নাৰাযণীযং দশক 45 - শ্ৰীকৃষ্ণস্য বাললীলাঃ

অযি সবল মুৰাৰে পাণিজানুপ্ৰচাৰৈঃ
কিমপি ভৱনভাগান্ ভূষযন্তৌ ভৱন্তৌ ।
চলিতচৰণকঞ্জৌ মঞ্জুমঞ্জীৰশিঞ্জা-
শ্ৰৱণকুতুকভাজৌ চেৰতুশ্চাৰুৱেগাত্ ॥1॥

মৃদু মৃদু ৱিহসন্তাৱুন্মিষদ্দন্তৱন্তৌ
ৱদনপতিতকেশৌ দৃশ্যপাদাব্জদেশৌ ।
ভুজগলিতকৰান্তৱ্যালগত্কঙ্কণাঙ্কৌ
মতিমহৰতমুচ্চৈঃ পশ্যতাং ৱিশ্ৱনৃণাম্ ॥2॥

অনুসৰতি জনৌঘে কৌতুকৱ্যাকুলাক্ষে
কিমপি কৃতনিনাদং ৱ্যাহসন্তৌ দ্ৰৱন্তৌ ।
ৱলিতৱদনপদ্মং পৃষ্ঠতো দত্তদৃষ্টী
কিমিৱ ন ৱিদধাথে কৌতুকং ৱাসুদেৱ ॥3॥

দ্ৰুতগতিষু পতন্তাৱুত্থিতৌ লিপ্তপঙ্কৌ
দিৱি মুনিভিৰপঙ্কৈঃ সস্মিতং ৱন্দ্যমানৌ ।
দ্ৰুতমথ জননীভ্যাং সানুকম্পং গৃহীতৌ
মুহুৰপি পৰিৰব্ধৌ দ্ৰাগ্যুৱাং চুম্বিতৌ চ ॥4॥

স্নুতকুচভৰমঙ্কে ধাৰযন্তী ভৱন্তং
তৰলমতি যশোদা স্তন্যদা ধন্যধন্যা ।
কপটপশুপ মধ্যে মুগ্ধহাসাঙ্কুৰং তে
দশনমুকুলহৃদ্যং ৱীক্ষ্য ৱক্ত্ৰং জহৰ্ষ ॥5॥

তদনুচৰণচাৰী দাৰকৈস্সাকমাৰা-
ন্নিলযততিষু খেলন্ বালচাপল্যশালী ।
ভৱনশুকৱিডালান্ ৱত্সকাংশ্চানুধাৱন্
কথমপি কৃতহাসৈৰ্গোপকৈৰ্ৱাৰিতোঽভূঃ ॥6॥

হলধৰসহিতস্ত্ৱং যত্ৰ যত্ৰোপযাতো
ৱিৱশপতিতনেত্ৰাস্তত্ৰ তত্ৰৈৱ গোপ্যঃ ।
ৱিগলিতগৃহকৃত্যা ৱিস্মৃতাপত্যভৃত্যা
মুৰহৰ মুহুৰত্যন্তাকুলা নিত্যমাসন্ ॥7॥

প্ৰতিনৱনৱনীতং গোপিকাদত্তমিচ্ছন্
কলপদমুপগাযন্ কোমলং ক্ৱাপি নৃত্যন্ ।
সদযযুৱতিলোকৈৰৰ্পিতং সৰ্পিৰশ্নন্
ক্ৱচন নৱৱিপক্ৱং দুগ্ধমপ্যাপিবস্ত্ৱম্ ॥8॥

মম খলু বলিগেহে যাচনং জাতমাস্তা-
মিহ পুনৰবলানামগ্ৰতো নৈৱ কুৰ্ৱে ।
ইতি ৱিহিতমতিঃ কিং দেৱ সন্ত্যজ্য যাচ্ঞাং
দধিঘৃতমহৰস্ত্ৱং চাৰুণা চোৰণেন ॥9॥

তৱ দধিঘৃতমোষে ঘোষযোষাজনানা-
মভজত হৃদি ৰোষো নাৱকাশং ন শোকঃ ।
হৃদযমপি মুষিত্ৱা হৰ্ষসিন্ধৌ ন্যধাস্ত্ৱং
স মম শময ৰোগান্ ৱাতগেহাধিনাথ ॥10॥

শাখাগ্ৰে ৱিধুং ৱিলোক্য ফলমিত্য্ম্বাং চ তাতং মুহুঃ
সম্প্ৰাৰ্থ্যাথ তদা তদীযৱচসা প্ৰোত্ক্ষিপ্তবাহৌ ত্ৱযি।
চিত্ৰং দেৱ শশী স তে কৰ্মগাত্ কিং ব্ৰূমহে সম্পতঃ
জ্যোতিৰ্মণ্ডলপূৰিতাখিলৱপুঃ প্ৰাগা ৱিৰাড্ৰূপতাম্ ॥ 11॥

কিং কিং বতেদমিতি সম্ভ্ৰম ভাজমেনং
ব্ৰহ্মাৰ্ণৱে ক্ষণমমুং পৰিমজ্জ্য তাতম্ ।
মাযাং পুনস্তনয-মোহমযীং ৱিতন্ৱন্
আনন্দচিন্ময জগন্ময পাহি ৰোগাত্ ॥12॥