ନାରାଯଣୀଯଂ ଦଶକ 59 - ଵେଣୁଗାନଵର୍ଣନମ୍

ତ୍ଵଦ୍ଵପୁର୍ନଵକଲାଯକୋମଲଂ ପ୍ରେମଦୋହନମଶେଷମୋହନମ୍ ।
ବ୍ରହ୍ମ ତତ୍ତ୍ଵପରଚିନ୍ମୁଦାତ୍ମକଂ ଵୀକ୍ଷ୍ଯ ସମ୍ମୁମୁହୁରନ୍ଵହଂ ସ୍ତ୍ରିଯଃ ॥1॥

ମନ୍ମଥୋନ୍ମଥିତମାନସାଃ କ୍ରମାତ୍ତ୍ଵଦ୍ଵିଲୋକନରତାସ୍ତତସ୍ତତଃ ।
ଗୋପିକାସ୍ତଵ ନ ସେହିରେ ହରେ କାନନୋପଗତିମପ୍ଯହର୍ମୁଖେ ॥2॥

ନିର୍ଗତେ ଭଵତି ଦତ୍ତଦୃଷ୍ଟଯସ୍ତ୍ଵଦ୍ଗତେନ ମନସା ମୃଗେକ୍ଷଣାଃ ।
ଵେଣୁନାଦମୁପକର୍ଣ୍ଯ ଦୂରତସ୍ତ୍ଵଦ୍ଵିଲାସକଥଯାଽଭିରେମିରେ ॥3॥

କାନନାନ୍ତମିତଵାନ୍ ଭଵାନପି ସ୍ନିଗ୍ଧପାଦପତଲେ ମନୋରମେ ।
ଵ୍ଯତ୍ଯଯାକଲିତପାଦମାସ୍ଥିତଃ ପ୍ରତ୍ଯପୂରଯତ ଵେଣୁନାଲିକାମ୍ ॥4॥

ମାରବାଣଧୁତଖେଚରୀକୁଲଂ ନିର୍ଵିକାରପଶୁପକ୍ଷିମଣ୍ଡଲମ୍ ।
ଦ୍ରାଵଣଂ ଚ ଦୃଷଦାମପି ପ୍ରଭୋ ତାଵକଂ ଵ୍ଯଜନି ଵେଣୁକୂଜିତମ୍ ॥5॥

ଵେଣୁରନ୍ଧ୍ରତରଲାଙ୍ଗୁଲୀଦଲଂ ତାଲସଞ୍ଚଲିତପାଦପଲ୍ଲଵମ୍ ।
ତତ୍ ସ୍ଥିତଂ ତଵ ପରୋକ୍ଷମପ୍ଯହୋ ସଂଵିଚିନ୍ତ୍ଯ ମୁମୁହୁର୍ଵ୍ରଜାଙ୍ଗନାଃ ॥6॥

ନିର୍ଵିଶଙ୍କଭଵଦଙ୍ଗଦର୍ଶିନୀଃ ଖେଚରୀଃ ଖଗମୃଗାନ୍ ପଶୂନପି ।
ତ୍ଵତ୍ପଦପ୍ରଣଯି କାନନଂ ଚ ତାଃ ଧନ୍ଯଧନ୍ଯମିତି ନନ୍ଵମାନଯନ୍ ॥7॥

ଆପିବେଯମଧରାମୃତଂ କଦା ଵେଣୁଭୁକ୍ତରସଶେଷମେକଦା ।
ଦୂରତୋ ବତ କୃତଂ ଦୁରାଶଯେତ୍ଯାକୁଲା ମୁହୁରିମାଃ ସମାମୁହନ୍ ॥8॥

ପ୍ରତ୍ଯହଂ ଚ ପୁନରିତ୍ଥମଙ୍ଗନାଶ୍ଚିତ୍ତଯୋନିଜନିତାଦନୁଗ୍ରହାତ୍ ।
ବଦ୍ଧରାଗଵିଵଶାସ୍ତ୍ଵଯି ପ୍ରଭୋ ନିତ୍ଯମାପୁରିହ କୃତ୍ଯମୂଢତାମ୍ ॥9॥

ରାଗସ୍ତାଵଜ୍ଜାଯତେ ହି ସ୍ଵଭାଵା-
ନ୍ମୋକ୍ଷୋପାଯୋ ଯତ୍ନତଃ ସ୍ଯାନ୍ନ ଵା ସ୍ଯାତ୍ ।
ତାସାଂ ତ୍ଵେକଂ ତଦ୍ଦ୍ଵଯଂ ଲବ୍ଧମାସୀତ୍
ଭାଗ୍ଯଂ ଭାଗ୍ଯଂ ପାହି ମାଂ ମାରୁତେଶ ॥10॥