নাৰাযণীযং দশক 89 - ৱৃকাসুৰৱধং - ভৃগুপৰীক্ষণম্

ৰমাজানে জানে যদিহ তৱ ভক্তেষু ৱিভৱো
ন সদ্যস্সম্পদ্যস্তদিহ মদকৃত্ত্ৱাদশমিনাম্ ।
প্ৰশান্তিং কৃত্ৱৈৱ প্ৰদিশসি ততঃ কামমখিলং
প্ৰশান্তেষু ক্ষিপ্ৰং ন খলু ভৱদীযে চ্যুতিকথা ॥1॥

সদ্যঃ প্ৰসাদৰুষিতান্ ৱিধিশঙ্কৰাদীন্
কেচিদ্ৱিভো নিজগুণানুগুণং ভজন্তঃ ।
ভ্ৰষ্টা ভৱন্তি বত কষ্টমদীৰ্ঘদৃষ্ট্যা
স্পষ্টং ৱৃকাসুৰ উদাহৰণং কিলাস্মিন্ ॥2॥

শকুনিজঃ স তু নাৰদমেকদা
ত্ৱৰিততোষমপৃচ্ছদধীশ্ৱৰম্ ।
স চ দিদেশ গিৰীশমুপাসিতুং
ন তু ভৱন্তমবন্ধুমসাধুষু ॥3॥

তপস্তপ্ত্ৱা ঘোৰং স খলু কুপিতঃ সপ্তমদিনে
শিৰঃ ছিত্ৱা সদ্যঃ পুৰহৰমুপস্থাপ্য পুৰতঃ ।
অতিক্ষুদ্ৰং ৰৌদ্ৰং শিৰসি কৰদানেন নিধনং
জগন্নাথাদ্ৱৱ্ৰে ভৱতি ৱিমুখানাং ক্ৱ শুভধীঃ ॥4॥

মোক্তাৰং বন্ধমুক্তো হৰিণপতিৰিৱ প্ৰাদ্ৰৱত্সোঽথ ৰুদ্ৰং
দৈত্যাত্ ভীত্যা স্ম দেৱো দিশি দিশি ৱলতে পৃষ্ঠতো দত্তদৃষ্টিঃ ।
তূষ্ণীকে সৰ্ৱলোকে তৱ পদমধিৰোক্ষ্যন্তমুদ্ৱীক্ষ্য শৰ্ৱং
দূৰাদেৱাগ্ৰতস্ত্ৱং পটুৱটুৱপুষা তস্থিষে দানৱায ॥5॥

ভদ্ৰং তে শাকুনেয ভ্ৰমসি কিমধুনা ত্ৱং পিশাচস্য ৱাচা
সন্দেহশ্চেন্মদুক্তৌ তৱ কিমু ন কৰোষ্যঙ্গুলীমঙ্গমৌলৌ ।
ইত্থং ত্ৱদ্ৱাক্যমূঢঃ শিৰসি কৃতকৰঃ সোঽপতচ্ছিন্নপাতং
ভ্ৰংশো হ্যেৱং পৰোপাসিতুৰপি চ গতিঃ শূলিনোঽপি ত্ৱমেৱ ॥6॥

ভৃগুং কিল সৰস্ৱতীনিকটৱাসিনস্তাপসা-
স্ত্ৰিমূৰ্তিষু সমাদিশন্নধিকসত্ত্ৱতাং ৱেদিতুম্ ।
অযং পুনৰনাদৰাদুদিতৰুদ্ধৰোষে ৱিধৌ
হৰেঽপি চ জিহিংসিষৌ গিৰিজযা ধৃতে ত্ৱামগাত্ ॥7॥

সুপ্তং ৰমাঙ্কভুৱি পঙ্কজলোচনং ত্ৱাং
ৱিপ্ৰে ৱিনিঘ্নতি পদেন মুদোত্থিতস্ত্ৱম্ ।
সৰ্ৱং ক্ষমস্ৱ মুনিৱৰ্য ভৱেত্ সদা মে
ত্ৱত্পাদচিন্হমিহ ভূষণমিত্যৱাদীঃ ॥8॥

নিশ্চিত্য তে চ সুদৃঢং ত্ৱযি বদ্ধভাৱাঃ
সাৰস্ৱতা মুনিৱৰা দধিৰে ৱিমোক্ষম্ ।
ত্ৱামেৱমচ্যুত পুনশ্চ্যুতিদোষহীনং
সত্ত্ৱোচ্চযৈকতনুমেৱ ৱযং ভজামঃ ॥9॥

জগত্সৃষ্ট্যাদৌ ত্ৱাং নিগমনিৱহৈৰ্ৱন্দিভিৰিৱ
স্তুতং ৱিষ্ণো সচ্চিত্পৰমৰসনিৰ্দ্ৱৈতৱপুষম্ ।
পৰাত্মানং ভূমন্ পশুপৱনিতাভাগ্যনিৱহং
পৰিতাপশ্ৰান্ত্যৈ পৱনপুৰৱাসিন্ পৰিভজে ॥10॥