক্তবাধমভিৱীক্ষ্য সুদৰ্শনং তে
কৃত্যানলং শলভযন্ মুনিমন্ৱধাৱীত্ ॥6॥

ধাৱন্নশেষভুৱনেষু ভিযা স পশ্যন্
ৱিশ্ৱত্ৰ চক্ৰমপি তে গতৱান্ ৱিৰিঞ্চম্ ।
কঃ কালচক্ৰমতিলঙ্ঘযতীত্যপাস্তঃ
শৰ্ৱং যযৌ স চ ভৱন্তমৱন্দতৈৱ ॥7॥

ভূযো ভৱন্নিলযমেত্য মুনিং নমন্তং
প্ৰোচে ভৱানহমৃষে ননু ভক্তদাসঃ ।
জ্ঞানং তপশ্চ ৱিনযান্ৱিতমেৱ মান্যং
যাহ্যম্বৰীষপদমেৱ ভজেতি ভূমন্ ॥8॥

তাৱত্সমেত্য মুনিনা স গৃহীতপাদো
ৰাজাঽপসৃত্য ভৱদস্ত্ৰমসাৱনৌষীত্ ।
চক্ৰে গতে মুনিৰদাদখিলাশিষোঽস্মৈ
ত্ৱদ্ভক্তিমাগসি কৃতেঽপি কৃপাং চ শংসন্ ॥9॥

ৰাজা প্ৰতীক্ষ্য মুনিমেকসমামনাশ্ৱান্
সম্ভোজ্য সাধু তমৃষিং ৱিসৃজন্ প্ৰসন্নম্ ।
ভুক্ত্ৱা স্ৱযং ত্ৱযি ততোঽপি দৃঢং ৰতোঽভূ-
ত্সাযুজ্যমাপ চ স মাং পৱনেশ পাযাঃ ॥10॥