ନାରାଯଣୀଯଂ ଦଶକ 6 - ଵିରାଟ୍ସ୍ଵରୂପଵର୍ଣନମ୍

ଏଵଂ ଚତୁର୍ଦଶଜଗନ୍ମଯତାଂ ଗତସ୍ଯ
ପାତାଲମୀଶ ତଵ ପାଦତଲଂ ଵଦନ୍ତି ।
ପାଦୋର୍ଧ୍ଵଦେଶମପି ଦେଵ ରସାତଲଂ ତେ
ଗୁଲ୍ଫଦ୍ଵଯଂ ଖଲୁ ମହାତଲମଦ୍ଭୁତାତ୍ମନ୍ ॥1॥

ଜଙ୍ଘେ ତଲାତଲମଥୋ ସୁତଲଂ ଚ ଜାନୂ
କିଞ୍ଚୋରୁଭାଗଯୁଗଲଂ ଵିତଲାତଲେ ଦ୍ଵେ ।
କ୍ଷୋଣୀତଲଂ ଜଘନମମ୍ବରମଙ୍ଗ ନାଭି-
ର୍ଵକ୍ଷଶ୍ଚ ଶକ୍ରନିଲଯସ୍ତଵ ଚକ୍ରପାଣେ ॥2॥

ଗ୍ରୀଵା ମହସ୍ତଵ ମୁଖଂ ଚ ଜନସ୍ତପସ୍ତୁ
ଫାଲଂ ଶିରସ୍ତଵ ସମସ୍ତମଯସ୍ଯ ସତ୍ଯମ୍ ।
ଏଵଂ ଜଗନ୍ମଯତନୋ ଜଗଦାଶ୍ରିତୈର-
ପ୍ଯନ୍ଯୈର୍ନିବଦ୍ଧଵପୁଷେ ଭଗଵନ୍ନମସ୍ତେ ॥3॥

ତ୍ଵଦ୍ବ୍ରହ୍ମରନ୍ଧ୍ରପଦମୀଶ୍ଵର ଵିଶ୍ଵକନ୍ଦ
ଛନ୍ଦାଂସି କେଶଵ ଘନାସ୍ତଵ କେଶପାଶାଃ ।
ଉଲ୍ଲାସିଚିଲ୍ଲିଯୁଗଲଂ ଦ୍ରୁହିଣସ୍ଯ ଗେହଂ
ପକ୍ଷ୍ମାଣି ରାତ୍ରିଦିଵସୌ ସଵିତା ଚ ନେତ୍ରୈ ॥4॥

ନିଶ୍ଶେଷଵିଶ୍ଵରଚନା ଚ କଟାକ୍ଷମୋକ୍ଷଃ
କର୍ଣୌ ଦିଶୋଽଶ୍ଵିଯୁଗଲଂ ତଵ ନାସିକେ ଦ୍ଵେ ।
ଲୋଭତ୍ରପେ ଚ ଭଗଵନ୍ନଧରୋତ୍ତରୋଷ୍ଠୌ
ତାରାଗଣାଶ୍ଚ ଦଶନାଃ ଶମନଶ୍ଚ ଦଂଷ୍ଟ୍ରା ॥5॥

ମାଯା ଵିଲାସହସିତଂ ଶ୍ଵସିତଂ ସମୀରୋ
ଜିହ୍ଵା ଜଲଂ ଵଚନମୀଶ ଶକୁନ୍ତପଙ୍କ୍ତିଃ ।
ସିଦ୍ଧାଦଯଃ ସ୍ଵରଗଣା ମୁଖରନ୍ଧ୍ରମଗ୍ନି-
ର୍ଦେଵା ଭୁଜାଃ ସ୍ତନଯୁଗଂ ତଵ ଧର୍ମଦେଵଃ ॥6॥

ପୃଷ୍ଠଂ ତ୍ଵଧର୍ମ ଇହ ଦେଵ ମନଃ ସୁଧାଂଶୁ -
ରଵ୍ଯକ୍ତମେଵ ହୃଦଯମ୍ବୁଜମମ୍ବୁଜାକ୍ଷ ।
କୁକ୍ଷିଃ ସମୁଦ୍ରନିଵହା ଵସନଂ ତୁ ସନ୍ଧ୍ଯେ
ଶେଫଃ ପ୍ରଜାପତିରସୌ ଵୃଷଣୌ ଚ ମିତ୍ରଃ ॥7॥

ଶ୍ରୋଣୀସ୍ଥଲଂ ମୃଗଗଣାଃ ପଦଯୋର୍ନଖାସ୍ତେ
ହସ୍ତ୍ଯୁଷ୍ଟ୍ରସୈନ୍ଧଵମୁଖା ଗମନଂ ତୁ କାଲଃ ।
ଵିପ୍ରାଦିଵର୍ଣଭଵନଂ ଵଦନାବ୍ଜବାହୁ-
ଚାରୂରୁଯୁଗ୍ମଚରଣଂ କରୁଣାମ୍ବୁଧେ ତେ ॥8॥

ସଂସାରଚକ୍ରମଯି ଚକ୍ରଧର କ୍ରିଯାସ୍ତେ
ଵୀର୍ଯଂ ମହାସୁରଗଣୋଽସ୍ଥିକୁଲାନି ଶୈଲାଃ ।
ନାଡ୍ଯସ୍ସରିତ୍ସମୁଦଯସ୍ତରଵଶ୍ଚ ରୋମ
ଜୀଯାଦିଦଂ ଵପୁରନିର୍ଵଚନୀଯମୀଶ ॥9॥

ଈଦୃଗ୍ଜଗନ୍ମଯଵପୁସ୍ତଵ କର୍ମଭାଜାଂ
କର୍ମାଵସାନସମଯେ ସ୍ମରଣୀଯମାହୁଃ ।
ତସ୍ଯାନ୍ତରାତ୍ମଵପୁଷେ ଵିମଲାତ୍ମନେ ତେ
ଵାତାଲଯାଧିପ ନମୋଽସ୍ତୁ ନିରୁନ୍ଧି ରୋଗାନ୍ ॥10॥