নাৰাযণীযং দশক 91 - ভক্তিমহত্ত্ৱম্

শ্ৰীকৃষ্ণ ত্ৱত্পদোপাসনমভযতমং বদ্ধমিথ্যাৰ্থদৃষ্টে-
ৰ্মৰ্ত্যস্যাৰ্তস্য মন্যে ৱ্যপসৰতি ভযং যেন সৰ্ৱাত্মনৈৱ ।
যত্তাৱত্ ত্ৱত্প্ৰণীতানিহ ভজনৱিধীনাস্থিতো মোহমাৰ্গে
ধাৱন্নপ্যাৱৃতাক্ষঃ স্খলতি ন কুহচিদ্দেৱদেৱাখিলাত্মন্ ॥1॥

ভূমন্ কাযেন ৱাচা মুহুৰপি মনসা ত্ৱদ্বলপ্ৰেৰিতাত্মা
যদ্যত্ কুৰ্ৱে সমস্তং তদিহ পৰতৰে ত্ৱয্যসাৱৰ্পযামি ।
জাত্যাপীহ শ্ৱপাকস্ত্ৱযি নিহিতমনঃকৰ্মৱাগিন্দ্ৰিযাৰ্থ-
প্ৰাণো ৱিশ্ৱং পুনীতে ন তু ৱিমুখমনাস্ত্ৱত্পদাদ্ৱিপ্ৰৱৰ্যঃ ॥2॥

ভীতিৰ্নাম দ্ৱিতীযাদ্ভৱতি ননু মনঃকল্পিতং চ দ্ৱিতীযং
তেনৈক্যাভ্যাসশীলো হৃদযমিহ যথাশক্তি বুদ্ধ্যা নিৰুন্ধ্যাম্ ।
মাযাৱিদ্ধে তু তস্মিন্ পুনৰপি ন তথা ভাতি মাযাধিনাথং
তং ত্ৱাং ভক্ত্যা মহত্যা সততমনুভজনীশ ভীতিং ৱিজহ্যাম্ ॥3॥

ভক্তেৰুত্পত্তিৱৃদ্ধী তৱ চৰণজুষাং সঙ্গমেনৈৱ পুংসা-
মাসাদ্যে পুণ্যভাজাং শ্ৰিয ইৱ জগতি শ্ৰীমতাং সঙ্গমেন ।
তত্সঙ্গো দেৱ ভূযান্মম খলু সততং তন্মুখাদুন্মিষদ্ভি-
স্ত্ৱন্মাহাত্ম্যপ্ৰকাৰৈৰ্ভৱতি চ সুদৃঢা ভক্তিৰুদ্ধূতপাপা ॥4॥

শ্ৰেযোমাৰ্গেষু ভক্তাৱধিকবহুমতিৰ্জন্মকৰ্মাণি ভূযো
গাযন্ ক্ষেমাণি নামান্যপি তদুভযতঃ প্ৰদ্ৰুতং প্ৰদ্ৰুতাত্মা ।
উদ্যদ্ধাসঃ কদাচিত্ কুহচিদপি ৰুদন্ ক্ৱাপি গৰ্জন্ প্ৰগায-
ন্নুন্মাদীৱ প্ৰনৃত্যন্নযি কুৰু কৰুণাং লোকবাহ্যশ্চৰেযম্ ॥5॥

ভূতান্যেতানি ভূতাত্মকমপি সকলং পক্ষিমত্স্যান্ মৃগাদীন্
মৰ্ত্যান্ মিত্ৰাণি শত্ৰূনপি যমিতমতিস্ত্ৱন্মযান্যানমানি ।
ত্ৱত্সেৱাযাং হি সিদ্ধ্যেন্মম তৱ কৃপযা ভক্তিদাৰ্ঢ্যং ৱিৰাগ-
স্ত্ৱত্তত্ত্ৱস্যাৱবোধোঽপি চ ভুৱনপতে যত্নভেদং ৱিনৈৱ ॥6॥

নো মুহ্যন্ ক্ষুত্তৃডাদ্যৈৰ্ভৱসৰণিভৱৈস্ত্ৱন্নিলীনাশযত্ৱা-
চ্চিন্তাসাতত্যশালী নিমিষলৱমপি ত্ৱত্পদাদপ্ৰকম্পঃ ।
ইষ্টানিষ্টেষু তুষ্টিৱ্যসনৱিৰহিতো মাযিকত্ৱাৱবোধা-
জ্জ্যোত্স্নাভিস্ত্ৱন্নখেন্দোৰধিকশিশিৰিতেনাত্মনা সঞ্চৰেযম্ ॥7॥

ভূতেষ্ৱেষু ত্ৱদৈক্যস্মৃতিসমধিগতৌ নাধিকাৰোঽধুনা চে-
ত্ত্ৱত্প্ৰেম ত্ৱত্কমৈত্ৰী জডমতিষু কৃপা দ্ৱিট্সু ভূযাদুপেক্ষা ।
অৰ্চাযাং ৱা সমৰ্চাকুতুকমুৰুতৰশ্ৰদ্ধযা ৱৰ্ধতাং মে
ত্ৱত্সংসেৱী তথাপি দ্ৰুতমুপলভতে ভক্তলোকোত্তমত্ৱম্ ॥8॥

আৱৃত্য ত্ৱত্স্ৱৰূপং ক্ষিতিজলমৰুদাদ্যাত্মনা ৱিক্ষিপন্তী
জীৱান্ ভূযিষ্ঠকৰ্মাৱলিৱিৱশগতীন্ দুঃখজালে ক্ষিপন্তী ।
ত্ৱন্মাযা মাভিভূন্মামযি ভুৱনপতে কল্পতে তত্প্ৰশান্ত্যৈ
ত্ৱত্পাদে ভক্তিৰেৱেত্যৱদদযি ৱিভো সিদ্ধযোগী প্ৰবুদ্ধঃ ॥9॥

দুঃখান্যালোক্য জন্তুষ্ৱলমুদিতৱিৱেকোঽহমাচাৰ্যৱৰ্যা-
ল্লব্ধ্ৱা ত্ৱদ্ৰূপতত্ত্ৱং গুণচৰিতকথাদ্যুদ্ভৱদ্ভক্তিভূমা ।
মাযামেনাং তৰিত্ৱা পৰমসুখমযে ত্ৱত্পদে মোদিতাহে
তস্যাযং পূৰ্ৱৰঙ্গঃ পৱনপুৰপতে নাশযাশেষৰোগান্ ॥10॥