ନାରାଯଣୀଯଂ ଦଶକ 51 - ଅଘାସୁରଵଧମ୍

କଦାଚନ ଵ୍ରଜଶିଶୁଭିଃ ସମଂ ଭଵାନ୍
ଵନାଶନେ ଵିହିତମତିଃ ପ୍ରଗେତରାମ୍ ।
ସମାଵୃତୋ ବହୁତରଵତ୍ସମଣ୍ଡଲୈଃ
ସତେମନୈର୍ନିରଗମଦୀଶ ଜେମନୈଃ ॥1॥

ଵିନିର୍ଯତସ୍ତଵ ଚରଣାମ୍ବୁଜଦ୍ଵଯା-
ଦୁଦଞ୍ଚିତଂ ତ୍ରିଭୁଵନପାଵନଂ ରଜଃ ।
ମହର୍ଷଯଃ ପୁଲକଧରୈଃ କଲେବରୈ-
ରୁଦୂହିରେ ଧୃତଭଵଦୀକ୍ଷଣୋତ୍ସଵାଃ ॥2॥

ପ୍ରଚାରଯତ୍ଯଵିରଲଶାଦ୍ଵଲେ ତଲେ
ପଶୂନ୍ ଵିଭୋ ଭଵତି ସମଂ କୁମାରକୈଃ ।
ଅଘାସୁରୋ ନ୍ଯରୁଣଦଘାଯ ଵର୍ତନୀ
ଭଯାନକଃ ସପଦି ଶଯାନକାକୃତିଃ ॥3॥

ମହାଚଲପ୍ରତିମତନୋର୍ଗୁହାନିଭ-
ପ୍ରସାରିତପ୍ରଥିତମୁଖସ୍ଯ କାନନେ ।
ମୁଖୋଦରଂ ଵିହରଣକୌତୁକାଦ୍ଗତାଃ
କୁମାରକାଃ କିମପି ଵିଦୂରଗେ ତ୍ଵଯି ॥4॥

ପ୍ରମାଦତଃ ପ୍ରଵିଶତି ପନ୍ନଗୋଦରଂ
କ୍ଵଥତ୍ତନୌ ପଶୁପକୁଲେ ସଵାତ୍ସକେ ।
ଵିଦନ୍ନିଦଂ ତ୍ଵମପି ଵିଵେଶିଥ ପ୍ରଭୋ
ସୁହୃଜ୍ଜନଂ ଵିଶରଣମାଶୁ ରକ୍ଷିତୁମ୍ ॥5॥

ଗଲୋଦରେ ଵିପୁଲିତଵର୍ଷ୍ମଣା ତ୍ଵଯା
ମହୋରଗେ ଲୁଠତି ନିରୁଦ୍ଧମାରୁତେ ।
ଦ୍ରୁତଂ ଭଵାନ୍ ଵିଦଲିତକଣ୍ଠମଣ୍ଡଲୋ
ଵିମୋଚଯନ୍ ପଶୁପପଶୂନ୍ ଵିନିର୍ଯଯୌ ॥6॥

କ୍ଷଣଂ ଦିଵି ତ୍ଵଦୁପଗମାର୍ଥମାସ୍ଥିତଂ
ମହାସୁରପ୍ରଭଵମହୋ ମହୋ ମହତ୍ ।
ଵିନିର୍ଗତେ ତ୍ଵଯି ତୁ ନିଲୀନମଞ୍ଜସା
ନଭଃସ୍ଥଲେ ନନୃତୁରଥୋ ଜଗୁଃ ସୁରାଃ ॥7॥

ସଵିସ୍ମଯୈଃ କମଲଭଵାଦିଭିଃ ସୁରୈ-
ରନୁଦ୍ରୁତସ୍ତଦନୁ ଗତଃ କୁମାରକୈଃ ।
ଦିନେ ପୁନସ୍ତରୁଣଦଶାମୁପେଯୁଷି
ସ୍ଵକୈର୍ଭଵାନତନୁତ ଭୋଜନୋତ୍ସଵମ୍ ॥8॥

ଵିଷାଣିକାମପି ମୁରଲୀଂ ନିତମ୍ବକେ
ନିଵେଶଯନ୍ କବଲଧରଃ କରାମ୍ବୁଜେ ।
ପ୍ରହାସଯନ୍ କଲଵଚନୈଃ କୁମାରକାନ୍
ବୁଭୋଜିଥ ତ୍ରିଦଶଗଣୈର୍ମୁଦା ନୁତଃ ॥9॥

ସୁଖାଶନଂ ତ୍ଵିହ ତଵ ଗୋପମଣ୍ଡଲେ
ମଖାଶନାତ୍ ପ୍ରିଯମିଵ ଦେଵମଣ୍ଡଲେ ।
ଇତି ସ୍ତୁତସ୍ତ୍ରିଦଶଵରୈର୍ଜଗତ୍ପତେ
ମରୁତ୍ପୁରୀନିଲଯ ଗଦାତ୍ ପ୍ରପାହି ମାମ୍ ॥10॥