নাৰাযণীযং দশক 8 - প্ৰলযৱৰ্ণনম্

এৱং তাৱত্ প্ৰাকৃতপ্ৰক্ষযান্তে
ব্ৰাহ্মে কল্পে হ্যাদিমে লব্ধজন্মা ।
ব্ৰহ্মা ভূযস্ত্ৱত্ত এৱাপ্য ৱেদান্
সৃষ্টিং চক্ৰে পূৰ্ৱকল্পোপমানাম্ ॥1॥

সোঽযং চতুৰ্যুগসহস্ৰমিতান্যহানি
তাৱন্মিতাশ্চ ৰজনীৰ্বহুশো নিনায ।
নিদ্ৰাত্যসৌ ত্ৱযি নিলীয সমং স্ৱসৃষ্টৈ-
ৰ্নৈমিত্তিকপ্ৰলযমাহুৰতোঽস্য ৰাত্ৰিম্ ॥2॥

অস্মাদৃশাং পুনৰহৰ্মুখকৃত্যতুল্যাং
সৃষ্টিং কৰোত্যনুদিনং স ভৱত্প্ৰসাদাত্ ।
প্ৰাগ্ব্ৰাহ্মকল্পজনুষাং চ পৰাযুষাং তু
সুপ্তপ্ৰবোধনসমাস্তি তদাঽপি সৃষ্টিঃ ॥3॥

পঞ্চাশদব্দমধুনা স্ৱৱযোৰ্ধৰূপ-
মেকং পৰাৰ্ধমতিৱৃত্য হি ৱৰ্ততেঽসৌ ।
তত্ৰান্ত্যৰাত্ৰিজনিতান্ কথযামি ভূমন্
পশ্চাদ্দিনাৱতৰণে চ ভৱদ্ৱিলাসান্ ॥4॥

দিনাৱসানেঽথ সৰোজযোনিঃ
সুষুপ্তিকামস্ত্ৱযি সন্নিলিল্যে ।
জগন্তি চ ত্ৱজ্জঠৰং সমীযু-
স্তদেদমেকাৰ্ণৱমাস ৱিশ্ৱম্ ॥5॥

তৱৈৱ ৱেষে ফণিৰাজি শেষে
জলৈকশেষে ভুৱনে স্ম শেষে ।
আনন্দসান্দ্ৰানুভৱস্ৱৰূপঃ
স্ৱযোগনিদ্ৰাপৰিমুদ্ৰিতাত্মা ॥6॥

কালাখ্যশক্তিং প্ৰলযাৱসানে
প্ৰবোধযেত্যাদিশতা কিলাদৌ ।
ত্ৱযা প্ৰসুপ্তং পৰিসুপ্তশক্তি-
ৱ্ৰজেন তত্ৰাখিলজীৱধাম্না ॥7॥

চতুৰ্যুগাণাং চ সহস্ৰমেৱং
ত্ৱযি প্ৰসুপ্তে পুনৰদ্ৱিতীযে ।
কালাখ্যশক্তিঃ প্ৰথমপ্ৰবুদ্ধা
প্ৰাবোধযত্ত্ৱাং কিল ৱিশ্ৱনাথ ॥8॥

ৱিবুধ্য চ ত্ৱং জলগৰ্ভশাযিন্
ৱিলোক্য লোকানখিলান্ প্ৰলীনান্ ।
তেষ্ৱেৱ সূক্ষ্মাত্মতযা নিজান্তঃ -
স্থিতেষু ৱিশ্ৱেষু দদাথ দৃষ্টিম্ ॥9॥

ততস্ত্ৱদীযাদযি নাভিৰন্ধ্ৰা-
দুদঞ্চিতং কিঞ্চন দিৱ্যপদ্মম্ ।
নিলীননিশ্শেষপদাৰ্থমালা-
সঙ্ক্ষেপৰূপং মুকুলাযমানম্ ॥10॥

তদেতদম্ভোৰুহকুড্মলং তে
কলেৱৰাত্ তোযপথে প্ৰৰূঢম্ ।
বহিৰ্নিৰীতং পৰিতঃ স্ফুৰদ্ভিঃ
স্ৱধামভিৰ্ধ্ৱান্তমলং ন্যকৃন্তত্ ॥11॥

সম্ফুল্লপত্ৰে নিতৰাং ৱিচিত্ৰে
তস্মিন্ ভৱদ্ৱীৰ্যধৃতে সৰোজে ।
স পদ্মজন্মা ৱিধিৰাৱিৰাসীত্
স্ৱযম্প্ৰবুদ্ধাখিলৱেদৰাশিঃ ॥12॥

অস্মিন্ পৰাত্মন্ ননু পাদ্মকল্পে
ত্ৱমিত্থমুত্থাপিতপদ্মযোনিঃ ।
অনন্তভূমা মম ৰোগৰাশিং
নিৰুন্ধি ৱাতালযৱাস ৱিষ্ণো ॥13॥