নাৰাযণীযং দশক 69 - ৰাসক্ৰীডা

কেশপাশধৃতপিঞ্ছিকাৱিততিসঞ্চলন্মকৰকুণ্ডলং
হাৰজালৱনমালিকাললিতমঙ্গৰাগঘনসৌৰভম্ ।
পীতচেলধৃতকাঞ্চিকাঞ্চিতমুদঞ্চদংশুমণিনূপুৰং
ৰাসকেলিপৰিভূষিতং তৱ হি ৰূপমীশ কলযামহে ॥1॥

তাৱদেৱ কৃতমণ্ডনে কলিতকঞ্চুলীককুচমণ্ডলে
গণ্ডলোলমণিকুণ্ডলে যুৱতিমণ্ডলেঽথ পৰিমণ্ডলে ।
অন্তৰা সকলসুন্দৰীযুগলমিন্দিৰাৰমণ সঞ্চৰন্
মঞ্জুলাং তদনু ৰাসকেলিমযি কঞ্জনাভ সমুপাদধাঃ ॥2॥

ৱাসুদেৱ তৱ ভাসমানমিহ ৰাসকেলিৰসসৌৰভং
দূৰতোঽপি খলু নাৰদাগদিতমাকলয্য কুতুকাকুলা ।
ৱেষভূষণৱিলাসপেশলৱিলাসিনীশতসমাৱৃতা
নাকতো যুগপদাগতা ৱিযতি ৱেগতোঽথ সুৰমণ্ডলী ॥3॥

ৱেণুনাদকৃততানদানকলগানৰাগগতিযোজনা-
লোভনীযমৃদুপাদপাতকৃততালমেলনমনোহৰম্ ।
পাণিসঙ্ক্ৱণিতকঙ্কণং চ মুহুৰংসলম্বিতকৰাম্বুজং
শ্ৰোণিবিম্বচলদম্বৰং ভজত ৰাসকেলিৰসডম্বৰম্ ॥4॥

স্পৰ্ধযা ৱিৰচিতানুগানকৃততাৰতাৰমধুৰস্ৱৰে
নৰ্তনেঽথ ললিতাঙ্গহাৰলুলিতাঙ্গহাৰমণিভূষণে ।
সম্মদেন কৃতপুষ্পৱৰ্ষমলমুন্মিষদ্দিৱিষদাং কুলং
চিন্মযে ত্ৱযি নিলীযমানমিৱ সম্মুমোহ সৱধূকুলম্ ॥5॥

স্ৱিন্নসন্নতনুৱল্লৰী তদনু কাপি নাম পশুপাঙ্গনা
কান্তমংসমৱলম্বতে স্ম তৱ তান্তিভাৰমুকুলেক্ষণা ॥
কাচিদাচলিতকুন্তলা নৱপটীৰসাৰঘনসৌৰভং
ৱঞ্চনেন তৱ সঞ্চুচুম্ব ভুজমঞ্চিতোৰুপুলকাঙ্কুৰা ॥6॥

কাপি গণ্ডভুৱি সন্নিধায নিজগণ্ডমাকুলিতকুণ্ডলং
পুণ্যপূৰনিধিৰন্ৱৱাপ তৱ পূগচৰ্ৱিতৰসামৃতম্ ।
ইন্দিৰাৱিহৃতিমন্দিৰং ভুৱনসুন্দৰং হি নটনান্তৰে
ত্ৱামৱাপ্য দধুৰঙ্গনাঃ কিমু ন সম্মদোন্মদদশান্তৰম্ ॥7॥

গানমীশ ৱিৰতং ক্ৰমেণ কিল ৱাদ্যমেলনমুপাৰতং
ব্ৰহ্মসম্মদৰসাকুলাঃ সদসি কেৱলং ননৃতুৰঙ্গনাঃ ।
নাৱিদন্নপি চ নীৱিকাং কিমপি কুন্তলীমপি চ কঞ্চুলীং
জ্যোতিষামপি কদম্বকং দিৱি ৱিলম্বিতং কিমপৰং ব্ৰুৱে ॥8॥

মোদসীম্নি ভুৱনং ৱিলাপ্য ৱিহৃতিং সমাপ্য চ ততো ৱিভো
কেলিসম্মৃদিতনিৰ্মলাঙ্গনৱঘৰ্মলেশসুভগাত্মনাম্ ।
মন্মথাসহনচেতসাং পশুপযোষিতাং সুকৃতচোদিত-
স্তাৱদাকলিতমূৰ্তিৰাদধিথ মাৰৱীৰপৰমোত্সৱান্ ॥9॥

কেলিভেদপৰিলোলিতাভিৰতিলালিতাভিৰবলালিভিঃ
স্ৱৈৰমীশ ননু সূৰজাপযসি চাৰুনাম ৱিহৃতিং ৱ্যধাঃ ।
কাননেঽপি চ ৱিসাৰিশীতলকিশোৰমাৰুতমনোহৰে
সূনসৌৰভমযে ৱিলেসিথ ৱিলাসিনীশতৱিমোহনম্ ॥10॥

কামিনীৰিতি হি যামিনীষু খলু কামনীযকনিধে ভৱান্
পূৰ্ণসম্মদৰসাৰ্ণৱং কমপি যোগিগম্যমনুভাৱযন্ ।
ব্ৰহ্মশঙ্কৰমুখানপীহ পশুপাঙ্গনাসু বহুমানযন্
ভক্তলোকগমনীযৰূপ কমনীয কৃষ্ণ পৰিপাহি মাম্ ॥11॥