নাৰাযণীযং দশক 80 - স্যমন্তকোপাখ্যানম্

সত্ৰাজিতস্ত্ৱমথ লুব্ধৱদৰ্কলব্ধং
দিৱ্যং স্যমন্তকমণিং ভগৱন্নযাচীঃ ।
তত্কাৰণং বহুৱিধং মম ভাতি নূনং
তস্যাত্মজাং ত্ৱযি ৰতাং ছলতো ৱিৱোঢুম্ ॥1॥

অদত্তং তং তুভ্যং মণিৱৰমনেনাল্পমনসা
প্ৰসেনস্তদ্ভ্ৰাতা গলভুৱি ৱহন্ প্ৰাপ মৃগযাম্ ।
অহন্নেনং সিংহো মণিমহসি মাংসভ্ৰমৱশাত্
কপীন্দ্ৰস্তং হত্ৱা মণিমপি চ বালায দদিৱান্ ॥2॥

শশংসুঃ সত্ৰাজিদ্গিৰমনু জনাস্ত্ৱাং মণিহৰং
জনানাং পীযূষং ভৱতি গুণিনাং দোষকণিকা ।
ততঃ সৰ্ৱজ্ঞোঽপি স্ৱজনসহিতো মাৰ্গণপৰঃ
প্ৰসেনং তং দৃষ্ট্ৱা হৰিমপি গতোঽভূঃ কপিগুহাম্ ॥3॥

ভৱন্তমৱিতৰ্কযন্নতিৱযাঃ স্ৱযং জাম্বৱান্
মুকুন্দশৰণং হি মাং ক ইহ ৰোদ্ধুমিত্যালপন্ ।
ৱিভো ৰঘুপতে হৰে জয জযেত্যলং মুষ্টিভি-
শ্চিৰং তৱ সমৰ্চনং ৱ্যধিত ভক্তচূডামণিঃ ॥4॥

বুধ্ৱাঽথ তেন দত্তাং নৱৰমণীং ৱৰমণিং চ পৰিগৃহ্ণন্ ।
অনুগৃহ্ণন্নমুমাগাঃ সপদি চ সত্ৰাজিতে মণিং প্ৰাদাঃ ॥5॥

তদনু স খলু ব্ৰীলালোলো ৱিলোলৱিলোচনাং
দুহিতৰমহো ধীমান্ ভামাং গিৰৈৱ পৰাৰ্পিতাম্ ।
অদিত মণিনা তুভ্যং লভ্যং সমেত্য ভৱানপি
প্ৰমুদিতমনাস্তস্যৈৱাদান্মণিং গহনাশযঃ ॥6॥

ৱ্ৰীলাকুলাং ৰমযতি ত্ৱযি সত্যভামাং
কৌন্তেযদাহকথযাথ কুৰূন্ প্ৰযাতে ।
হী গান্দিনেযকৃতৱৰ্মগিৰা নিপাত্য
সত্ৰাজিতং শতধনুৰ্মণিমাজহাৰ ॥7॥

শোকাত্ কুৰূনুপগতামৱলোক্য কান্তাং
হত্ৱা দ্ৰুতং শতধনুং সমহৰ্ষযস্তাম্ ।
ৰত্নে সশঙ্ক ইৱ মৈথিলগেহমেত্য
ৰামো গদাং সমশিশিক্ষত ধাৰ্তৰাষ্ট্ৰম্ ॥8॥

অক্ৰূৰ এষ ভগৱন্ ভৱদিচ্ছযৈৱ
সত্ৰাজিতঃ কুচৰিতস্য যুযোজ হিংসাম্ ।
অক্ৰূৰতো মণিমনাহৃতৱান্ পুনস্ত্ৱং
তস্যৈৱ ভূতিমুপধাতুমিতি ব্ৰুৱন্তি ॥9॥

ভক্তস্ত্ৱযি স্থিৰতৰঃ স হি গান্দিনেয-
স্তস্যৈৱ কাপথমতিঃ কথমীশ জাতা ।
ৱিজ্ঞানৱান্ প্ৰশমৱানহমিত্যুদীৰ্ণং
গৰ্ৱং ধ্ৰুৱং শমযিতুং ভৱতা কৃতৈৱ ॥10॥

যাতং ভযেন কৃতৱৰ্মযুতং পুনস্ত-
মাহূয তদ্ৱিনিহিতং চ মণিং প্ৰকাশ্য ।
তত্ৰৈৱ সুৱ্ৰতধৰে ৱিনিধায তুষ্যন্
ভামাকুচান্তশযনঃ পৱনেশ পাযাঃ ॥11॥