নাৰাযণীযং দশক 97 - উত্তমভক্তিপ্ৰাৰ্থনা তথা মাৰ্কণ্ডেয কথা

ত্ৰৈগুণ্যাদ্ভিন্নৰূপং ভৱতি হি ভুৱনে হীনমধ্যোত্তমং যত্
জ্ঞানং শ্ৰদ্ধা চ কৰ্তা ৱসতিৰপি সুখং কৰ্ম চাহাৰভেদাঃ ।
ত্ৱত্ক্ষেত্ৰত্ৱন্নিষেৱাদি তু যদিহ পুনস্ত্ৱত্পৰং তত্তু সৰ্ৱং
প্ৰাহুৰ্নৈগুণ্যনিষ্ঠং তদনুভজনতো মঙ্ক্ষু সিদ্ধো ভৱেযম্ ॥1॥

ত্ৱয্যেৱ ন্যস্তচিত্তঃ সুখমযি ৱিচৰন্ সৰ্ৱচেষ্টাস্ত্ৱদৰ্থং
ত্ৱদ্ভক্তৈঃ সেৱ্যমানানপি চৰিতচৰানাশ্ৰযন্ পুণ্যদেশান্ ।
দস্যৌ ৱিপ্ৰে মৃগাদিষ্ৱপি চ সমমতিৰ্মুচ্যমানাৱমান-
স্পৰ্ধাসূযাদিদোষঃ সততমখিলভূতেষু সম্পূজযে ত্ৱাম্ ॥2॥

ত্ৱদ্ভাৱো যাৱদেষু স্ফুৰতি ন ৱিশদং তাৱদেৱং হ্যুপাস্তিং
কুৰ্ৱন্নৈকাত্ম্যবোধে ঝটিতি ৱিকসতি ত্ৱন্মযোঽহং চৰেযম্ ।
ত্ৱদ্ধৰ্মস্যাস্য তাৱত্ কিমপি ন ভগৱন্ প্ৰস্তুতস্য প্ৰণাশ-
স্তস্মাত্সৰ্ৱাত্মনৈৱ প্ৰদিশ মম ৱিভো ভক্তিমাৰ্গং মনোজ্ঞম্ ॥3॥

তং চৈনং ভক্তিযোগং দ্ৰঢযিতুমযি মে সাধ্যমাৰোগ্যমাযু-
ৰ্দিষ্ট্যা তত্ৰাপি সেৱ্যং তৱ চৰণমহো ভেষজাযেৱ দুগ্ধম্ ।
মাৰ্কণ্ডেযো হি পূৰ্ৱং গণকনিগদিতদ্ৱাদশাব্দাযুৰুচ্চৈঃ
সেৱিত্ৱা ৱত্সৰং ত্ৱাং তৱ ভটনিৱহৈৰ্দ্ৰাৱযামাস মৃত্যুম্ ॥4॥

মাৰ্কণ্ডেযশ্চিৰাযুঃ স খলু পুনৰপি ত্ৱত্পৰঃ পুষ্পভদ্ৰা-
তীৰে নিন্যে তপস্যন্নতুলসুখৰতিঃ ষট্ তু মন্ৱন্তৰাণি ।
দেৱেন্দ্ৰঃ সপ্তমস্তং সুৰযুৱতিমৰুন্মন্মথৈৰ্মোহযিষ্যন্
যোগোষ্মপ্লুষ্যমাণৈৰ্ন তু পুনৰশকত্ত্ৱজ্জনং নিৰ্জযেত্ কঃ ॥5॥

প্ৰীত্যা নাৰাযণাখ্যস্ত্ৱমথ নৰসখঃ প্ৰাপ্তৱানস্য পাৰ্শ্ৱং
তুষ্ট্যা তোষ্টূযমানঃ স তু ৱিৱিধৱৰৈৰ্লোভিতো নানুমেনে ।
দ্ৰষ্টুং মাযাং ত্ৱদীযাং কিল পুনৰৱৃণোদ্ভক্তিতৃপ্তান্তৰাত্মা
মাযাদুঃখানভিজ্ঞস্তদপি মৃগযতে নূনমাশ্চৰ্যহেতোঃ ॥6॥

যাতে ত্ৱয্যাশু ৱাতাকুলজলদগলত্তোযপূৰ্ণাতিঘূৰ্ণত্-
সপ্তাৰ্ণোৰাশিমগ্নে জগতি স তু জলে সম্ভ্ৰমন্ ৱৰ্ষকোটীঃ ।
দীনঃ প্ৰৈক্ষিষ্ট দূৰে ৱটদলশযনং কঞ্চিদাশ্চৰ্যবালং
ত্ৱামেৱ শ্যামলাঙ্গং ৱদনসৰসিজন্যস্তপাদাঙ্গুলীকম্ ॥7॥

দৃষ্ট্ৱা ত্ৱাং হৃষ্টৰোমা ত্ৱৰিতমুপগতঃ স্প্ৰষ্টুকামো মুনীন্দ্ৰঃ
শ্ৱাসেনান্তৰ্নিৱিষ্টঃ পুনৰিহ সকলং দৃষ্টৱান্ ৱিষ্টপৌঘম্ ।
ভূযোঽপি শ্ৱাসৱাতৈৰ্বহিৰনুপতিতো ৱীক্ষিতস্ত্ৱত্কটাক্ষৈ-
ৰ্মোদাদাশ্লেষ্টুকামস্ত্ৱযি পিহিততনৌ স্ৱাশ্ৰমে প্ৰাগ্ৱদাসীত্ ॥8॥

গৌৰ্যা সাৰ্ধং তদগ্ৰে পুৰভিদথ গতস্ত্ৱত্প্ৰিযপ্ৰেক্ষণাৰ্থী
সিদ্ধানেৱাস্য দত্ৱা স্ৱযমযমজৰামৃত্যুতাদীন্ গতোঽভূত্ ।
এৱং ত্ৱত্সেৱযৈৱ স্মৰৰিপুৰপি স প্ৰীযতে যেন তস্মা-
ন্মূৰ্তিত্ৰয্যাত্মকস্ত্ৱং ননু সকলনিযন্তেতি সুৱ্যক্তমাসীত্ ॥9॥

ত্ৰ্যংশেস্মিন্ সত্যলোকে ৱিধিহৰিপুৰভিন্মন্দিৰাণ্যূৰ্ধ্ৱমূৰ্ধ্ৱং
তেভোঽপ্যূৰ্ধ্ৱং তু মাযাৱিকৃতিৱিৰহিতো ভাতি ৱৈকুণ্ঠলোকঃ ।
তত্ৰ ত্ৱং কাৰণাম্ভস্যপি পশুপকুলে শুদ্ধসত্ত্ৱৈকৰূপী
সচ্চিত্ব্ৰহ্মাদ্ৱযাত্মা পৱনপুৰপতে পাহি মাং সৰ্ৱৰোগাত্ ॥10॥