ಗೀತಗೋವಿನ್ದಂ ಸಪ್ತಮಃ ಸರ್ಗಃ - ನಾಗರ ನಾರಯಣಃ

॥ ನಾಗರನಾರಾಯಣಃ ॥
ಅತ್ರಾನ್ತರೇ ಚ ಕುಲಟಾಕುಲವರ್ತ್ಮಪಾತ-ಸಞ್ಜಾತಪಾತಕ ಇವ ಸ್ಫುಟಲಾಞ್ಛನಶ್ರೀಃ ।
ವೃನ್ದಾವನಾನ್ತರಮದೀಪಯದಂಶುಜಾಲೈ-ರ್ದಿಕ್ಸುನ್ದರೀವದನಚನ್ದನಬಿನ್ದುರಿನ್ದುಃ ॥ 40 ॥

ಪ್ರಸರತಿ ಶಶಧರಬಿಮ್ಬೇ ವಿಹಿತವಿಲಮ್ಬೇ ಚ ಮಾಧವೇ ವಿಧುರಾ ।
ವಿರಚಿತವಿವಿಧವಿಲಾಪಂ ಸಾ ಪರಿತಾಪಂ ಚಕಾರೋಚ್ಚೈಃ ॥ 41 ॥
॥ ಗೀತಂ 13 ॥
ಕಥಿತಸಮಯೇಽಪಿ ಹರಿರಹಹ ನ ಯಯೌ ವನಮ್ ।
ಮಮ ವಿಫಲಮಿದಮಮಲರೂಪಮಪಿ ಯೌವನಮ್ ॥
ಯಾಮಿ ಹೇ ಕಮಿಹ ಶರಣಂ ಸಖೀಜನವಚನವಞ್ಚಿತಾ ॥ 1 ॥
ಯದನುಗಮನಾಯ ನಿಶಿ ಗಹನಮಪಿ ಶೀಲಿತಮ್ ।
ತೇನ ಮಮ ಹೃದಯಮಿದಮಸಮಶರಕೀಲಿತಮ್ ॥ 2 ॥
ಮಮ ಮರಣಮೇವ ವರಮತಿವಿತಥಕೇತನಾ ।
ಕಿಮಿಹ ವಿಷಹಾಮಿ ವಿರಹಾನಲಚೇತನಾ ॥ 3 ॥
ಮಾಮಹಹ ವಿಧುರಯತಿ ಮಧುರಮಧುಯಾಮಿನೀ ।
ಕಾಪಿ ಹರಿಮನುಭವತಿ ಕೃತಸುಕೃತಕಾಮಿನೀ ॥ 4 ॥
ಅಹಹ ಕಲಯಾಮಿ ವಲಯಾದಿಮಣೀಭೂಷಣಮ್ ।
ಹರಿವಿರಹದಹನವಹನೇನ ಬಹುದೂಷಣಮ್ ॥ 5 ॥
ಕುಸುಮಸುಕುಮಾರತನುಮತನುಶರಲೀಲಯಾ ।
ಸ್ರಗಪಿ ಹೃದಿ ಹನ್ತಿ ಮಾಮತಿವಿಷಮಶೀಲಯಾ ॥ 6 ॥
ಅಹಮಿಹ ನಿವಸಾಮಿ ನಗಣಿತವನವೇತಸಾ ।
ಸ್ಮರತಿ ಮಧುಸೂದನೋ ಮಾಮಪಿ ನ ಚೇತಸಾ ॥ 7 ॥
ಹರಿಚರಣಶರಣಜಯದೇವಕವಿಭಾರತೀ ।
ವಸತು ಹೃದಿ ಯುವತಿರಿವ ಕೋಮಲಕಲಾವತೀ ॥ 8 ॥
ತತ್ಕಿಂ ಕಾಮಪಿ ಕಾಮಿನೀಮಭಿಸೃತಃ ಕಿಂ ವಾ ಕಲಾಕೇಲಿಭಿ-ರ್ಬದ್ಧೋ ಬನ್ಧುಭಿರನ್ಧಕಾರಿಣಿ ವನೋಪಾನ್ತೇ ಕಿಮು ಭ್ರಾಮ್ಯತಿ ।
ಕಾನ್ತಃ ಕ್ಲಾನ್ತಮನಾ ಮನಾಗಪಿ ಪಥಿ ಪ್ರಸ್ಥಾತುಮೇವಾಕ್ಷಮಃ ಸಙ್ಕೇತೀಕೃತಮಞ್ಜುವಞ್ಜುಲಲತಾಕುಞ್ಜೇಽಪಿ ಯನ್ನಾಗತಃ ॥ 42 ॥
ಅಥಾಗತಾಂ ಮಾಧವಮನ್ತರೇಣ ಸಖೀಮಿಯಂ ವೀಕ್ಷ್ಯ ವಿಷಾದಮೂಕಾಮ್ ।
ವಿಶಙ್ಕ್ಮಾನಾ ರಮಿತಂ ಕಯಾಪಿ ಜನಾರ್ದನಂ ದೃಷ್ಟವದೇತದಾಹ ॥ 43 ॥
॥ ಗೀತಂ 14 ॥
ಸ್ಮರಸಮರೋಚಿತವಿರಚಿತವೇಶಾ ।
ಗಲಿತಕುಸುಮದರವಿಲುಲಿತಕೇಶಾ ॥
ಕಾಪಿ ಮಧುರಿಪುಣಾ ವಿಲಸತಿ ಯುವತಿರಧಿಕಗುಣಾ ॥ 1 ॥
ಹರಿಪರಿರಮ್ಭಣವಲಿತವಿಕಾರಾ ।
ಕುಚಕಲಶೋಪರಿ ತರಲಿತಹಾರಾ ॥ 2 ॥
ವಿಚಲದಲಕಲಲಿತಾನನಚನ್ದ್ರಾ ।
ತದಧರಪಾನರಭಸಕೃತತನ್ದ್ರಾ ॥ 3 ॥
ಚಞ್ಚಲಕುಣ್ಡಲದಲಿತಕಪೋಲಾ ।
ಮುಖರಿತರಸನಜಘನಗಲಿತಲೋಲಾ ॥ 4 ॥
ದಯಿತವಿಲೋಕಿತಲಜ್ಜಿತಹಸಿತಾ ।
ಬಹುವಿಧಕೂಜಿತರತಿರಸರಸಿತಾ ॥ 5 ॥
ವಿಪುಲಪುಲಕಪೃಥುವೇಪಥುಭಙ್ಗಾ ।
ಶ್ವಸಿತನಿಮೀಲಿತವಿಕಸದನಙ್ಗಾ ॥ 6 ॥
ಶ್ರಮಜಲಕಣಭರಸುಭಗಶರೀರಾ ।
ಪರಿಪತಿತೋರಸಿ ರತಿರಣಧೀರಾ ॥ 7 ॥
ಶ್ರೀಜಯದೇವಭಣಿತಹರಿರಮಿತಮ್ ।
ಕಲಿಕಲುಷಂ ಜನಯತು ಪರಿಶಮಿತಮ್ ॥ 8 ॥
ವಿರಹಪಾಣ್ಡುಮುರಾರಿಮುಖಾಮ್ಬುಜ-ದ್ಯುತಿರಿಯಂ ತಿರಯನ್ನಪಿ ಚೇತನಾಮ್ ।
ವಿಧುರತೀವ ತನೋತಿ ಮನೋಭುವಃ ಸಹೃದಯೇ ಹೃದಯೇ ಮದನವ್ಯಥಾಮ್ ॥ 44 ॥
॥ ಗೀತಂ 15 ॥
ಸಮುದಿತಮದನೇ ರಮಣೀವದನೇ ಚುಮ್ಬನವಲಿತಾಧರೇ ।
ಮೃಗಮದತಿಲಕಂ ಲಿಖತಿ ಸಪುಲಕಂ ಮೃಗಮಿವ ರಜನೀಕರೇ ॥
ರಮತೇ ಯಮುನಾಪುಲಿನವನೇ ವಿಜಯೀ ಮುರಾರಿರಧುನಾ ॥ 1 ॥
ಘನಚಯರುಚಿರೇ ರಚಯತಿ ಚಿಕುರೇ ತರಲಿತತರುಣಾನನೇ ।
ಕುರಬಕಕುಸುಮಂ ಚಪಲಾಸುಷಮಂ ರತಿಪತಿಮೃಗಕಾನನೇ ॥ 2 ॥
ಘಟಯತಿ ಸುಘನೇ ಕುಚಯುಗಗಗನೇ ಮೃಗಮದರುಚಿರೂಷಿತೇ ।
ಮಣಿಸರಮಮಲಂ ತಾರಕಪಟಲಂ ನಖಪದಶಶಿಭೂಷಿತೇ ॥ 3 ॥
ಜಿತಬಿಸಶಕಲೇ ಮೃದುಭುಜಯುಗಲೇ ಕರತಲನಲಿನೀದಲೇ ।
ಮರಕತವಲಯಂ ಮಧುಕರನಿಚಯಂ ವಿತರತಿ ಹಿಮಶೀತಲೇ ॥ 4 ॥
ರತಿಗೃಹಜಘನೇ ವಿಪುಲಾಪಘನೇ ಮನಸಿಜಕನಕಾಸನೇ ।
ಮಣಿಮಯರಸನಂ ತೋರಣಹಸನಂ ವಿಕಿರತಿ ಕೃತವಾಸನೇ ॥ 5 ॥
ಚರಣಕಿಸಲಯೇ ಕಮಲಾನಿಲಯೇ ನಖಮಣಿಗಣಪೂಜಿತೇ ।
ಬಹಿರಪವರಣಂ ಯಾವಕಭರಣಂ ಜನಯತಿ ಹೃದಿ ಯೋಜಿತೇ ॥ 6 ॥
ರಮಯತಿ ಸದೃಶಂ ಕಾಮಪಿ ಸುಭೃಶಂ ಖಲಹಲಧರಸೋದರೇ ।
ಕಿಮಫಲಮವಸಂ ಚಿರಮಿಹ ವಿರಸಂ ವದ ಸಖಿ ವಿಟಪೋದರೇ ॥ 7 ॥
ಇಹ ರಸಭಣನೇ ಕೃತಹರಿಗುಣನೇ ಮಧುರಿಪುಪದಸೇವಕೇ ।
ಕಲಿಯುಗಚರಿತಂ ನ ವಸತು ದುರಿತಂ ಕವಿನೃಪಜಯದೇವಕೇ ॥ 8 ॥
ನಾಯಾತಃ ಸಖಿ ನಿರ್ದಯೋ ಯದಿ ಶಠಸ್ತ್ವಂ ದೂತಿ ಕಿಂ ದೂಯಸೇ ಸ್ವಚ್ಛನ್ದಂ ಬಹುವಲ್ಲಭಃ ಸ ರಮತೇ ಕಿಂ ತತ್ರ ತೇ ದೂಷಣಮ್ ।
ಪಶ್ಯಾದ್ಯ ಪ್ರಿಯಸಮ್ಗಮಾಯ ದಯಿತಸ್ಯಾಕೃಷ್ಯಮಾಣಂ ಗಣೈ-ರುತ್ಕಣ್ಠಾರ್ತಿಭರಾದಿವ ಸ್ಫುಟದಿದಂ ಚೇತಃ ಸ್ವಯಂ ಯಾಸ್ಯತಿ ॥ 45 ॥
॥ ಗೀತಂ 16 ॥
ಅನಿಲತರಲಕುವಲಯನಯನೇನ ।
ತಪತಿ ನ ಸಾ ಕಿಸಲಯಶಯನೇನ ॥
ಸಖಿ ಯಾ ರಮಿತಾ ವನಮಾಲಿನಾ ॥ 1 ॥
ವಿಕಸಿತಸರಸಿಜಲಲಿತಮುಖೇನ ।
ಸ್ಫುಟತಿ ನ ಸಾ ಮನಸಿಜವಿಶಿಖೇನ ॥ 2 ॥
ಅಮೃತಮಧುರಮೃದುತರವಚನೇನ ।
ಜ್ವಲತಿ ನ ಸಾ ಮಲಯಜಪವನೇನ ॥ 3 ॥
ಸ್ಥಲಜಲರುಹರುಚಿಕರಚರಣೇನ ।
ಲುಠತಿ ನ ಸಾ ಹಿಮಕರಕಿರಣೇನ ॥ 4 ॥
ಸಜಲಜಲದಸಮುದಯರುಚಿರೇಣ ।
ದಲತಿ ನ ಸಾ ಹೃದಿ ಚಿರವಿರಹೇಣ ॥ 5 ॥
ಕನಕನಿಕಷರುಚಿಶುಚಿವಸನೇನ ।
ಶ್ವಸತಿ ನ ಸಾ ಪರಿಜನಹಸನೇನ ॥ 6 ॥
ಸಕಲಭುವನಜನವರತರುಣೇನ ।
ವಹತಿ ನ ಸಾ ರುಜಮತಿಕರುಣೇನ ॥ 7 ॥
ಶ್ರೀಜಯದೇವಭಣಿತವಚನೇನ ।
ಪ್ರವಿಶತು ಹರಿರಪಿ ಹೃದಯಮನೇನ ॥ 8 ॥
ಮನೋಭವಾನನ್ದನ ಚನ್ದನಾನಿಲ ಪ್ರಸೀದ ರೇ ದಕ್ಷಿಣ ಮುಞ್ಚ ವಾಮತಾಮ್ ।
ಕ್ಷಣಂ ಜಗತ್ಪ್ರಾಣ ವಿಧಾಯ ಮಾಧವಂ ಪುರೋ ಮಮ ಪ್ರಾಣಹರೋ ಭವಿಷ್ಯಸಿ ॥ 46 ॥
ರಿಪುರಿವ ಸಖೀಸಂವಾಸೋಽಯಂ ಶಿಖೀವ ಹಿಮಾನಿಲೋ ವಿಷಮಿವ ಸುಧಾರಶ್ಮಿರ್ಯಸ್ಮಿನ್ದುನೋತಿ ಮನೋಗತೇ ।
ಹೃದಯಮದಯೇ ತಸ್ಮಿನ್ನೇವಂ ಪುನರ್ವಲತೇ ಬಲಾತ್ ಕುವಲಯದೃಶಾಂ ವಾಮಃ ಕಾಮೋ ನಿಕಾಮನಿರಙ್ಕುಶಃ ॥ 47 ॥
ಬಾಧಾಂ ವಿಧೇಹಿ ಮಲಯಾನಿಲ ಪಞ್ಚಬಾಣ ಪ್ರಾಣಾನ್ಗೃಹಾಣ ನ ಗೃಹಂ ಪುನರಾಶ್ರಯಿಷ್ಯೇ ।
ಕಿಂ ತೇ ಕೃತಾನ್ತಭಗಿನಿ ಕ್ಷಮಯಾ ತರಙ್ಗೈ-ರಙ್ಗಾನಿ ಸಿಞ್ಚ ಮಮ ಶಾಮ್ಯತು ದೇಹದಾಹಃ ॥ 48 ॥
ಪ್ರಾತರ್ನೀಲನಿಚೋಲಮಚ್ಯುತಮುರಸ್ಸಂವೀತಪೀತಾಮ್ಬರಮ್
ರಧಾಯಾಶ್ಕಿತಂ ವಿಲೋಕ್ಯ ಹಸತಿ ಸ್ವೈರಂ ಸಖೀಮಣ್ಡಲೇ ।
ವ್ರೀಡಾಚಞ್ಚಲಮಞ್ಚಲಂ ನಯನಯೋರಾಧಾಯ ರಾಧಾನನೇ
ಸ್ವಾದುಸ್ಮೇರಮುಖೋಽಯಮಸ್ತು ಜಗದಾನನ್ದಾಯ ನನ್ದಾತ್ಮಜಃ॥ (ಕಸ್ಮಿಂಶ್ಚನ ಪಾಠಾನ್ತರೇ ಇದಂ ಪದ್ಯಂ ವಿದ್ಯತೇ)
॥