স্ফুরত্পরানন্দরসাত্মকেন ত্বযা সমাসাদিতভোগলীলাঃ ।
অসীমমানন্দভরং প্রপন্না মহান্তমাপুর্মদমম্বুজাক্ষ্যঃ ॥1॥
অসীমমানন্দভরং প্রপন্না মহান্তমাপুর্মদমম্বুজাক্ষ্যঃ ॥1॥
নিলীযতেঽসৌ মযি ময্যমাযং রমাপতির্বিশ্বমনোভিরামঃ ।
ইতি স্ম সর্বাঃ কলিতাভিমানা নিরীক্ষ্য গোবিন্দ্ তিরোহিতোঽভূঃ ॥2॥
ইতি স্ম সর্বাঃ কলিতাভিমানা নিরীক্ষ্য গোবিন্দ্ তিরোহিতোঽভূঃ ॥2॥
রাধাভিধাং তাবদজাতগর্বামতিপ্রিযাং গোপবধূং মুরারে ।
ভবানুপাদায গতো বিদূরং তযা সহ স্বৈরবিহারকারী ॥3॥
ভবানুপাদায গতো বিদূরং তযা সহ স্বৈরবিহারকারী ॥3॥
তিরোহিতেঽথ ত্বযি জাততাপাঃ সমং সমেতাঃ কমলাযতাক্ষ্যঃ ।
বনে বনে ত্বাং পরিমার্গযন্ত্যো বিষাদমাপুর্ভগবন্নপারম্ ॥4॥
বনে বনে ত্বাং পরিমার্গযন্ত্যো বিষাদমাপুর্ভগবন্নপারম্ ॥4॥
হা চূত হা চম্পক কর্ণিকার হা মল্লিকে মালতি বালবল্যঃ ।
কিং বীক্ষিতো নো হৃদযৈকচোরঃ ইত্যাদি তাস্ত্বত্প্রবণা বিলেপুঃ ॥5॥
কিং বীক্ষিতো নো হৃদযৈকচোরঃ ইত্যাদি তাস্ত্বত্প্রবণা বিলেপুঃ ॥5॥
নিরীক্ষিতোঽযং সখি পঙ্কজাক্ষঃ পুরো মমেত্যাকুলমালপন্তী ।
ত্বাং ভাবনাচক্ষুষি বীক্ষ্য কাচিত্তাপং সখীনাং দ্বিগুণীচকার ॥6॥
ত্বাং ভাবনাচক্ষুষি বীক্ষ্য কাচিত্তাপং সখীনাং দ্বিগুণীচকার ॥6॥
ত্বদাত্মিকাস্তা যমুনাতটান্তে তবানুচক্রুঃ কিল চেষ্টিতানি ।
বিচিত্য ভূযোঽপি তথৈব মানাত্ত্বযা বিমুক্তাং দদৃশুশ্চ রাধাম্ ॥7॥
বিচিত্য ভূযোঽপি তথৈব মানাত্ত্বযা বিমুক্তাং দদৃশুশ্চ রাধাম্ ॥7॥
ততঃ সমং তা বিপিনে সমন্তাত্তমোবতারাবধি মার্গযন্ত্যঃ ।
পুনর্বিমিশ্রা যমুনাতটান্তে ভৃশং বিলেপুশ্চ জগুর্গুণাংস্তে ॥8॥
পুনর্বিমিশ্রা যমুনাতটান্তে ভৃশং বিলেপুশ্চ জগুর্গুণাংস্তে ॥8॥
তথা ব্যথাসঙ্কুলমানসানাং ব্রজাঙ্গনানাং করুণৈকসিন্ধো ।
জগত্ত্রযীমোহনমোহনাত্মা ত্বং প্রাদুরাসীরযি মন্দহাসী ॥9॥
জগত্ত্রযীমোহনমোহনাত্মা ত্বং প্রাদুরাসীরযি মন্দহাসী ॥9॥
সন্দিগ্ধসন্দর্শনমাত্মকান্তং ত্বাং বীক্ষ্য তন্ব্যঃ সহসা তদানীম্ ।
কিং কিং ন চক্রুঃ প্রমদাতিভারাত্ স ত্বং গদাত্ পালয মারুতেশ ॥10॥
কিং কিং ন চক্রুঃ প্রমদাতিভারাত্ স ত্বং গদাত্ পালয মারুতেশ ॥10॥