নাৰাযণীযং দশক 96 - ভগৱদ্ৱিভূতযঃ তথা জ্ঞানকৰ্মভক্তিযোগাঃ

ত্ৱং হি ব্ৰহ্মৈৱ সাক্ষাত্ পৰমুৰুমহিমন্নক্ষৰাণামকাৰ-
স্তাৰো মন্ত্ৰেষু ৰাজ্ঞাং মনুৰসি মুনিষু ত্ৱং ভৃগুৰ্নাৰদোঽপি ।
প্ৰহ্লাদো দানৱানাং পশুষু চ সুৰভিঃ পক্ষিণাং ৱৈনতেযো
নাগানামস্যনন্তস্সুৰসৰিদপি চ স্ৰোতসাং ৱিশ্ৱমূৰ্তে ॥1॥

ব্ৰহ্মণ্যানাং বলিস্ত্ৱং ক্ৰতুষু চ জপযজ্ঞোঽসি ৱীৰেষু পাৰ্থো
ভক্তানামুদ্ধৱস্ত্ৱং বলমসি বলিনাং ধাম তেজস্ৱিনাং ত্ৱম্ ।
নাস্ত্যন্তস্ত্ৱদ্ৱিভূতেৰ্ৱিকসদতিশযং ৱস্তু সৰ্ৱং ত্ৱমেৱ
ত্ৱং জীৱস্ত্ৱং প্ৰধানং যদিহ ভৱদৃতে তন্ন কিঞ্চিত্ প্ৰপঞ্চে ॥2॥

ধৰ্মং ৱৰ্ণাশ্ৰমাণাং শ্ৰুতিপথৱিহিতং ত্ৱত্পৰত্ৱেন ভক্ত্যা
কুৰ্ৱন্তোঽন্তৰ্ৱিৰাগে ৱিকসতি শনকৈঃ সন্ত্যজন্তো লভন্তে ।
সত্তাস্ফূৰ্তিপ্ৰিযত্ৱাত্মকমখিলপদাৰ্থেষু ভিন্নেষ্ৱভিন্নং
নিৰ্মূলং ৱিশ্ৱমূলং পৰমমহমিতি ত্ৱদ্ৱিবোধং ৱিশুদ্ধম্ ॥3॥

জ্ঞানং কৰ্মাপি ভক্তিস্ত্ৰিতযমিহ ভৱত্প্ৰাপকং তত্ৰ তাৱ-
ন্নিৰ্ৱিণ্ণানামশেষে ৱিষয ইহ ভৱেত্ জ্ঞানযোগেঽধিকাৰঃ ।
সক্তানাং কৰ্মযোগস্ত্ৱযি হি ৱিনিহিতো যে তু নাত্যন্তসক্তাঃ
নাপ্যত্যন্তং ৱিৰক্তাস্ত্ৱযি চ ধৃতৰসা ভক্তিযোগো হ্যমীষাম্ ॥4॥

জ্ঞানং ত্ৱদ্ভক্ততাং ৱা লঘু সুকৃতৱশান্মৰ্ত্যলোকে লভন্তে
তস্মাত্তত্ৰৈৱ জন্ম স্পৃহযতি ভগৱন্ নাকগো নাৰকো ৱা ।
আৱিষ্টং মাং তু দৈৱাদ্ভৱজলনিধিপোতাযিতে মৰ্ত্যদেহে
ত্ৱং কৃত্ৱা কৰ্ণধাৰং গুৰুমনুগুণৱাতাযিতস্তাৰযেথাঃ ॥5॥

অৱ্যক্তং মাৰ্গযন্তঃ শ্ৰুতিভিৰপি নযৈঃ কেৱলজ্ঞানলুব্ধাঃ
ক্লিশ্যন্তেঽতীৱ সিদ্ধিং বহুতৰজনুষামন্ত এৱাপ্নুৱন্তি ।
দূৰস্থঃ কৰ্মযোগোঽপি চ পৰমফলে নন্ৱযং ভক্তিযোগ-
স্ত্ৱামূলাদেৱ হৃদ্যস্ত্ৱৰিতমযি ভৱত্প্ৰাপকো ৱৰ্ধতাং মে ॥6॥

জ্ঞানাযৈৱাতিযত্নং মুনিৰপৱদতে ব্ৰহ্মতত্ত্ৱং তু শৃণ্ৱন্
গাঢং ত্ৱত্পাদভক্তিং শৰণমযতি যস্তস্য মুক্তিঃ কৰাগ্ৰে ।
ত্ৱদ্ধ্যানেঽপীহ তুল্যা পুনৰসুকৰতা চিত্তচাঞ্চল্যহেতো-
ৰভ্যাসাদাশু শক্যং তদপি ৱশযিতুং ত্ৱত্কৃপাচাৰুতাভ্যাম্ ॥7॥

নিৰ্ৱিণ্ণঃ কৰ্মমাৰ্গে খলু ৱিষমতমে ত্ৱত্কথাদৌ চ গাঢং
জাতশ্ৰদ্ধোঽপি কামানযি ভুৱনপতে নৈৱ শক্নোমি হাতুম্ ।
তদ্ভূযো নিশ্চযেন ত্ৱযি নিহিতমনা দোষবুদ্ধ্যা ভজংস্তান্
পুষ্ণীযাং ভক্তিমেৱ ত্ৱযি হৃদযগতে মঙ্ক্ষু নঙ্ক্ষ্যন্তি সঙ্গাঃ ॥8॥

কশ্চিত্ ক্লেশাৰ্জিতাৰ্থক্ষযৱিমলমতিৰ্নুদ্যমানো জনৌঘৈঃ
প্ৰাগেৱং প্ৰাহ ৱিপ্ৰো ন খলু মম জনঃ কালকৰ্মগ্ৰহা ৱা।
চেতো মে দুঃখহেতুস্তদিহ গুণগণং ভাৱযত্সৰ্ৱকাৰী-
ত্যুক্ত্ৱা শান্তো গতস্ত্ৱাং মম চ কুৰু ৱিভো তাদৃশী চিত্তশান্তিম্ ॥9॥

ঐলঃ প্ৰাগুৰ্ৱশীং প্ৰত্যতিৱিৱশমনাঃ সেৱমানশ্চিৰং তাং
গাঢং নিৰ্ৱিদ্য ভূযো যুৱতিসুখমিদং ক্ষুদ্ৰমেৱেতি গাযন্ ।
ত্ৱদ্ভক্তিং প্ৰাপ্য পূৰ্ণঃ সুখতৰমচৰত্তদ্ৱদুদ্ধূতসঙ্গং
ভক্তোত্তংসং ক্ৰিযা মাং পৱনপুৰপতে হন্ত মে ৰুন্ধি ৰোগান্ ॥10॥