നാരായണീയം ദശക 19 - പ്രചേതൃണാം ചരിതമ്

പൃഥോസ്തു നപ്താ പൃഥുധര്മകര്മഠഃ
പ്രാചീനബര്ഹിര്യുവതൌ ശതദ്രുതൌ ।
പ്രചേതസോ നാമ സുചേതസഃ സുതാ-
നജീജനത്ത്വത്കരുണാങ്കുരാനിവ ॥1॥

പിതുഃ സിസൃക്ഷാനിരതസ്യ ശാസനാദ്-
ഭവത്തപസ്യാഭിരതാ ദശാപി തേ
പയോനിധിം പശ്ചിമമേത്യ തത്തടേ
സരോവരം സന്ദദൃശുര്മനോഹരമ് ॥2॥

തദാ ഭവത്തീര്ഥമിദം സമാഗതോ
ഭവോ ഭവത്സേവകദര്ശനാദൃതഃ ।
പ്രകാശമാസാദ്യ പുരഃ പ്രചേതസാ-
മുപാദിശത് ഭക്തതമസ്തവ സ്തവമ് ॥3॥

സ്തവം ജപന്തസ്തമമീ ജലാന്തരേ
ഭവന്തമാസേവിഷതായുതം സമാഃ ।
ഭവത്സുഖാസ്വാദരസാദമീഷ്വിയാന്
ബഭൂവ കാലോ ധ്രുവവന്ന ശീഘ്രതാ ॥4॥

തപോഭിരേഷാമതിമാത്രവര്ധിഭിഃ
സ യജ്ഞഹിംസാനിരതോഽപി പാവിതഃ ।
പിതാഽപി തേഷാം ഗൃഹയാതനാരദ-
പ്രദര്ശിതാത്മാ ഭവദാത്മതാം യയൌ ॥5॥

കൃപാബലേനൈവ പുരഃ പ്രചേതസാം
പ്രകാശമാഗാഃ പതഗേന്ദ്രവാഹനഃ ।
വിരാജി ചക്രാദിവരായുധാംശുഭി-
ര്ഭുജാഭിരഷ്ടാഭിരുദഞ്ചിതദ്യുതിഃ ॥6॥

പ്രചേതസാം താവദയാചതാമപി
ത്വമേവ കാരുണ്യഭരാദ്വരാനദാഃ ।
ഭവദ്വിചിന്താഽപി ശിവായ ദേഹിനാം
ഭവത്വസൌ രുദ്രനുതിശ്ച കാമദാ ॥7॥

അവാപ്യ കാന്താം തനയാം മഹീരുഹാം
തയാ രമധ്വം ദശലക്ഷവത്സരീമ് ।
സുതോഽസ്തു ദക്ഷോ നനു തത്ക്ഷണാച്ച മാം
പ്രയാസ്യഥേതി ന്യഗദോ മുദൈവ താന് ॥8॥

തതശ്ച തേ ഭൂതലരോധിനസ്തരൂന്
ക്രുധാ ദഹന്തോ ദ്രുഹിണേന വാരിതാഃ ।
ദ്രുമൈശ്ച ദത്താം തനയാമവാപ്യ താം
ത്വദുക്തകാലം സുഖിനോഽഭിരേമിരേ ॥9॥

അവാപ്യ ദക്ഷം ച സുതം കൃതാധ്വരാഃ
പ്രചേതസോ നാരദലബ്ധയാ ധിയാ ।
അവാപുരാനന്ദപദം തഥാവിധ-
സ്ത്വമീശ വാതാലയനാഥ പാഹി മാമ് ॥10॥