ନାରାଯଣୀଯଂ ଦଶକ 48 - ନଲକୂବର-ମଣିଗ୍ରୀଵଯୋଃ ଶାପମୋକ୍ଷମ୍

ମୁଦା ସୁରୌଘୈସ୍ତ୍ଵମୁଦାରସମ୍ମଦୈ-
ରୁଦୀର୍ଯ ଦାମୋଦର ଇତ୍ଯଭିଷ୍ଟୁତଃ ।
ମୃଦୁଦରଃ ସ୍ଵୈରମୁଲୂଖଲେ ଲଗ-
ନ୍ନଦୂରତୋ ଦ୍ଵୌ କକୁଭାଵୁଦୈକ୍ଷଥାଃ ॥1॥

କୁବେରସୂନୁର୍ନଲକୂବରାଭିଧଃ
ପରୋ ମଣିଗ୍ରୀଵ ଇତି ପ୍ରଥାଂ ଗତଃ ।
ମହେଶସେଵାଧିଗତଶ୍ରିଯୋନ୍ମଦୌ
ଚିରଂ କିଲ ତ୍ଵଦ୍ଵିମୁଖାଵଖେଲତାମ୍ ॥2॥

ସୁରାପଗାଯାଂ କିଲ ତୌ ମଦୋତ୍କଟୌ
ସୁରାପଗାଯଦ୍ବହୁଯୌଵତାଵୃତୌ ।
ଵିଵାସସୌ କେଲିପରୌ ସ ନାରଦୋ
ଭଵତ୍ପଦୈକପ୍ରଵଣୋ ନିରୈକ୍ଷତ ॥3॥

ଭିଯା ପ୍ରିଯାଲୋକମୁପାତ୍ତଵାସସଂ
ପୁରୋ ନିରୀକ୍ଷ୍ଯାପି ମଦାନ୍ଧଚେତସୌ ।
ଇମୌ ଭଵଦ୍ଭକ୍ତ୍ଯୁପଶାନ୍ତିସିଦ୍ଧଯେ
ମୁନିର୍ଜଗୌ ଶାନ୍ତିମୃତେ କୁତଃ ସୁଖମ୍ ॥4॥

ଯୁଵାମଵାପ୍ତୌ କକୁଭାତ୍ମତାଂ ଚିରଂ
ହରିଂ ନିରୀକ୍ଷ୍ଯାଥ ପଦଂ ସ୍ଵମାପ୍ନୁତମ୍ ।
ଇତୀରେତୌ ତୌ ଭଵଦୀକ୍ଷଣସ୍ପୃହାଂ
ଗତୌ ଵ୍ରଜାନ୍ତେ କକୁଭୌ ବଭୂଵତୁଃ ॥5॥

ଅତନ୍ଦ୍ରମିନ୍ଦ୍ରଦ୍ରୁଯୁଗଂ ତଥାଵିଧଂ
ସମେଯୁଷା ମନ୍ଥରଗାମିନା ତ୍ଵଯା ।
ତିରାଯିତୋଲୂଖଲରୋଧନିର୍ଧୁତୌ
ଚିରାଯ ଜୀର୍ଣୌ ପରିପାତିତୌ ତରୂ ॥6॥

ଅଭାଜି ଶାଖିଦ୍ଵିତଯଂ ଯଦା ତ୍ଵଯା
ତଦୈଵ ତଦ୍ଗର୍ଭତଲାନ୍ନିରେଯୁଷା ।
ମହାତ୍ଵିଷା ଯକ୍ଷଯୁଗେନ ତତ୍କ୍ଷଣା-
ଦଭାଜି ଗୋଵିନ୍ଦ ଭଵାନପି ସ୍ତଵୈଃ ॥7॥

ଇହାନ୍ଯଭକ୍ତୋଽପି ସମେଷ୍ଯତି କ୍ରମାତ୍
ଭଵନ୍ତମେତୌ ଖଲୁ ରୁଦ୍ରସେଵକୌ ।
ମୁନିପ୍ରସାଦାଦ୍ଭଵ୍ଦଙ୍ଘ୍ରିମାଗତୌ
ଗତୌ ଵୃଣାନୌ ଖଲୁ ଭକ୍ତିମୁତ୍ତମାମ୍ ॥8॥

ତତସ୍ତରୂଦ୍ଦାରଣଦାରୁଣାରଵ-
ପ୍ରକମ୍ପିସମ୍ପାତିନି ଗୋପମଣ୍ଡଲେ ।
ଵିଲଜ୍ଜିତତ୍ଵଜ୍ଜନନୀମୁଖେକ୍ଷିଣା
ଵ୍ଯମୋକ୍ଷି ନନ୍ଦେନ ଭଵାନ୍ ଵିମୋକ୍ଷଦଃ ॥9॥

ମହୀରୁହୋର୍ମଧ୍ଯଗତୋ ବତାର୍ଭକୋ
ହରେଃ ପ୍ରଭାଵାଦପରିକ୍ଷତୋଽଧୁନା ।
ଇତି ବ୍ରୁଵାଣୈର୍ଗମିତୋ ଗୃହଂ ଭଵାନ୍
ମରୁତ୍ପୁରାଧୀଶ୍ଵର ପାହି ମାଂ ଗଦାତ୍ ॥10॥