নাৰাযণীযং দশক 37 - শ্ৰীকৃষ্ণাৱতাৰোপক্ৰমম্

সান্দ্ৰানন্দতনো হৰে ননু পুৰা দৈৱাসুৰে সঙ্গৰে
ত্ৱত্কৃত্তা অপি কৰ্মশেষৱশতো যে তে ন যাতা গতিম্ ।
তেষাং ভূতলজন্মনাং দিতিভুৱাং ভাৰেণ দূৰাৰ্দিতা
ভূমিঃ প্ৰাপ ৱিৰিঞ্চমাশ্ৰিতপদং দেৱৈঃ পুৰৈৱাগতৈঃ ॥1॥

হা হা দুৰ্জনভূৰিভাৰমথিতাং পাথোনিধৌ পাতুকা-
মেতাং পালয হন্ত মে ৱিৱশতাং সম্পৃচ্ছ দেৱানিমান্ ।
ইত্যাদিপ্ৰচুৰপ্ৰলাপৱিৱশামালোক্য ধাতা মহীং
দেৱানাং ৱদনানি ৱীক্ষ্য পৰিতো দধ্যৌ ভৱন্তং হৰে ॥2॥

ঊচে চাম্বুজভূৰমূনযি সুৰাঃ সত্যং ধৰিত্ৰ্যা ৱচো
নন্ৱস্যা ভৱতাং চ ৰক্ষণৱিধৌ দক্ষো হি লক্ষ্মীপতিঃ ।
সৰ্ৱে শৰ্ৱপুৰস্সৰা ৱযমিতো গত্ৱা পযোৱাৰিধিং
নত্ৱা তং স্তুমহে জৱাদিতি যযুঃ সাকং তৱাকেতনম্ ॥3॥

তে মুগ্ধানিলশালিদুগ্ধজলধেস্তীৰং গতাঃ সঙ্গতা
যাৱত্ত্ৱত্পদচিন্তনৈকমনসস্তাৱত্ স পাথোজভূঃ ।
ত্ৱদ্ৱাচং হৃদযে নিশম্য সকলানানন্দযন্নূচিৱা-
নাখ্যাতঃ পৰমাত্মনা স্ৱযমহং ৱাক্যং তদাকৰ্ণ্যতাম্ ॥4॥

জানে দীনদশামহং দিৱিষদাং ভূমেশ্চ ভীমৈৰ্নৃপৈ-
স্তত্ক্ষেপায ভৱামি যাদৱকুলে সোঽহং সমগ্ৰাত্মনা ।
দেৱা ৱৃষ্ণিকুলে ভৱন্তু কলযা দেৱাঙ্গনাশ্চাৱনৌ
মত্সেৱাৰ্থমিতি ত্ৱদীযৱচনং পাথোজভূৰূচিৱান্ ॥5॥

শ্ৰুত্ৱা কৰ্ণৰসাযনং তৱ ৱচঃ সৰ্ৱেষু নিৰ্ৱাপিত-
স্ৱান্তেষ্ৱীশ গতেষু তাৱককৃপাপীযূষতৃপ্তাত্মসু ।
ৱিখ্যাতে মধুৰাপুৰে কিল ভৱত্সান্নিধ্যপুণ্যোত্তৰে
ধন্যাং দেৱকনন্দনামুদৱহদ্ৰাজা স শূৰাত্মজঃ ॥6॥

উদ্ৱাহাৱসিতৌ তদীযসহজঃ কংসোঽথ সম্মানয-
ন্নেতৌ সূততযা গতঃ পথি ৰথে ৱ্যোমোত্থযা ত্ৱদ্গিৰা ।
অস্যাস্ত্ৱামতিদুষ্টমষ্টমসুতো হন্তেতি হন্তেৰিতঃ
সন্ত্ৰাসাত্ স তু হন্তুমন্তিকগতাং তন্ৱীং কৃপাণীমধাত্ ॥7॥

গৃহ্ণানশ্চিকুৰেষু তাং খলমতিঃ শৌৰেশ্চিৰং সান্ত্ৱনৈ-
ৰ্নো মুঞ্চন্ পুনৰাত্মজাৰ্পণগিৰা প্ৰীতোঽথ যাতো গৃহান্ ।
আদ্যং ত্ৱত্সহজং তথাঽৰ্পিতমপি স্নেহেন নাহন্নসৌ
দুষ্টানামপি দেৱ পুষ্টকৰুণা দৃষ্টা হি ধীৰেকদা ॥8॥

তাৱত্ত্ৱন্মনসৈৱ নাৰদমুনিঃ প্ৰোচে স ভোজেশ্ৱৰং
যূযং নন্ৱসুৰাঃ সুৰাশ্চ যদৱো জানাসি কিং ন প্ৰভো ।
মাযাৱী স হৰিৰ্ভৱদ্ৱধকৃতে ভাৱী সুৰপ্ৰাৰ্থনা-
দিত্যাকৰ্ণ্য যদূনদূধুনদসৌ শৌৰেশ্চ সূনূনহন্ ॥9॥

প্ৰাপ্তে সপ্তমগৰ্ভতামহিপতৌ ত্ৱত্প্ৰেৰণান্মাযযা
নীতে মাধৱ ৰোহিণীং ত্ৱমপি ভোঃসচ্চিত্সুখৈকাত্মকঃ ।
দেৱক্যা জঠৰং ৱিৱেশিথ ৱিভো সংস্তূযমানঃ সুৰৈঃ
স ত্ৱং কৃষ্ণ ৱিধূয ৰোগপটলীং ভক্তিং পৰাং দেহি মে ॥10॥