নাৰাযণীযং দশক 62 - ইন্দ্ৰযজ্ঞনিৰোধনং তথা গোৱৰ্ধনযাগম্

কদাচিদ্গোপালান্ ৱিহিতমখসম্ভাৰৱিভৱান্
নিৰীক্ষ্য ত্ৱং শৌৰে মঘৱমদমুদ্ধ্ৱংসিতুমনাঃ ।
ৱিজানন্নপ্যেতান্ ৱিনযমৃদু নন্দাদিপশুপা-
নপৃচ্ছঃ কো ৱাঽযং জনক ভৱতামুদ্যম ইতি ॥1॥

বভাষে নন্দস্ত্ৱাং সুত ননু ৱিধেযো মঘৱতো
মখো ৱৰ্ষে ৱৰ্ষে সুখযতি স ৱৰ্ষেণ পৃথিৱীম্ ।
নৃণাং ৱৰ্ষাযত্তং নিখিলমুপজীৱ্যং মহিতলে
ৱিশেষাদস্মাকং তৃণসলিলজীৱা হি পশৱঃ ॥2॥

ইতি শ্ৰুত্ৱা ৱাচং পিতুৰযি ভৱানাহ সৰসং
ধিগেতন্নো সত্যং মঘৱজনিতা ৱৃষ্টিৰিতি যত্ ।
অদৃষ্টং জীৱানাং সৃজতি খলু ৱৃষ্টিং সমুচিতাং
মহাৰণ্যে ৱৃক্ষাঃ কিমিৱ বলিমিন্দ্ৰায দদতে ॥3॥

ইদং তাৱত্ সত্যং যদিহ পশৱো নঃ কুলধনং
তদাজীৱ্যাযাসৌ বলিৰচলভৰ্ত্ৰে সমুচিতঃ ।
সুৰেভ্যোঽপ্যুত্কৃষ্টা ননু ধৰণিদেৱাঃ ক্ষিতিতলে
ততস্তেঽপ্যাৰাধ্যা ইতি জগদিথ ত্ৱং নিজজনান্ ॥4॥

ভৱদ্ৱাচং শ্ৰুত্ৱা বহুমতিযুতাস্তেঽপি পশুপাঃ
দ্ৱিজেন্দ্ৰানৰ্চন্তো বলিমদদুৰুচ্চৈঃ ক্ষিতিভৃতে ।
ৱ্যধুঃ প্ৰাদক্ষিণ্যং সুভৃশমনমন্নাদৰযুতা-
স্ত্ৱমাদশ্শৈলাত্মা বলিমখিলমাভীৰপুৰতঃ ॥5॥

অৱোচশ্চৈৱং তান্ কিমিহ ৱিতথং মে নিগদিতং
গিৰীন্দ্ৰো নন্ৱেষ স্ৱবলিমুপভুঙ্ক্তে স্ৱৱপুষা ।
অযং গোত্ৰো গোত্ৰদ্ৱিষি চ কুপিতে ৰক্ষিতুমলং
সমস্তানিত্যুক্তা জহৃষুৰখিলা গোকুলজুষঃ ॥6॥

পৰিপ্ৰীতা যাতাঃ খলু ভৱদুপেতা ৱ্ৰজজুষো
ৱ্ৰজং যাৱত্তাৱন্নিজমখৱিভঙ্গং নিশমযন্ ।
ভৱন্তং জানন্নপ্যধিকৰজসাঽঽক্ৰান্তহৃদযো
ন সেহে দেৱেন্দ্ৰস্ত্ৱদুপৰচিতাত্মোন্নতিৰপি ॥7॥

মনুষ্যত্ৱং যাতো মধুভিদপি দেৱেষ্ৱৱিনযং
ৱিধত্তে চেন্নষ্টস্ত্ৰিদশসদসাং কোঽপি মহিমা ।
ততশ্চ ধ্ৱংসিষ্যে পশুপহতকস্য শ্ৰিযমিতি
প্ৰৱৃত্তস্ত্ৱাং জেতুং স কিল মঘৱা দুৰ্মদনিধিঃ ॥8॥

ত্ৱদাৱাসং হন্তুং প্ৰলযজলদানম্বৰভুৱি
প্ৰহিণ্ৱন্ বিভ্ৰাণ; কুলিশমযমভ্ৰেভগমনঃ ।
প্ৰতস্থেঽন্যৈৰন্তৰ্দহনমৰুদাদ্যৈৱিংহসিতো
ভৱন্মাযা নৈৱ ত্ৰিভুৱনপতে মোহযতি কম্ ॥9॥

সুৰেন্দ্ৰঃ ক্ৰুদ্ধশ্চেত্ দ্ৱিজকৰুণযা শৈলকৃপযাঽ-
প্যনাতঙ্কোঽস্মাকং নিযত ইতি ৱিশ্ৱাস্য পশুপান্ ।
অহো কিন্নাযাতো গিৰিভিদিতি সঞ্চিন্ত্য নিৱসন্
মৰুদ্গেহাধীশ প্ৰণুদ মুৰৱৈৰিন্ মম গদান্ ॥10॥