নাৰাযণীযং দশক 63 - গোৱৰ্ধনোদ্ধাৰণম্

দদৃশিৰে কিল তত্ক্ষণমক্ষত-
স্তনিতজৃম্ভিতকম্পিতদিক্তটাঃ ।
সুষমযা ভৱদঙ্গতুলাং গতা
ৱ্ৰজপদোপৰি ৱাৰিধৰাস্ত্ৱযা ॥1॥

ৱিপুলকৰকমিশ্ৰৈস্তোযধাৰানিপাতৈ-
ৰ্দিশিদিশি পশুপানাং মণ্ডলে দণ্ড্যমানে ।
কুপিতহৰিকৃতান্নঃ পাহি পাহীতি তেষাং
ৱচনমজিত শৃণ্ৱন্ মা বিভীতেত্যভাণীঃ ॥2॥

কুল ইহ খলু গোত্ৰো দৈৱতং গোত্ৰশত্ৰো-
ৰ্ৱিহতিমিহ স ৰুন্ধ্যাত্ কো নু ৱঃ সংশযোঽস্মিন্ ।
ইতি সহসিতৱাদী দেৱ গোৱৰ্দ্ধনাদ্ৰিং
ত্ৱৰিতমুদমুমূলো মূলতো বালদোৰ্ভ্যাম্ ॥3॥

তদনু গিৰিৱৰস্য প্ৰোদ্ধৃতস্যাস্য তাৱত্
সিকতিলমৃদুদেশে দূৰতো ৱাৰিতাপে ।
পৰিকৰপৰিমিশ্ৰান্ ধেনুগোপানধস্তা-
দুপনিদধদধত্থা হস্তপদ্মেন শৈলম্ ॥4॥

ভৱতি ৱিধৃতশৈলে বালিকাভিৰ্ৱযস্যৈ-
ৰপি ৱিহিতৱিলাসং কেলিলাপাদিলোলে ।
সৱিধমিলিতধেনূৰেকহস্তেন কণ্ডূ-
যতি সতি পশুপালাস্তোষমৈষন্ত সৰ্ৱে ॥5॥

অতিমহান্ গিৰিৰেষ তু ৱামকে
কৰসৰোৰুহি তং ধৰতে চিৰম্ ।
কিমিদমদ্ভুতমদ্ৰিবলং ন্ৱিতি
ত্ৱদৱলোকিভিৰাকথি গোপকৈঃ ॥6॥

অহহ ধাৰ্ষ্ট্যমমুষ্য ৱটোৰ্গিৰিং
ৱ্যথিতবাহুৰসাৱৱৰোপযেত্ ।
ইতি হৰিস্ত্ৱযি বদ্ধৱিগৰ্হণো
দিৱসসপ্তকমুগ্ৰমৱৰ্ষযত্ ॥7॥

অচলতি ত্ৱযি দেৱ পদাত্ পদং
গলিতসৰ্ৱজলে চ ঘনোত্কৰে ।
অপহৃতে মৰুতা মৰুতাং পতি-
স্ত্ৱদভিশঙ্কিতধীঃ সমুপাদ্ৰৱত্ ॥8॥

শমমুপেযুষি ৱৰ্ষভৰে তদা
পশুপধেনুকুলে চ ৱিনিৰ্গতে ।
ভুৱি ৱিভো সমুপাহিতভূধৰঃ
প্ৰমুদিতৈঃ পশুপৈঃ পৰিৰেভিষে ॥9॥

ধৰণিমেৱ পুৰা ধৃতৱানসি
ক্ষিতিধৰোদ্ধৰণে তৱ কঃ শ্ৰমঃ ।
ইতি নুতস্ত্ৰিদশৈঃ কমলাপতে
গুৰুপুৰালয পালয মাং গদাত্ ॥10॥