নাৰাযণীযং দশক 83 - পৌণ্ড্ৰকৱধং - দ্নিনিদৱধম্

ৰামেঽথ গোকুলগতে প্ৰমদাপ্ৰসক্তে
হূতানুপেতযমুনাদমনে মদান্ধে ।
স্ৱৈৰং সমাৰমতি সেৱকৱাদমূঢো
দূতং ন্যযুঙ্ক্ত তৱ পৌণ্ড্ৰকৱাসুদেৱঃ ॥1॥

নাৰাযণোঽহমৱতীৰ্ণ ইহাস্মি ভূমৌ
ধত্সে কিল ত্ৱমপি মামকলক্ষণানি ।
উত্সৃজ্য তানি শৰণং ৱ্ৰজ মামিতি ত্ৱাং
দূতো জগাদ সকলৈৰ্হসিতঃ সভাযাম্ ॥2॥

দূতেঽথ যাতৱতি যাদৱসৈনিকৈস্ত্ৱং
যাতো দদৰ্শিথ ৱপুঃ কিল পৌণ্ড্ৰকীযম্ ।
তাপেন ৱক্ষসি কৃতাঙ্কমনল্পমূল্য-
শ্ৰীকৌস্তুভং মকৰকুণ্ডলপীতচেলম্ ॥3॥

কালাযসং নিজসুদৰ্শনমস্যতোঽস্য
কালানলোত্কৰকিৰেণ সুদৰ্শনেন ।
শীৰ্ষং চকৰ্তিথ মমৰ্দিথ চাস্য সেনাং
তন্মিত্ৰকাশিপশিৰোঽপি চকৰ্থ কাশ্যাম্ ॥4॥

জাল্যেন বালকগিৰাঽপি কিলাহমেৱ
শ্ৰীৱাসুদেৱ ইতি ৰূঢমতিশ্চিৰং সঃ ।
সাযুজ্যমেৱ ভৱদৈক্যধিযা গতোঽভূত্
কো নাম কস্য সুকৃতং কথমিত্যৱেযাত্ ॥5॥

কাশীশ্ৱৰস্য তনযোঽথ সুদক্ষিণাখ্যঃ
শৰ্ৱং প্ৰপূজ্য ভৱতে ৱিহিতাভিচাৰঃ ।
কৃত্যানলং কমপি বাণ্ৰৰণাতিভীতৈ-
ৰ্ভূতৈঃ কথঞ্চন ৱৃতৈঃ সমমভ্যমুঞ্চত্ ॥6॥

তালপ্ৰমাণচৰণামখিলং দহন্তীং
কৃত্যাং ৱিলোক্য চকিতৈঃ কথিতোঽপি পৌৰৈঃ ।
দ্যূতোত্সৱে কিমপি নো চলিতো ৱিভো ত্ৱং
পাৰ্শ্ৱস্থমাশু ৱিসসৰ্জিথ কালচক্ৰম্ ॥7॥

অভ্যাপতত্যমিতধাম্নি ভৱন্মহাস্ত্ৰে
হা হেতি ৱিদ্ৰুতৱতী খলু ঘোৰকৃত্যা।
ৰোষাত্ সুদক্ষিণমদক্ষিণচেষ্টিতং তং
পুপ্লোষ চক্ৰমপি কাশিপুৰীমধাক্ষীত্ ॥8॥

স খলু ৱিৱিদো ৰক্ষোঘাতে কৃতোপকৃতিঃ পুৰা
তৱ তু কলযা মৃত্যুং প্ৰাপ্তুং তদা খলতাং গতঃ ।
নৰকসচিৱো দেশক্লেশং সৃজন্ নগৰান্তিকে
ঝটিতি হলিনা যুধ্যন্নদ্ধা পপাত তলাহতঃ ॥9॥

সাম্বং কৌৰৱ্যপুত্ৰীহৰণনিযমিতং সান্ত্ৱনাৰ্থী কুৰূণাং
যাতস্তদ্ৱাক্যৰোষোদ্ধৃতকৰিনগৰো মোচযামাস ৰামঃ ।
তে ঘাত্যাঃ পাণ্ডৱেযৈৰিতি যদুপৃতনাং নামুচস্ত্ৱং তদানীং
তং ত্ৱাং দুৰ্বোধলীলং পৱনপুৰপতে তাপশান্ত্যৈ নিষেৱে ॥10॥