নাৰাযণীযং দশক 94 - তত্ত্ৱজ্ঞানোত্পত্তিঃ

শুদ্ধা নিষ্কামধৰ্মৈঃ প্ৰৱৰগুৰুগিৰা তত্স্ৱৰূপং পৰং তে
শুদ্ধং দেহেন্দ্ৰিযাদিৱ্যপগতমখিলৱ্যাপ্তমাৱেদযন্তে ।
নানাত্ৱস্থৌল্যকাৰ্শ্যাদি তু গুণজৱপুস্সঙ্গতোঽধ্যাসিতং তে
ৱহ্নেৰ্দাৰুপ্ৰভেদেষ্ৱিৱ মহদণুতাদীপ্ততাশান্ততাদি ॥1॥

আচাৰ্যাখ্যাধৰস্থাৰণিসমনুমিলচ্ছিষ্যৰূপোত্তৰাৰ-
ণ্যাৱেধোদ্ভাসিতেন স্ফুটতৰপৰিবোধাগ্নিনা দহ্যমানে ।
কৰ্মালীৱাসনাতত্কৃততনুভুৱনভ্ৰান্তিকান্তাৰপূৰে
দাহ্যাভাৱেন ৱিদ্যাশিখিনি চ ৱিৰতে ত্ৱন্মযী খল্ৱৱস্থা ॥2॥

এৱং ত্ৱত্প্ৰাপ্তিতোঽন্যো নহি খলু নিখিলক্লেশহানেৰুপাযো
নৈকান্তাত্যন্তিকাস্তে কৃষিৱদগদষাড্গুণ্যষট্কৰ্মযোগাঃ ।
দুৰ্ৱৈকল্যৈৰকল্যা অপি নিগমপথাস্তত্ফলান্যপ্যৱাপ্তা
মত্তাস্ত্ৱাং ৱিস্মৰন্তঃ প্ৰসজতি পতনে যান্ত্যনন্তান্ ৱিষাদান্॥3॥

ত্ৱল্লোকাদন্যলোকঃ ক্ৱনু ভযৰহিতো যত্ পৰাৰ্ধদ্ৱযান্তে
ত্ৱদ্ভীতস্সত্যলোকেঽপি ন সুখৱসতিঃ পদ্মভূঃ পদ্মনাভ ।
এৱং ভাৱে ত্ৱধৰ্মাৰ্জিতবহুতমসাং কা কথা নাৰকাণাং
তন্মে ত্ৱং ছিন্ধি বন্ধং ৱৰদ্ কৃপণবন্ধো কৃপাপূৰসিন্ধো ॥4॥

যাথাৰ্থ্যাত্ত্ৱন্মযস্যৈৱ হি মম ন ৱিভো ৱস্তুতো বন্ধমোক্ষৌ
মাযাৱিদ্যাতনুভ্যাং তৱ তু ৱিৰচিতৌ স্ৱপ্নবোধোপমৌ তৌ ।
বদ্ধে জীৱদ্ৱিমুক্তিং গতৱতি চ ভিদা তাৱতী তাৱদেকো
ভুঙ্ক্তে দেহদ্ৰুমস্থো ৱিষযফলৰসান্নাপৰো নিৰ্ৱ্যথাত্মা ॥5॥

জীৱন্মুক্তত্ৱমেৱংৱিধমিতি ৱচসা কিং ফলং দূৰদূৰে
তন্নামাশুদ্ধবুদ্ধেৰ্ন চ লঘু মনসশ্শোধনং ভক্তিতোঽন্যত্ ।
তন্মে ৱিষ্ণো কৃষীষ্ঠাস্ত্ৱযি কৃতসকলপ্ৰাৰ্পণং ভক্তিভাৰং
যেন স্যাং মঙ্ক্ষু কিঞ্চিদ্ গুৰুৱচনমিলত্ত্ৱত্প্ৰবোধস্ত্ৱদাত্মা ॥6॥

শব্দ্ব্ৰহ্মণ্যপীহ প্ৰযতিতমনসস্ত্ৱাং ন জানন্তি কেচিত্
কষ্টং ৱন্ধ্যশ্ৰমাস্তে চিৰতৰমিহ গাং বিভ্ৰতে নিষ্প্ৰসূতিম্ ।
যস্যাং ৱিশ্ৱাভিৰামাস্সকলমলহৰা দিৱ্যলীলাৱতাৰাঃ
সচ্চিত্সান্দ্ৰং চ ৰূপং তৱ ন নিগদিতং তাং ন ৱাচং ভ্ৰিযাসম্ ॥7॥

যো যাৱান্ যাদৃশো ৱা ত্ৱমিতি কিমপি নৈৱাৱগচ্ছামি ভূম্-
ন্নেৱঞ্চানন্যভাৱস্ত্ৱদনুভজনমেৱাদ্ৰিযে চৈদ্যৱৈৰিন্ ।
ত্ৱল্লিঙ্গানাং ত্ৱদঙ্ঘ্ৰিপ্ৰিযজনসদসাং দৰ্শনস্পৰ্শনাদি-
ৰ্ভূযান্মে ত্ৱত্প্ৰপূজানতিনুতিগুণকৰ্মানুকীৰ্ত্যাদৰোঽপি ॥8॥

যদ্যল্লভ্যেত তত্তত্তৱ সমুপহৃতং দেৱ দাসোঽস্মি তেঽহং
ত্ৱদ্গেহোন্মাৰ্জনাদ্যং ভৱতু মম মুহুঃ কৰ্ম নিৰ্মাযমেৱ ।
সূৰ্যাগ্নিব্ৰাহ্মণাত্মাদিষু লসিতচতুৰ্বাহুমাৰাধযে ত্ৱাং
ত্ৱত্প্ৰেমাৰ্দ্ৰত্ৱৰূপো মম সততমভিষ্যন্দতাং ভক্তিযোগঃ ॥9॥

ঐক্যং তে দানহোমৱ্ৰতনিযমতপস্সাঙ্খ্যযোগৈৰ্দুৰাপং
ত্ৱত্সঙ্গেনৈৱ গোপ্যঃ কিল সুকৃতিতমা প্ৰাপুৰানন্দসান্দ্ৰম্ ।
ভক্তেষ্ৱন্যেষু ভূযস্স্ৱপি বহুমনুষে ভক্তিমেৱ ত্ৱমাসাং
তন্মে ত্ৱদ্ভক্তিমেৱ দ্ৰঢয হৰ গদান্ কৃষ্ণ ৱাতালযেশ ॥10॥