নারাযণীযং দশক 90 - বিষ্ণুমহত্তত্ত্বস্থাপনম্

বৃকভৃগুমুনিমোহিন্যম্বরীষাদিবৃত্তে-
ষ্বযি তব হি মহত্ত্বং সর্বশর্বাদিজৈত্রম্ ।
স্থিতমিহ পরমাত্মন্ নিষ্কলার্বাগভিন্নং
কিমপি যদবভাতং তদ্ধি রূপং তবৈব ॥1॥

মূর্তিত্রযেশ্বরসদাশিবপঞ্চকং যত্
প্রাহুঃ পরাত্মবপুরেব সদাশিবোঽস্মিন্ ।
তত্রেশ্বরস্তু স বিকুণ্ঠপদস্ত্বমেব
ত্রিত্বং পুনর্ভজসি সত্যপদে ত্রিভাগে ॥2॥

তত্রাপি সাত্ত্বিকতনুং তব বিষ্ণুমাহু-
র্ধাতা তু সত্ত্ববিরলো রজসৈব পূর্ণঃ ।
সত্ত্বোত্কটত্বমপি চাস্তি তমোবিকার-
চেষ্টাদিকঞ্চ তব শঙ্করনাম্নি মূর্তৌ ॥3॥

তং চ ত্রিমূর্ত্যতিগতং পরপূরুষং ত্বাং
শর্বাত্মনাপি খলু সর্বমযত্বহেতোঃ ।
শংসন্ত্যুপাসনবিধৌ তদপি স্বতস্তু
ত্বদ্রূপমিত্যতিদৃঢং বহু নঃ প্রমাণম্ ॥4॥

শ্রীশঙ্করোঽপি ভগবান্ সকলেষু তাব-
ত্ত্বামেব মানযতি যো ন হি পক্ষপাতী ।
ত্বন্নিষ্ঠমেব স হি নামসহস্রকাদি
ব্যাখ্যাত্ ভবত্স্তুতিপরশ্চ গতিং গতোঽন্তে ॥5॥

মূর্তিত্রযাতিগমুবাচ চ মন্ত্রশাস্ত্র-
স্যাদৌ কলাযসুষমং সকলেশ্বরং ত্বাম্ ।
ধ্যানং চ নিষ্কলমসৌ প্রণবে খলূক্ত্বা
ত্বামেব তত্র সকলং নিজগাদ নান্যম্ ॥6॥

সমস্তসারে চ পুরাণসঙ্গ্রহে
বিসংশযং ত্বন্মহিমৈব বর্ণ্যতে ।
ত্রিমূর্তিযুক্সত্যপদত্রিভাগতঃ
পরং পদং তে কথিতং ন শূলিনঃ ॥7॥

যত্ ব্রাহ্মকল্প ইহ ভাগবতদ্বিতীয-
স্কন্ধোদিতং বপুরনাবৃতমীশ ধাত্রে ।
তস্যৈব নাম হরিশর্বমুখং জগাদ
শ্রীমাধবঃ শিবপরোঽপি পুরাণসারে ॥8॥

যে স্বপ্রকৃত্যনুগুণা গিরিশং ভজন্তে
তেষাং ফলং হি দৃঢযৈব তদীযভক্ত্যা।
ব্যাসো হি তেন কৃতবানধিকারিহেতোঃ
স্কন্দাদিকেষু তব হানিবচোঽর্থবাদৈঃ ॥9॥

ভূতার্থকীর্তিরনুবাদবিরুদ্ধবাদৌ
ত্রেধার্থবাদগতযঃ খলু রোচনার্থাঃ ।
স্কান্দাদিকেষু বহবোঽত্র বিরুদ্ধবাদা-
স্ত্বত্তামসত্বপরিভূত্যুপশিক্ষণাদ্যাঃ ॥10॥

যত্ কিঞ্চিদপ্যবিদুষাঽপি বিভো মযোক্তং
তন্মন্ত্রশাস্ত্রবচনাদ্যভিদৃষ্টমেব ।
ব্যাসোক্তিসারমযভাগবতোপগীত
ক্লেশান্ বিধূয কুরু ভক্তিভরং পরাত্মন্ ॥11॥