নাৰাযণীযং দশক 34 - শ্ৰীৰামাৱতাৰম্

গীৰ্ৱাণৈৰৰ্থ্যমানো দশমুখনিধনং কোসলেষ্ৱৃশ্যশৃঙ্গে
পুত্ৰীযামিষ্টিমিষ্ট্ৱা দদুষি দশৰথক্ষ্মাভৃতে পাযসাগ্ৰ্যম্ ।
তদ্ভুক্ত্যা তত্পুৰন্ধ্ৰীষ্ৱপি তিসৃষু সমং জাতগৰ্ভাসু জাতো
ৰামস্ত্ৱং লক্ষ্মণেন স্ৱযমথ ভৰতেনাপি শত্ৰুঘ্ননাম্না ॥1॥

কোদণ্ডী কৌশিকস্য ক্ৰতুৱৰমৱিতুং লক্ষ্মণেনানুযাতো
যাতোঽভূস্তাতৱাচা মুনিকথিতমনুদ্ৱন্দ্ৱশান্তাধ্ৱখেদঃ ।
নৃণাং ত্ৰাণায বাণৈৰ্মুনিৱচনবলাত্তাটকাং পাটযিত্ৱা
লব্ধ্ৱাস্মাদস্ত্ৰজালং মুনিৱনমগমো দেৱ সিদ্ধাশ্ৰমাখ্যম্ ॥2॥

মাৰীচং দ্ৰাৱযিত্ৱা মখশিৰসি শৰৈৰন্যৰক্ষাংসি নিঘ্নন্
কল্যাং কুৰ্ৱন্নহল্যাং পথি পদৰজসা প্ৰাপ্য ৱৈদেহগেহম্ ।
ভিন্দানশ্চান্দ্ৰচূডং ধনুৰৱনিসুতামিন্দিৰামেৱ লব্ধ্ৱা
ৰাজ্যং প্ৰাতিষ্ঠথাস্ত্ৱং ত্ৰিভিৰপি চ সমং ভ্ৰাতৃৱীৰৈস্সদাৰৈঃ ॥3॥

আৰুন্ধানে ৰুষান্ধে ভৃগুকুল তিলকে সঙ্ক্ৰময্য স্ৱতেজো
যাতে যাতোঽস্যযোধ্যাং সুখমিহ নিৱসন্ কান্তযা কান্তমূৰ্তে ।
শত্ৰুঘ্নেনৈকদাথো গতৱতি ভৰতে মাতুলস্যাধিৱাসং
তাতাৰব্ধোঽভিষেকস্তৱ কিল ৱিহতঃ কেকযাধীশপুত্ৰ্যা ॥4॥

তাতোক্ত্যা যাতুকামো ৱনমনুজৱধূসংযুতশ্চাপধাৰঃ
পৌৰানাৰুধ্য মাৰ্গে গুহনিলযগতস্ত্ৱং জটাচীৰধাৰী।
নাৱা সন্তীৰ্য গঙ্গামধিপদৱি পুনস্তং ভৰদ্ৱাজমাৰা-
ন্নত্ৱা তদ্ৱাক্যহেতোৰতিসুখমৱসশ্চিত্ৰকূটে গিৰীন্দ্ৰে ॥5॥

শ্ৰুত্ৱা পুত্ৰাৰ্তিখিন্নং খলু ভৰতমুখাত্ স্ৱৰ্গযাতং স্ৱতাতং
তপ্তো দত্ৱাঽম্বু তস্মৈ নিদধিথ ভৰতে পাদুকাং মেদিনীং চ
অত্ৰিং নত্ৱাঽথ গত্ৱা ৱনমতিৱিপুলং দণ্ডকং চণ্ডকাযং
হত্ৱা দৈত্যং ৱিৰাধং সুগতিমকলযশ্চাৰু ভোঃ শাৰভঙ্গীম্ ॥6॥

নত্ৱাঽগস্ত্যং সমস্তাশৰনিকৰসপত্ৰাকৃতিং তাপসেভ্যঃ
প্ৰত্যশ্ৰৌষীঃ প্ৰিযৈষী তদনু চ মুনিনা ৱৈষ্ণৱে দিৱ্যচাপে ।
ব্ৰহ্মাস্ত্ৰে চাপি দত্তে পথি পিতৃসুহৃদং ৱীক্ষ্য ভূযো জটাযুং
মোদাত্ গোদাতটান্তে পৰিৰমসি পুৰা পঞ্চৱট্যাং ৱধূট্যা ॥7॥

প্ৰাপ্তাযাঃ শূৰ্পণখ্যা মদনচলধৃতেৰৰ্থনৈৰ্নিস্সহাত্মা
তাং সৌমিত্ৰৌ ৱিসৃজ্য প্ৰবলতমৰুষা তেন নিৰ্লূননাসাম্ ।
দৃষ্ট্ৱৈনাং ৰুষ্টচিত্তং খৰমভিপতিতং দূষণং চ ত্ৰিমূৰ্ধং
ৱ্যাহিংসীৰাশৰানপ্যযুতসমধিকাংস্তত্ক্ষণাদক্ষতোষ্মা ॥8॥

সোদৰ্যাপ্ৰোক্তৱাৰ্তাৱিৱশদশমুখাদিষ্টমাৰীচমাযা-
সাৰঙ্গ সাৰসাক্ষ্যা স্পৃহিতমনুগতঃ প্ৰাৱধীৰ্বাণঘাতম্ ।
তন্মাযাক্ৰন্দনিৰ্যাপিতভৱদনুজাং ৰাৱণস্তামহাৰ্ষী-
ত্তেনাৰ্তোঽপি ত্ৱমন্তঃ কিমপি মুদমধাস্তদ্ৱধোপাযলাভাত্ ॥9॥

ভূযস্তন্ৱীং ৱিচিন্ৱন্নহৃত দশমুখস্ত্ৱদ্ৱধূং মদ্ৱধেনে-
ত্যুক্ত্ৱা যাতে জটাযৌ দিৱমথ সুহৃদঃ প্ৰাতনোঃ প্ৰেতকাৰ্যম্ ।
গৃহ্ণানং তং কবন্ধং জঘনিথ শবৰীং প্ৰেক্ষ্য পম্পাতটে ত্ৱং
সম্প্ৰাপ্তো ৱাতসূনুং ভৃশমুদিতমনাঃ পাহি ৱাতালযেশ ॥10॥