নাৰাযণীযং দশক 92 - কৰ্মমিশ্ৰভক্তিঃ

ৱেদৈস্সৰ্ৱাণি কৰ্মাণ্যফলপৰতযা ৱৰ্ণিতানীতি বুধ্ৱা
তানি ত্ৱয্যৰ্পিতান্যেৱ হি সমনুচৰন্ যানি নৈষ্কৰ্ম্যমীশ ।
মা ভূদ্ৱেদৈৰ্নিষিদ্ধে কুহচিদপি মনঃকৰ্মৱাচাং প্ৰৱৃত্তি-
ৰ্দুৰ্ৱৰ্জং চেদৱাপ্তং তদপি খলু ভৱত্যৰ্পযে চিত্প্ৰকাশে ॥1॥

যস্ত্ৱন্যঃ কৰ্মযোগস্তৱ ভজনমযস্তত্ৰ চাভীষ্টমূৰ্তিং
হৃদ্যাং সত্ত্ৱৈকৰূপাং দৃষদি হৃদি মৃদি ক্ৱাপি ৱা ভাৱযিত্ৱা ।
পুষ্পৈৰ্গন্ধৈৰ্নিৱেদ্যৈৰপি চ ৱিৰচিতৈঃ শক্তিতো ভক্তিপূতৈ-
ৰ্নিত্যং ৱৰ্যাং সপৰ্যাং ৱিদধদযি ৱিভো ত্ৱত্প্ৰসাদং ভজেযম্ ॥2॥

স্ত্ৰীশূদ্ৰাস্ত্ৱত্কথাদিশ্ৰৱণৱিৰহিতা আসতাং তে দযাৰ্হা-
স্ত্ৱত্পাদাসন্নযাতান্ দ্ৱিজকুলজনুষো হন্ত শোচাম্যশান্তান্ ।
ৱৃত্ত্যৰ্থং তে যজন্তো বহুকথিতমপি ত্ৱামনাকৰ্ণযন্তো
দৃপ্তা ৱিদ্যাভিজাত্যৈঃ কিমু ন ৱিদধতে তাদৃশং মা কৃথা মাম্ ॥3॥

পাপোঽযং কৃষ্ণৰামেত্যভিলপতি নিজং গূহিতুং দুশ্চৰিত্ৰং
নিৰ্লজ্জস্যাস্য ৱাচা বহুতৰকথনীযানি মে ৱিঘ্নিতানি ।
ভ্ৰাতা মে ৱন্ধ্যশীলো ভজতি কিল সদা ৱিষ্ণুমিত্থং বুধাংস্তে
নিন্দন্ত্যুচ্চৈৰ্হসন্তি ত্ৱযি নিহিতমতীংস্তাদৃশং মা কৃথা মাম্ ॥4॥

শ্ৱেতচ্ছাযং কৃতে ত্ৱাং মুনিৱৰৱপুষং প্ৰীণযন্তে তপোভি-
স্ত্ৰেতাযাং স্ৰুক্স্ৰুৱাদ্যঙ্কিতমৰুণতনুং যজ্ঞৰূপং যজন্তে ।
সেৱন্তে তন্ত্ৰমাৰ্গৈৰ্ৱিলসদৰিগদং দ্ৱাপৰে শ্যামলাঙ্গং
নীলং সঙ্কীৰ্তনাদ্যৈৰিহ কলিসমযে মানুষাস্ত্ৱাং ভজন্তে ॥5॥

সোঽযং কালেযকালো জযতি মুৰৰিপো যত্ৰ সঙ্কীৰ্তনাদ্যৈ-
ৰ্নিৰ্যত্নৈৰেৱ মাৰ্গৈৰখিলদ ন চিৰাত্ত্ৱত্প্ৰসাদং ভজন্তে ।
জাতাস্ত্ৰেতাকৃতাদাৱপি হি কিল কলৌ সম্ভৱং কামযন্তে
দৈৱাত্তত্ৰৈৱ জাতান্ ৱিষযৱিষৰসৈৰ্মা ৱিভো ৱঞ্চযাস্মান্ ॥6॥

ভক্তাস্তাৱত্কলৌ স্যুৰ্দ্ৰমিলভুৱি ততো ভূৰিশস্তত্ৰ চোচ্চৈঃ
কাৱেৰীং তাম্ৰপৰ্ণীমনু কিল কৃতমালাং চ পুণ্যাং প্ৰতীচীম্ ।
হা মামপ্যেতদন্তৰ্ভৱমপি চ ৱিভো কিঞ্চিদঞ্চদ্ৰসং ত্ৱ-
য্যাশাপাশৈৰ্নিবধ্য ভ্ৰময ন ভগৱন্ পূৰয ত্ৱন্নিষেৱাম্ ॥7॥

দৃষ্ট্ৱা ধৰ্মদ্ৰুহং তং কলিমপকৰুণং প্ৰাঙ্মহীক্ষিত্ পৰীক্ষিত্
হন্তুং ৱ্যাকৃষ্টখড্গোঽপি ন ৱিনিহতৱান্ সাৰৱেদী গুণাংশাত্ ।
ত্ৱত্সেৱাদ্যাশু সিদ্ধ্যেদসদিহ ন তথা ত্ৱত্পৰে চৈষ ভীৰু-
ৰ্যত্তু প্ৰাগেৱ ৰোগাদিভিৰপহৰতে তত্ৰ হা শিক্ষযৈনম্ ॥8॥

গঙ্গা গীতা চ গাযত্ৰ্যপি চ তুলসিকা গোপিকাচন্দনং তত্
সালগ্ৰামাভিপূজা পৰপুৰুষ তথৈকাদশী নামৱৰ্ণাঃ ।
এতান্যষ্টাপ্যযত্নান্যপি কলিসমযে ত্ৱত্প্ৰসাদপ্ৰৱৃদ্ধ্যা
ক্ষিপ্ৰং মুক্তিপ্ৰদানীত্যভিদধুঃ ঋষযস্তেষু মাং সজ্জযেথাঃ ॥9॥

দেৱৰ্ষীণাং পিতৃণামপি ন পুনঃ ঋণী কিঙ্কৰো ৱা স ভূমন্ ।
যোঽসৌ সৰ্ৱাত্মনা ত্ৱাং শৰণমুপগতস্সৰ্ৱকৃত্যানি হিত্ৱা ।
তস্যোত্পন্নং ৱিকৰ্মাপ্যখিলমপনুদস্যেৱ চিত্তস্থিতস্ত্ৱং
তন্মে পাপোত্থতাপান্ পৱনপুৰপতে ৰুন্ধি ভক্তিং প্ৰণীযাঃ ॥10॥