ନାରାଯଣୀଯଂ ଦଶକ 28 - ଲକ୍ଷ୍ମୀସ୍ଵଯଂଵରଂ ତଥା ଅମୃତୋତ୍ପତ୍ତିଃ

ଜ୍ଜଲଧେରୁଦ୍ଵିଜଗାଲ କାଲକୂଟମ୍ ।
ଅମରସ୍ତୁତିଵାଦମୋଦନିଘ୍ନୋ
ଗିରିଶସ୍ତନ୍ନିପପୌ ଭଵତ୍ପ୍ରିଯାର୍ଥମ୍ ॥1॥

ଵିମଥତ୍ସୁ ସୁରାସୁରେଷୁ ଜାତା
ସୁରଭିସ୍ତାମୃଷିଷୁ ନ୍ଯଧାସ୍ତ୍ରିଧାମନ୍ ।
ହଯରତ୍ନମଭୂଦଥେଭରତ୍ନଂ
ଦ୍ଯୁତରୁଶ୍ଚାପ୍ସରସଃ ସୁରେଷୁ ତାନି ॥2॥

ଜଗଦୀଶ ଭଵତ୍ପରା ତଦାନୀଂ
କମନୀଯା କମଲା ବଭୂଵ ଦେଵୀ ।
ଅମଲାମଵଲୋକ୍ଯ ଯାଂ ଵିଲୋଲଃ
ସକଲୋଽପି ସ୍ପୃହଯାମ୍ବଭୂଵ ଲୋକଃ ॥3॥

ତ୍ଵଯି ଦତ୍ତହୃଦେ ତଦୈଵ ଦେଵ୍ଯୈ
ତ୍ରିଦଶେନ୍ଦ୍ରୋ ମଣିପୀଠିକାଂ ଵ୍ଯତାରୀତ୍ ।
ସକଲୋପହୃତାଭିଷେଚନୀଯୈଃ
ଋଷଯସ୍ତାଂ ଶ୍ରୁତିଗୀର୍ଭିରଭ୍ଯଷିଞ୍ଚନ୍ ॥4॥

ଅଭିଷେକଜଲାନୁପାତିମୁଗ୍ଧ-
ତ୍ଵଦପାଙ୍ଗୈରଵଭୂଷିତାଙ୍ଗଵଲ୍ଲୀମ୍ ।
ମଣିକୁଣ୍ଡଲପୀତଚେଲହାର-
ପ୍ରମୁଖୈସ୍ତାମମରାଦଯୋଽନ୍ଵଭୂଷନ୍ ॥5॥

ଵରଣସ୍ରଜମାତ୍ତଭୃଙ୍ଗନାଦାଂ
ଦଧତୀ ସା କୁଚକୁମ୍ଭମନ୍ଦଯାନା ।
ପଦଶିଞ୍ଜିତମଞ୍ଜୁନୂପୁରା ତ୍ଵାଂ
କଲିତଵ୍ରୀଲଵିଲାସମାସସାଦ ॥6॥

ଗିରିଶଦ୍ରୁହିଣାଦିସର୍ଵଦେଵାନ୍
ଗୁଣଭାଜୋଽପ୍ଯଵିମୁକ୍ତଦୋଷଲେଶାନ୍ ।
ଅଵମୃଶ୍ଯ ସଦୈଵ ସର୍ଵରମ୍ଯେ
ନିହିତା ତ୍ଵଯ୍ଯନଯାଽପି ଦିଵ୍ଯମାଲା ॥7॥

ଉରସା ତରସା ମମାନିଥୈନାଂ
ଭୁଵନାନାଂ ଜନନୀମନନ୍ଯଭାଵାମ୍ ।
ତ୍ଵଦୁରୋଵିଲସତ୍ତଦୀକ୍ଷଣଶ୍ରୀ-
ପରିଵୃଷ୍ଟ୍ଯା ପରିପୁଷ୍ଟମାସ ଵିଶ୍ଵମ୍ ॥8॥

ଅତିମୋହନଵିଭ୍ରମା ତଦାନୀଂ
ମଦଯନ୍ତୀ ଖଲୁ ଵାରୁଣୀ ନିରାଗାତ୍ ।
ତମସଃ ପଦଵୀମଦାସ୍ତ୍ଵମେନା-
ମତିସମ୍ମାନନଯା ମହାସୁରେଭ୍ଯଃ ॥9॥

ତରୁଣାମ୍ବୁଦସୁନ୍ଦରସ୍ତଦା ତ୍ଵଂ
ନନୁ ଧନ୍ଵନ୍ତରିରୁତ୍ଥିତୋଽମ୍ବୁରାଶେଃ ।
ଅମୃତଂ କଲଶେ ଵହନ୍ କରାଭ୍ଯା-
ମଖିଲାର୍ତିଂ ହର ମାରୁତାଲଯେଶ ॥10॥