নাৰাযণীযং দশক 98 - নিষ্কলব্ৰহ্মোপাসনম্

যস্মিন্নেতদ্ৱিভাতং যত ইদমভৱদ্যেন চেদং য এত-
দ্যোঽস্মাদুত্তীৰ্ণৰূপঃ খলু সকলমিদং ভাসিতং যস্য ভাসা ।
যো ৱাচাং দূৰদূৰে পুনৰপি মনসাং যস্য দেৱা মুনীন্দ্ৰাঃ
নো ৱিদ্যুস্তত্ত্ৱৰূপং কিমু পুনৰপৰে কৃষ্ণ তস্মৈ নমস্তে ॥1॥

জন্মাথো কৰ্ম নাম স্ফুটমিহ গুণদোষাদিকং ৱা ন যস্মিন্
লোকানামূতযে যঃ স্ৱযমনুভজতে তানি মাযানুসাৰী ।
ৱিভ্ৰচ্ছক্তীৰৰূপোঽপি চ বহুতৰৰূপোঽৱভাত্যদ্ভুতাত্মা
তস্মৈ কৈৱল্যধাম্নে পৰৰসপৰিপূৰ্ণায ৱিষ্ণো নমস্তে ॥2॥

নো তিৰ্যঞ্চন্ন মৰ্ত্যং ন চ সুৰমসুৰং ন স্ত্ৰিযং নো পুম্মাংসং
ন দ্ৰৱ্যং কৰ্ম জাতিং গুণমপি সদসদ্ৱাপি তে ৰূপমাহুঃ ।
শিষ্টং যত্ স্যান্নিষেধে সতি নিগমশতৈৰ্লক্ষণাৱৃত্তিতস্তত্
কৃচ্ছ্ৰেণাৱেদ্যমানং পৰমসুখমযং ভাতি তস্মৈ নমস্তে ॥3॥

মাযাযাং বিম্বিতস্ত্ৱং সৃজসি মহদহঙ্কাৰতন্মাত্ৰভেদৈ-
ৰ্ভূতগ্ৰামেন্দ্ৰিযাদ্যৈৰপি সকলজগত্স্ৱপ্নসঙ্কল্পকল্পম্ ।
ভূযঃ সংহৃত্য সৰ্ৱং কমঠ ইৱ পদান্যাত্মনা কালশক্ত্যা
গম্ভীৰে জাযমানে তমসি ৱিতিমিৰো ভাসি তস্মৈ নমস্তে ॥4॥

শব্দব্ৰহ্মেতি কৰ্মেত্যণুৰিতি ভগৱন্ কাল ইত্যালপন্তি
ত্ৱামেকং ৱিশ্ৱহেতুং সকলমযতযা সৰ্ৱথা কল্প্যমানম্ ।
ৱেদান্তৈৰ্যত্তু গীতং পুৰুষপৰচিদাত্মাভিধং তত্তু তত্ত্ৱং
প্ৰেক্ষামাত্ৰেণ মূলপ্ৰকৃতিৱিকৃতিকৃত্ কৃষ্ণ তস্মৈ নমস্তে ॥5॥

সত্ত্ৱেনাসত্তযা ৱা ন চ খলু সদসত্ত্ৱেন নিৰ্ৱাচ্যৰূপা
ধত্তে যাসাৱৱিদ্যা গুণফণিমতিৱদ্ৱিশ্ৱদৃশ্যাৱভাসম্ ।
ৱিদ্যাত্ৱং সৈৱ যাতা শ্ৰুতিৱচনলৱৈৰ্যত্কৃপাস্যন্দলাভে
সংসাৰাৰণ্যসদ্যস্ত্ৰুটনপৰশুতামেতি তস্মৈ নমস্তে ॥6॥

ভূষাসু স্ৱৰ্ণৱদ্ৱা জগতি ঘটশৰাৱাদিকে মৃত্তিকাৱ-
ত্তত্ত্ৱে সঞ্চিন্ত্যমানে স্ফুৰতি তদধুনাপ্যদ্ৱিতীযং ৱপুস্তে ।
স্ৱপ্নদ্ৰষ্টুঃ প্ৰবোধে তিমিৰলযৱিধৌ জীৰ্ণৰজ্জোশ্চ যদ্ৱ-
দ্ৱিদ্যালাভে তথৈৱ স্ফুটমপি ৱিকসেত্ কৃষ্ণ তস্মৈ নমস্তে ॥7॥

যদ্ভীত্যোদেতি সূৰ্যো দহতি চ দহনো ৱাতি ৱাযুস্তথান্যে
যদ্ভীতাঃ পদ্মজাদ্যাঃ পুনৰুচিতবলীনাহৰন্তেঽনুকালম্ ।
যেনৈৱাৰোপিতাঃ প্ৰাঙ্নিজপদমপি তে চ্যাৱিতাৰশ্চ পশ্চাত্
তস্মৈ ৱিশ্ৱং নিযন্ত্ৰে ৱযমপি ভৱতে কৃষ্ণ কুৰ্মঃ প্ৰণামম্ ॥8॥

ত্ৰৈলোক্যং ভাৱযন্তং ত্ৰিগুণমযমিদং ত্ৰ্যক্ষৰস্যৈকৱাচ্যং
ত্ৰীশানামৈক্যৰূপং ত্ৰিভিৰপি নিগমৈৰ্গীযমানস্ৱৰূপম্ ।
তিস্ৰোৱস্থা ৱিদন্তং ত্ৰিযুগজনিজুষং ত্ৰিক্ৰমাক্ৰান্তৱিশ্ৱং
ত্ৰৈকাল্যে ভেদহীনং ত্ৰিভিৰহমনিশং যোগভেদৈৰ্ভজে ত্ৱাম্ ॥9॥

সত্যং শুদ্ধং ৱিবুদ্ধং জযতি তৱ ৱপুৰ্নিত্যমুক্তং নিৰীহং
নিৰ্দ্ৱন্দ্ৱং নিৰ্ৱিকাৰং নিখিলগুণগণৱ্যঞ্জনাধাৰভূতম্ ।
নিৰ্মূলং নিৰ্মলং তন্নিৰৱধিমহিমোল্লাসি নিৰ্লীনমন্ত-
ৰ্নিস্সঙ্গানাং মুনীনাং নিৰুপমপৰমানন্দসান্দ্ৰপ্ৰকাশম্ ॥10॥

দুৰ্ৱাৰং দ্ৱাদশাৰং ত্ৰিশতপৰিমিলত্ষষ্টিপৰ্ৱাভিৱীতং
সম্ভ্ৰাম্যত্ ক্ৰূৰৱেগং ক্ষণমনু জগদাচ্ছিদ্য সন্ধাৱমানম্ ।
চক্ৰং তে কালৰূপং ৱ্যথযতু ন তু মাং ত্ৱত্পদৈকাৱলম্বং
ৱিষ্ণো কাৰুণ্যসিন্ধো পৱনপুৰপতে পাহি সৰ্ৱামযৌঘাত্ ॥11॥