നാരായണീയം ദശക 58 - ദാവാഗ്നിസംരക്ഷണം തഥാ ഋതുവര്ണനമ്

ത്വയി വിഹരണലോലേ ബാലജാലൈഃ പ്രലമ്ബ-
പ്രമഥനസവിലമ്ബേ ധേനവഃ സ്വൈരചാരാഃ ।
തൃണകുതുകനിവിഷ്ടാ ദൂരദൂരം ചരന്ത്യഃ
കിമപി വിപിനമൈഷീകാഖ്യമീഷാമ്ബഭൂവുഃ ॥1॥

അനധിഗതനിദാഘക്രൌര്യവൃന്ദാവനാന്താത്
ബഹിരിദമുപയാതാഃ കാനനം ധേനവസ്താഃ ।
തവ വിരഹവിഷണ്ണാ ഊഷ്മലഗ്രീഷ്മതാപ-
പ്രസരവിസരദമ്ഭസ്യാകുലാഃ സ്തമ്ഭമാപുഃ ॥2॥

തദനു സഹ സഹായൈര്ദൂരമന്വിഷ്യ ശൌരേ
ഗലിതസരണിമുഞ്ജാരണ്യസഞ്ജാതഖേദമ് ।
പശുകുലമഭിവീക്ഷ്യ ക്ഷിപ്രമാനേതുമാരാ-
ത്ത്വയി ഗതവതി ഹീ ഹീ സര്വതോഽഗ്നിര്ജജൃമ്ഭേ ॥3॥

സകലഹരിതി ദീപ്തേ ഘോരഭാങ്കാരഭീമേ
ശിഖിനി വിഹതമാര്ഗാ അര്ധദഗ്ധാ ഇവാര്താഃ ।
അഹഹ ഭുവനബന്ധോ പാഹി പാഹീതി സര്വേ
ശരണമുപഗതാസ്ത്വാം താപഹര്താരമേകമ് ॥4॥

അലമലമതിഭീത്യാ സര്വതോ മീലയധ്വം
ദൃശമിതി തവ വാചാ മീലിതാക്ഷേഷു തേഷു ।
ക്വ നു ദവദഹനോഽസൌ കുത്ര മുഞ്ജാടവീ സാ
സപദി വവൃതിരേ തേ ഹന്ത ഭാണ്ഡീരദേശേ ॥5॥

ജയ ജയ തവ മായാ കേയമീശേതി തേഷാം
നുതിഭിരുദിതഹാസോ ബദ്ധനാനാവിലാസഃ ।
പുനരപി വിപിനാന്തേ പ്രാചരഃ പാടലാദി-
പ്രസവനികരമാത്രഗ്രാഹ്യഘര്മാനുഭാവേ ॥6॥

ത്വയി വിമുഖമിവോച്ചൈസ്താപഭാരം വഹന്തം
തവ ഭജനവദന്തഃ പങ്കമുച്ഛോഷയന്തമ് ।
തവ ഭുജവദുദഞ്ചദ്ഭൂരിതേജഃപ്രവാഹം
തപസമയമനൈഷീര്യാമുനേഷു സ്ഥലേഷു ॥7॥

തദനു ജലദജാലൈസ്ത്വദ്വപുസ്തുല്യഭാഭി-
ര്വികസദമലവിദ്യുത്പീതവാസോവിലാസൈഃ ।
സകലഭുവനഭാജാം ഹര്ഷദാം വര്ഷവേലാം
ക്ഷിതിധരകുഹരേഷു സ്വൈരവാസീ വ്യനൈഷീഃ ॥8॥

കുഹരതലനിവിഷ്ടം ത്വാം ഗരിഷ്ഠം ഗിരീന്ദ്രഃ
ശിഖികുലനവകേകാകാകുഭിഃ സ്തോത്രകാരീ ।
സ്ഫുടകുടജകദമ്ബസ്തോമപുഷ്പാഞ്ജലിം ച
പ്രവിദധദനുഭേജേ ദേവ ഗോവര്ധനോഽസൌ ॥9॥

അഥ ശരദമുപേതാം താം ഭവദ്ഭക്തചേതോ-
വിമലസലിലപൂരാം മാനയന് കാനനേഷു ।
തൃണമമലവനാന്തേ ചാരു സഞ്ചാരയന് ഗാഃ
പവനപുരപതേ ത്വം ദേഹി മേ ദേഹസൌഖ്യമ് ॥10॥