નારાયણીયં દશક 19 - પ્રચેતૃણાં ચરિતમ્

પૃથોસ્તુ નપ્તા પૃથુધર્મકર્મઠઃ
પ્રાચીનબર્હિર્યુવતૌ શતદ્રુતૌ ।
પ્રચેતસો નામ સુચેતસઃ સુતા-
નજીજનત્ત્વત્કરુણાઙ્કુરાનિવ ॥1॥

પિતુઃ સિસૃક્ષાનિરતસ્ય શાસનાદ્-
ભવત્તપસ્યાભિરતા દશાપિ તે
પયોનિધિં પશ્ચિમમેત્ય તત્તટે
સરોવરં સન્દદૃશુર્મનોહરમ્ ॥2॥

તદા ભવત્તીર્થમિદં સમાગતો
ભવો ભવત્સેવકદર્શનાદૃતઃ ।
પ્રકાશમાસાદ્ય પુરઃ પ્રચેતસા-
મુપાદિશત્ ભક્તતમસ્તવ સ્તવમ્ ॥3॥

સ્તવં જપન્તસ્તમમી જલાન્તરે
ભવન્તમાસેવિષતાયુતં સમાઃ ।
ભવત્સુખાસ્વાદરસાદમીષ્વિયાન્
બભૂવ કાલો ધ્રુવવન્ન શીઘ્રતા ॥4॥

તપોભિરેષામતિમાત્રવર્ધિભિઃ
સ યજ્ઞહિંસાનિરતોઽપિ પાવિતઃ ।
પિતાઽપિ તેષાં ગૃહયાતનારદ-
પ્રદર્શિતાત્મા ભવદાત્મતાં યયૌ ॥5॥

કૃપાબલેનૈવ પુરઃ પ્રચેતસાં
પ્રકાશમાગાઃ પતગેન્દ્રવાહનઃ ।
વિરાજિ ચક્રાદિવરાયુધાંશુભિ-
ર્ભુજાભિરષ્ટાભિરુદઞ્ચિતદ્યુતિઃ ॥6॥

પ્રચેતસાં તાવદયાચતામપિ
ત્વમેવ કારુણ્યભરાદ્વરાનદાઃ ।
ભવદ્વિચિન્તાઽપિ શિવાય દેહિનાં
ભવત્વસૌ રુદ્રનુતિશ્ચ કામદા ॥7॥

અવાપ્ય કાન્તાં તનયાં મહીરુહાં
તયા રમધ્વં દશલક્ષવત્સરીમ્ ।
સુતોઽસ્તુ દક્ષો નનુ તત્ક્ષણાચ્ચ માં
પ્રયાસ્યથેતિ ન્યગદો મુદૈવ તાન્ ॥8॥

તતશ્ચ તે ભૂતલરોધિનસ્તરૂન્
ક્રુધા દહન્તો દ્રુહિણેન વારિતાઃ ।
દ્રુમૈશ્ચ દત્તાં તનયામવાપ્ય તાં
ત્વદુક્તકાલં સુખિનોઽભિરેમિરે ॥9॥

અવાપ્ય દક્ષં ચ સુતં કૃતાધ્વરાઃ
પ્રચેતસો નારદલબ્ધયા ધિયા ।
અવાપુરાનન્દપદં તથાવિધ-
સ્ત્વમીશ વાતાલયનાથ પાહિ મામ્ ॥10॥