নাৰাযণীযং দশক 86 - সাল্ৱৱধং মহাভাৰতযুদ্ধম্

সাল্ৱো ভৈষ্মীৱিৱাহে যদুবলৱিজিতশ্চন্দ্ৰচূডাদ্ৱিমানং
ৱিন্দন্ সৌভং স মাযী ত্ৱযি ৱসতি কুৰুংস্ত্ৱত্পুৰীমভ্যভাঙ্ক্ষীত্ ।
প্ৰদ্যুম্নস্তং নিৰুন্ধন্নিখিলযদুভটৈৰ্ন্যগ্ৰহীদুগ্ৰৱীৰ্যং
তস্যামাত্যং দ্যুমন্তং ৱ্যজনি চ সমৰঃ সপ্তৱিংশত্যহান্তঃ ॥1॥

তাৱত্ত্ৱং ৰামশালী ত্ৱৰিতমুপগতঃ খণ্ডিতপ্ৰাযসৈন্যং
সৌভেশং তং ন্যৰুন্ধাঃ স চ কিল গদযা শাৰ্ঙ্গমভ্ৰংশযত্তে ।
মাযাতাতং ৱ্যহিংসীদপি তৱ পুৰতস্তত্ত্ৱযাপি ক্ষণাৰ্ধং
নাজ্ঞাযীত্যাহুৰেকে তদিদমৱমতং ৱ্যাস এৱ ন্যষেধীত্ ॥2॥

ক্ষিপ্ত্ৱা সৌভং গদাচূৰ্ণিতমুদকনিধৌ মঙ্ক্ষু সাল্ৱেঽপি চক্ৰে-
ণোত্কৃত্তে দন্তৱক্ত্ৰঃ প্ৰসভমভিপতন্নভ্যমুঞ্চদ্গদাং তে ।
কৌমোদক্যা হতোঽসাৱপি সুকৃতনিধিশ্চৈদ্যৱত্প্ৰাপদৈক্যং
সৰ্ৱেষামেষ পূৰ্ৱং ত্ৱযি ধৃতমনসাং মোক্ষণাৰ্থোঽৱতাৰঃ ॥3॥

ত্ৱয্যাযাতেঽথ জাতে কিল কুৰুসদসি দ্যূতকে সংযতাযাঃ
ক্ৰন্দন্ত্যা যাজ্ঞসেন্যাঃ সকৰুণমকৃথাশ্চেলমালামনন্তাম্ ।
অন্নান্তপ্ৰাপ্তশৰ্ৱাংশজমুনিচকিতদ্ৰৌপদীচিন্তিতোঽথ
প্ৰাপ্তঃ শাকান্নমশ্নন্ মুনিগণমকৃথাস্তৃপ্তিমন্তং ৱনান্তে ॥4॥

যুদ্ধোদ্যোগেঽথ মন্ত্ৰে মিলতি সতি ৱৃতঃ ফল্গুনেন ত্ৱমেকঃ
কৌৰৱ্যে দত্তসৈন্যঃ কৰিপুৰমগমো দূত্যকৃত্ পাণ্ডৱাৰ্থম্ ।
ভীষ্মদ্ৰোণাদিমান্যে তৱ খলু ৱচনে ধিক্কৃতে কৌৰৱেণ
ৱ্যাৱৃণ্ৱন্ ৱিশ্ৱৰূপং মুনিসদসি পুৰীং ক্ষোভযিত্ৱাগতোঽভূঃ ॥5॥

জিষ্ণোস্ত্ৱং কৃষ্ণ সূতঃ খলু সমৰমুখে বন্ধুঘাতে দযালুং
খিন্নং তং ৱীক্ষ্য ৱীৰং কিমিদমযি সখে নিত্য একোঽযমাত্মা ।
কো ৱধ্যঃ কোঽত্ৰ হন্তা তদিহ ৱধভিযং প্ৰোজ্ঝ্য ময্যৰ্পিতাত্মা
ধৰ্ম্যং যুদ্ধং চৰেতি প্ৰকৃতিমনযথা দৰ্শযন্ ৱিশ্ৱৰূপম্ ॥6॥

ভক্তোত্তংসেঽথ ভীষ্মে তৱ ধৰণিভৰক্ষেপকৃত্যৈকসক্তে
নিত্যং নিত্যং ৱিভিন্দত্যযুতসমধিকং প্ৰাপ্তসাদে চ পাৰ্থে ।
নিশ্শস্ত্ৰত্ৱপ্ৰতিজ্ঞাং ৱিজহদৰিৱৰং ধাৰযন্ ক্ৰোধশালী-
ৱাধাৱন্ প্ৰাঞ্জলিং তং নতশিৰসমথো ৱীক্ষ্য মোদাদপাগাঃ ॥7॥

যুদ্ধে দ্ৰোণস্য হস্তিস্থিৰৰণভগদত্তেৰিতং ৱৈষ্ণৱাস্ত্ৰং
ৱক্ষস্যাধত্ত চক্ৰস্থগিতৰৱিমহাঃ প্ৰাৰ্দযত্সিন্ধুৰাজম্ ।
নাগাস্ত্ৰে কৰ্ণমুক্তে ক্ষিতিমৱনমযন্ কেৱলং কৃত্তমৌলিং
তত্ৰে ত্ৰাপি পাৰ্থং কিমিৱ নহি ভৱান্ পাণ্ডৱানামকাৰ্ষীত্ ॥8॥

যুদ্ধাদৌ তীৰ্থগামী স খলু হলধৰো নৈমিশক্ষেত্ৰমৃচ্ছ-
ন্নপ্ৰত্যুত্থাযিসূতক্ষযকৃদথ সুতং তত্পদে কল্পযিত্ৱা ।
যজ্ঞঘ্নং ৱল্কলং পৰ্ৱণি পৰিদলযন্ স্নাততীৰ্থো ৰণান্তে
সম্প্ৰাপ্তো ভীমদুৰ্যোধনৰণমশমং ৱীক্ষ্য যাতঃ পুৰীং তে ॥9॥

সংসুপ্তদ্ৰৌপদেযক্ষপণহতধিযং দ্ৰৌণিমেত্য ত্ৱদুক্ত্যা
তন্মুক্তং ব্ৰাহ্মমস্ত্ৰং সমহৃত ৱিজযো মৌলিৰত্নং চ জহ্ৰে ।
উচ্ছিত্যৈ পাণ্ডৱানাং পুনৰপি চ ৱিশত্যুত্তৰাগৰ্ভমস্ত্ৰে
ৰক্ষন্নঙ্গুষ্ঠমাত্ৰঃ কিল জঠৰমগাশ্চক্ৰপাণিৰ্ৱিভো ত্ৱম্ ॥10॥

ধৰ্মৌঘং ধৰ্মসূনোৰভিদধদখিলং ছন্দমৃত্যুস্স ভীষ্ম-
স্ত্ৱাং পশ্যন্ ভক্তিভূম্নৈৱ হি সপদি যযৌ নিষ্কলব্ৰহ্মভূযম্ ।
সংযাজ্যাথাশ্ৱমেধৈস্ত্ৰিভিৰতিমহিতৈৰ্ধৰ্মজং পূৰ্ণকামং
স্ম্প্ৰাপ্তো দ্ৱৰকাং ত্ৱং পৱনপুৰপতে পাহি মাং সৰ্ৱৰোগাত্ ॥11॥