ଅଷ୍ଟାଵକ୍ର ଗୀତା ନଵଦଶୋଽଧ୍ଯାଯଃ

ତତ୍ତ୍ଵଵିଜ୍ଞାନସନ୍ଦଂଶମାଦାଯ ହୃଦଯୋଦରାତ୍ ।

ନାନାଵିଧପରାମର୍ଶଶଲ୍ଯୋଦ୍ଧାରଃ କୃତୋ ମଯା ॥ 19-1॥
କ୍ଵ ଧର୍ମଃ କ୍ଵ ଚ ଵା କାମଃ କ୍ଵ ଚାର୍ଥଃ କ୍ଵ ଵିଵେକିତା ।

କ୍ଵ ଦ୍ଵୈତଂ କ୍ଵ ଚ ଵାଽଦ୍ଵୈତଂ ସ୍ଵମହିମ୍ନି ସ୍ଥିତସ୍ଯ ମେ ॥ 19-2॥
କ୍ଵ ଭୂତଂ କ୍ଵ ଭଵିଷ୍ଯଦ୍ ଵା ଵର୍ତମାନମପି କ୍ଵ ଵା ।

କ୍ଵ ଦେଶଃ କ୍ଵ ଚ ଵା ନିତ୍ଯଂ ସ୍ଵମହିମ୍ନି ସ୍ଥିତସ୍ଯ ମେ ॥ 19-3॥
କ୍ଵ ଚାତ୍ମା କ୍ଵ ଚ ଵାନାତ୍ମା କ୍ଵ ଶୁଭଂ କ୍ଵାଶୁଭଂ ଯଥା ।

କ୍ଵ ଚିନ୍ତା କ୍ଵ ଚ ଵାଚିନ୍ତା ସ୍ଵମହିମ୍ନି ସ୍ଥିତସ୍ଯ ମେ ॥ 19-4॥
କ୍ଵ ସ୍ଵପ୍ନଃ କ୍ଵ ସୁଷୁପ୍ତିର୍ଵା କ୍ଵ ଚ ଜାଗରଣଂ ତଥା ।

କ୍ଵ ତୁରୀଯଂ ଭଯଂ ଵାପି ସ୍ଵମହିମ୍ନି ସ୍ଥିତସ୍ଯ ମେ ॥ 19-5॥
କ୍ଵ ଦୂରଂ କ୍ଵ ସମୀପଂ ଵା ବାହ୍ଯଂ କ୍ଵାଭ୍ଯନ୍ତରଂ କ୍ଵ ଵା ।

କ୍ଵ ସ୍ଥୂଲଂ କ୍ଵ ଚ ଵା ସୂକ୍ଷ୍ମଂ ସ୍ଵମହିମ୍ନି ସ୍ଥିତସ୍ଯ ମେ ॥ 19-6॥
କ୍ଵ ମୃତ୍ଯୁର୍ଜୀଵିତଂ ଵା କ୍ଵ ଲୋକାଃ କ୍ଵାସ୍ଯ କ୍ଵ ଲୌକିକମ୍ ।

କ୍ଵ ଲଯଃ କ୍ଵ ସମାଧିର୍ଵା ସ୍ଵମହିମ୍ନି ସ୍ଥିତସ୍ଯ ମେ ॥ 19-7॥
ଅଲଂ ତ୍ରିଵର୍ଗକଥଯା ଯୋଗସ୍ଯ କଥଯାପ୍ଯଲମ୍ ।

ଅଲଂ ଵିଜ୍ଞାନକଥଯା ଵିଶ୍ରାନ୍ତସ୍ଯ ମମାତ୍ମନି ॥ 19-8॥