নাৰাযণীযং দশক 74 - ভগৱতঃ মথুৰাপুৰীপ্ৰৱেশম্

সম্প্ৰাপ্তো মথুৰাং দিনাৰ্ধৱিগমে তত্ৰান্তৰস্মিন্ ৱস-
ন্নাৰামে ৱিহিতাশনঃ সখিজনৈৰ্যাতঃ পুৰীমীক্ষিতুম্ ।
প্ৰাপো ৰাজপথং চিৰশ্ৰুতিধৃতৱ্যালোককৌতূহল-
স্ত্ৰীপুংসোদ্যদগণ্যপুণ্যনিগলৈৰাকৃষ্যমাণো নু কিম্ ॥1॥

ত্ৱত্পাদদ্যুতিৱত্ সৰাগসুভগাঃ ত্ৱন্মূৰ্তিৱদ্যোষিতঃ
সম্প্ৰাপ্তা ৱিলসত্পযোধৰৰুচো লোলা ভৱত্ দৃষ্টিৱত্ ।
হাৰিণ্যস্ত্ৱদুৰঃস্থলীৱদযি তে মন্দস্মিতপ্ৰৌঢিৱ-
ন্নৈৰ্মল্যোল্লসিতাঃ কচৌঘৰুচিৱদ্ৰাজত্কলাপাশ্ৰিতাঃ ॥2॥

তাসামাকলযন্নপাঙ্গৱলনৈৰ্মোদং প্ৰহৰ্ষাদ্ভুত-
ৱ্যালোলেষু জনেষু তত্ৰ ৰজকং কঞ্চিত্ পটীং প্ৰাৰ্থযন্ ।
কস্তে দাস্যতি ৰাজকীযৱসনং যাহীতি তেনোদিতঃ
সদ্যস্তস্য কৰেণ শীৰ্ষমহৃথাঃ সোঽপ্যাপ পুণ্যাং গতিম্ ॥3॥

ভূযো ৱাযকমেকমাযতমতিং তোষেণ ৱেষোচিতং
দাশ্ৱাংসং স্ৱপদং নিনেথ সুকৃতং কো ৱেদ জীৱাত্মনাম্ ।
মালাভিঃ স্তবকৈঃ স্তৱৈৰপি পুনৰ্মালাকৃতা মানিতো
ভক্তিং তেন ৱৃতাং দিদেশিথ পৰাং লক্ষ্মীং চ লক্ষ্মীপতে ॥4॥

কুব্জামব্জৱিলোচনাং পথিপুনৰ্দৃষ্ট্ৱাঽঙ্গৰাগে তযা
দত্তে সাধু কিলাঙ্গৰাগমদদাস্তস্যা মহান্তং হৃদি ।
চিত্তস্থামৃজুতামথ প্ৰথযিতুং গাত্ৰেঽপি তস্যাঃ স্ফুটং
গৃহ্ণন্ মঞ্জু কৰেণ তামুদনযস্তাৱজ্জগত্সুন্দৰীম্ ॥5॥

তাৱন্নিশ্চিতৱৈভৱাস্তৱ ৱিভো নাত্যন্তপাপা জনা
যত্কিঞ্চিদ্দদতে স্ম শক্ত্যনুগুণং তাম্বূলমাল্যাদিকম্ ।
গৃহ্ণানঃ কুসুমাদি কিঞ্চন তদা মাৰ্গে নিবদ্ধাঞ্জলি-
ৰ্নাতিষ্ঠং বত হা যতোঽদ্য ৱিপুলামাৰ্তিং ৱ্ৰজামি প্ৰভো ॥6॥

এষ্যামীতি ৱিমুক্তযাঽপি ভগৱন্নালেপদাত্ৰ্যা তযা
দূৰাত্ কাতৰযা নিৰীক্ষিতগতিস্ত্ৱং প্ৰাৱিশো গোপুৰম্ ।
আঘোষানুমিতত্ৱদাগমমহাহৰ্ষোল্ললদ্দেৱকী-
ৱক্ষোজপ্ৰগলত্পযোৰসমিষাত্ত্ৱত্কীৰ্তিৰন্তৰ্গতা ॥7॥

আৱিষ্টো নগৰীং মহোত্সৱৱতীং কোদণ্ডশালাং ৱ্ৰজন্
মাধুৰ্যেণ নু তেজসা নু পুৰুষৈৰ্দূৰেণ দত্তান্তৰঃ ।
স্ৰগ্ভিৰ্ভূষিতমৰ্চিতং ৱৰধনুৰ্মা মেতি ৱাদাত্ পুৰঃ
প্ৰাগৃহ্ণাঃ সমৰোপযঃ কিল সমাক্ৰাক্ষীৰভাঙ্ক্ষীৰপি ॥8॥

শ্ৱঃ কংসক্ষপণোত্সৱস্য পুৰতঃ প্ৰাৰম্ভতূৰ্যোপম-
শ্চাপধ্ৱংসমহাধ্ৱনিস্তৱ ৱিভো দেৱানৰোমাঞ্চযত্ ।
কংসস্যাপি চ ৱেপথুস্তদুদিতঃ কোদণ্ডখণ্ডদ্ৱযী-
চণ্ডাভ্যাহতৰক্ষিপূৰুষৰৱৈৰুত্কূলিতোঽভূত্ ত্ৱযা ॥9॥

শিষ্টৈৰ্দুষ্টজনৈশ্চ দৃষ্টমহিমা প্ৰীত্যা চ ভীত্যা ততঃ
সম্পশ্যন্ পুৰসম্পদং প্ৰৱিচৰন্ সাযং গতো ৱাটিকাম্ ।
শ্ৰীদাম্না সহ ৰাধিকাৱিৰহজং খেদং ৱদন্ প্ৰস্ৱপ-
ন্নানন্দন্নৱতাৰকাৰ্যঘটনাদ্ৱাতেশ সংৰক্ষ মাম্ ॥10॥